Nos capitulum ecclesie Iauriensis memorie conmendantes tenore presentium significamus, quibus expedit universis, quod, cum nos iuxta continentiam litterarum magnifici viri domini Nicolai de Gara, regni Hungarie palatini, modum et formam sui iudicii exprimentium una cum honorabili viro magistro Bartholomeo de Sen, curie palatinalis notario, homine ipsius domini palatini de curia sua ad hoc specialiter per ipsum dominum palatinum transmisso, nostrum hominem, videlicet discretum virum dominum Ladizlaum presbiterum, rectorem altaris Sancti Petri in ecclesia nostra kathedrali existentis transmisissemus pro testimonio fide dignum, tandem iidem ad nos regressi nobis concorditer post executionem eorum, que in dictis litteris palatinalibus continentur, retulerunt, quod idem homo palatinalis presente ipso nostro testimonio ad faciem possessionis Pata vocata vicinis et conmetaneis eiusdem universis inibi legitime convocatis et presentibus accedendo tertiam et decimam partes tributi in eadem exigi consueti religioso viro domino Stephano abbati et eius monasterio Sancti Martini de Sacro Monte Pannonie eo iure, quo eis vigore litterarum privilegialium domini Bele regis dinossceretur pertinere statuissent et conmisissent in perpetuum possidere, tenere pariter et habere contradictione magistrorum Leustachii et Ladislai, filiorum Stephani, de Pata et aliorum quorumlibet non obstante, prout plenius in ipsis litteris palatinalibus continentur. In cuius rei testimonium presentes litteras nostras pendenti sigillo nostro consignatas duximus concedendas. Datum in festo Assumptionis Virginis aloriose, anno Domini millesimo trecentesimo octogesimo tertio. [1383. aug. 15.]