Nos conventus monasterii Sancti Martini de Sacro Monte Pannonie damus pro memoria, quod, cum nos receptis cum debita reverentia litteris excellentissimi principis domini nostri Lodovici, Dei gratia regis Hungarie, Polonie, Dalmatie etc., pro religiosis viris domino Paulo abbate et conventu monasterii Sancti Mauricii de Beel inter alios iuridicos et consuetudinarios actus et processus iuxta morem regni Hungarici fieri solitos et inquisitiones et prohibitiones legitime faciendas per anni circulum generalibus, servata serie earumdem una cum Michaele, filio Fabiani, de Kovachy, homine regio, discretum virum dominum Iohannem, plebanum parochialis ecclesie Beate Marie Virginis de Olsuk, hominem nostrum ad executionem negotiorum infrascriptorum transmisissemus pro testimonio fide dignum, tandem iidem ad nos insimul redeuntes nobis conformiter retulerunt, quod ipsi feria secunda proxima post festum Beati Francisci confessoris nunc preterita [1377. okt. 5.] ad villam Nywl vocatam pariter accessissent; ubi, dum eodem die prefatus dominus Paulus abbas personaliter et Iohannes litteratus procurator et procuratorio nomine conventus de Beel predicti presentibus, videntibus et audientibus quam pluribus utriusque sexus hominibus tam de villa Nywl predicta, quam de civitate Iauriensi et aliis locis conprovincialibus causa vindemiandi vineas ipsorum in territorio de dicta Nywl habitas illic ipso tempore congregatis, venerabilem in Christo patrem dominum Petrum, episcopum Iauriensem, absentem et sub nomine et persona eiusdem dominum Briccium presbiterum, rectorem altaris Sancti Demetrii in ecclesia Iauriensi cathedrali et Martinum de Der, vini decimatores ipsius domini episcopi in dicta villa tunc personaliter constitutos et decimas vini de vineis in terra seu loco Feelkeert appellato dictorum domini abbatis et conventus ac monasterii in territorio de Nywl prenotato existenti sitis exigere pro eodem domino episcopo et levare volentes, ne easdem exigere et tollere, sed ipsis, scilicet domino abbati et suo conventu ac monasterio, antedictis persolvi et amministrari pacifice admittere, omnes etiam et singulos possessores vinearum in terra seu loco prescripto, ne huiusmodi decimas dictis decimatoribus episcopalibus aut alicui, preterquam eisdem domino abbati et conventui, monasterioque persolvere et dare deberent, monuissent et requisissent, imo per ipsos regium atque nostrum homines legitime prohiberi et eis contradici fecissent, ipsique executores prohibitionem et contradictionem huiusmodi omnibus, quorum intererat, denuntiando publicassent, possessores quidem vinearum terre seu loci Feelkeert sepetacti nullo in hoc deficiente unanimiter respondissent se reminisci et bene scire decimas vinearum suarum de terra prelibata semper pertinuisse et spectate debere ad abbatem et conventum ac monasterium Sancti Mauricii prenotatos et easdem ipsis potius, quam domino episcopo memorato malle solvere atque dare, dummodo iidem dominus abbas et suus conventus ipsos solventes ab impetitione et molestatione dicti domini episcopi et suorum decimatorum, quam in hoc casu verisimiliter formidarent, eripere possent et indempniter preservare; vir autem discretus magister Blasius, canonicus et decanus predicte ecclesie Iauriensis, legitimus equidem procurator et procuratorio nomine prescripti domini Petri, episcopi Iauriensis, domini et prelati sui, predictis decimatoribus mox astando vice ipsius domini sui ad premissa taliter obiecisset, quod idem dominus suus episcopus prohibitioni et contradictioni predictis stare non intenderet, neque staret, quin decimas terre Feelkeert sepefate perciperet et teneret; sed, si prenominatus dominus abbas sexingentos cubulos vini, prout olim felicis memorie dominus Colomannus, ipsius domini Petri episcopi predecessor et etiam idem dominus Petrus episcopus anno proxime preterito pro eisdem decimis dicto domino Paulo abbati solvisse dinossceretur in presenti recipere et de hiis contentari decerneret sive vellet, tunc eidem abbati huiusmodi sexingentos cubulos vini ex parte et nomine ipsius domini sui episcopi pro decimis de Feelkeert sepius expressis solvi et dari faceret benivole et cum pace; alioquin, si qui vineas inibi possidentes decimas suas domino abbati seu conventui et monasterio sepedictis et non domino suo episcopo prenotato solverent, illos ecclesiasticis idem episcopus innodaret sententiis et alias arrestaret et impedire vellet dictus magister Blasius modis et obstaculis omnibus, quibus posset; ipsis itaque domino abbate de se ac Iohanne litterato ex parte conventus prenotati huiusmodi quantitatem vini pro dictis decimis acceptare nolentibus, sed ipsas decimas per se exigendas et levandas petentibus, sicut prius, illico idem magister Blasius, plus commotus, equos quorumdam, decimas suas predicto domino abbati et conventui ac monasterio suis solvere volentium et promptorum, de curru eorum extrahi et ad hospitium suum in eadem villa Nywl in terra videlicet capituli Iauriensis tunc habitum impelli et ibi detineri mandasset et fecisset violenter, aliis decimas eidem domino abbati et conventui solvere volentibus comminans similiter se facturum; unde dominus abbas et Iohannes litteratus predicti tandem propter maius bonum petentibus et dare promittentibus eodem magistro Blasio procuratore et decimatoribus episcopalibus antedictis consensissent ista vice recipere ex parte dicti domini episcopi per manus dictorum decimatorum eiusdem sexcentos cubulos vini congruentis pro decimis antedictis, quorum nichilominus partem iidem decimatores ibidem presentibus et videntibus ipsis regio et nostro hominibus sepedicto Iohanni litterato nominibus domini abbatis et conventus predictorum recipienti de vinis quibusdam in terra Feelkeert procreatis antedicta ad rationem solutionis huiusmodi assignassent, eo quidem adiecto, quod receptis hac vice sub depactione premissa ipsis sexcentis cubulis vini, deinceps dicti dominus abbas et conventus, si et dum eis videbitur et placebit, cum propria dicti domini episcopi persona super facto plene et pacifice remissionis premissorum decimarum tractent seu conveniant modo, qua valuerint, meliori; facta igitur coram nobis per predictos regium et nostrum homines relatione huiusmodi de premissis super et de eadem presentes litteras nostras testimoniales supradictis domino abbati et conventui sigillo nostro munitas autentico concessimus requisiti conmuni iusticia et consuetudine in talibus observata. Datum quarto die executionis processuum prescriptorum, anno Domini millesimo trecentesimo septuagesimo septimo. [1377. okt. 8.]