Nos comes Nicolaus de Zeech, iudex curie serenissime et magnifice principis domine Marie, Dei gratia inclite regine Hungarie, Dalmatie, Croatie, etc., memorie conmendantes tenore presentium significamus, quibus expedit, universis, quod dominus frater Petrus prepositus pro domino Stephano, abbate ecclesie Sancti Martini Sacri Montis Pannonie, cum procuratoriis litteris eiusdem iuxta continentiam litterarum capituli ecclesie Iauriensis evocatoriarum pariter et inquisitoriam in octavis festi Beati Iacobi apostoli proxime preteritis [1382. aug. 1.] in figura nostri iudicii conparendo contra Mychaelem de Maky, Nicolaum, filium Leukus, de Tagyas, Cosmam de Ronzka ac Petrum de Zemere, iudices nobilium comitatus Kamaromiensis, quasdam tres litteras inquisitorias, unam premissam ac secundam capituli ecclesie Wesprimiensis, necnon tertiam conventus Sancti Martini Sacri Montis Pannonie omnino anno in presenti diversis terminis emanatas domino nostro regi ad suum regium litteratorium preceptum rescriptas, tenoremque litterarum regalium eisdem capitulis ac conventui directarum verbaliter in se habentes, asserens actionem et propositionem eiusdem litteris contineri in eisdem, nobis presentarat declarantes, quod regii et dictorum capitulorum ac conventus homines litteris in eisdem nominati ad regium litteratorium mandatum transmissi ab omnibus, quibus decuisset et licuisset, diligenter inquirendo talem scivissent veritatem, quod magister Nicolaus, filius Thome, de Nyssa, pridem vicesgerens domini Nicolai de Gara, regni Hungarie palatini, in congregatione eiusdem generali in dicto comitatu Kamaromiensi celebrata [1382. máj. 12.] pro eo, quia quosdam duos homines de villa dicte ecclesie Sancti Martini Temerd vocata per iuratos more solito ad registrum in numerum proscriptorum traditos officialis eiusdem domini abbatis de eadem villa manibus ipsius vicepalatini tanquam proscriptos eo, quod idem officialis eosdem conprehendere non valuisset, assignare nequivisset et, licet idem dominus abbas in eo, ut ipse de maliciosis actibus eorum proscriptorum inscius extitisset, iuramentum per ipsum magistrum Nicolaum sibi positum vigesimo se prestitisset et etiam homagium eorumdem duorum proscriptorum eidem magistro Nicolao more consueto persolvisset, tamen in festo Asscensionis Domini nunc preterito [1382. máj. 15.] mane, scilicet quarto die celebrationis premisse congregationes homines suos una cum Mychaele de Maky, Nicolao, filio Leukus de Tagyas, Cosma de Ronzka et Petro de Zemere, iudicibus nobilium comitatus Kamaromiensis predicti et Iacobo, filio Kolus ac aliis eorum complicibus armatis manibus et potentiariis ad dictam villam Temerd vocatam transmittendo quam plurima pecora, boves videlicet, vaccas, vitulos ac frumenta populorum de eadem villa valoris octuaginta marcarum, effractis curiis eorundem, verberatis et vulneratis ac male tractatis utriusque sexus hominibus, violenter aufferri et ipsam villam enormiter devastari et desolari fecisset, que quidem animalia, licet dictus officialis secundo die ablationis et spoliationis huiusmodi ab ipso vicepalatino redimere voluisset, idemque in presentia iuratorum predictorum et aliorum conprovincialium ea reddere promisisset, mox tamen eadem animalia pro suo libito clam depelli faciens et reduci facere recusans premissa spolia restituere penitus renuisset in ipsius domini abbatis preiudicium et derogamen.||
Quibus quidem litteris exhibitis prefatus procurator ipsius domini abbatis ex parte predictorum Nicolai, Mychaelis, Cosme et Petri per nos in premissis iuris equitatem postularat inpertiri. Quibus perceptis predictus Cosmas de Ronka pro se personaliter et pro aliis predictis cum procuratoriis litteris palatinalibus in nostram exurgendo presentiam responderat ex adverso, quod ipse et dicti alii in causam atracti in totali premissa actione et acquisitione ipsius domini abbatis innocentes essent penitus et inmunes.||
Et, quia prefatus procurator ipsius domini abbatis eundem in sua acquisitione premissa ad veridicam attestationem vicinorum et conmetaneorum, nobiliumque suorum conprovincialium dicti comitatus Komaromiensis per formam conmunis inquisitionis fiendam submittebat et insuper premissam suam acquisitionem productis tribus litteris inquisitoriis conprobabat, prefatique Cosmas se ac dictos alios in causam atractos in ipsorum innocentia ad ipsam conmunem inquisitionem non conmittebat, pro eo una cum regni nobilibus nobiscum in iudicio sedentibus conmiseramus eo modo, ut prefati Mychael de Maky, Nicolaus, filius Leukus, Cosmas de Ronka et Petrus de Zemere, iudices nobilium, ducentesimo se nobilibus, videlicet quilibet eorum quinquagesimo se in octavis festi Omnium Sanctorum tunc venturis [1382. nov. 8.] super eo, quod ipsi in totali premissa actione et acquisitione dicti domini abbatis innocentes essent penitus et inmunes, coram dicto capitulo ecclesie Iauriensis sacramenta prestare et tandem ipsorum iuramentorum depositionum series partes in litteris dicti capituli aci octavam diem dictarum octavarum [1382. nov. 15.] nobis reportare tenerentur.||
Tandem dicto octavo die ipsorum(!) octavarum festi Omnium Sanctorum [1382. nov. 15.] occurrente frater Petrus prepositus pro predicto domino Stephano, abbate ecclesie Sancti Martini, cum procuratoriis litteris eiusdem in nostram veniendo presentiam litteras sepedicti capituli Iauriensis super obmissione iuramentalis depositionis predicti Petri de Zemere emanatas nobis presentavit, in quibus inter cetera adinveniebatur, quod predictus Petrus de Zemere ad deponendum premissum suum iuramentum, quod ipse contra predictum dominum abbatem in predictis octavis festi Omnium Sanctorum iuxta nostram iudiciariam conmissionem antedictam facere debebat, per procuratorem ipsius domini abbatis in persona eiusdem legitime expectatus in presentiam ipsius capituli Iauriensis non venisset. Quibus quidem litteris exhibitis prefatus procurator dicti domini abbatis eidem in premissis ex parte dicti Petri de Zemere iuris equitatem petivit inpertiri.||
Verum quia prefato Petro de Zemere inter alios predictos in eo, ut ipse in totali premissa actione et acquisitione dicti domini abbatis innocens existeret penitus et inmunis, sacramentum cum quinquaginta nobilibus die et loco in premissis deponendum adiudicatum fuisse et tandem ipsam iuramentalem depositionem idem Petrus in termino prefixo non fecisse ex premissis omnibus adinveniebatur, universeque cause secundum regni consuetudinem uno istorum duorum articulorum, videlicet duelli tramite aut iuramentali depositione solent terminari, ideo nos nobilium regni tribunal iudiciarium nobis consedentium maturo adhibito consilio, nolentes ipsius Petri de Zemere temerarie presumptionis audaciam inpune et simpliciter pertranssire, ne alii ab eo exemplati ad similia perpetranda se apponere presumpmant, ymmo ipsius pena quoslibet alios a tanta telneraria presumptione terreat et obstupescat, nam, si unius excessus diligenter corrigitur, ceteris delinquendi causa reservatur, eundem Petrum de Zemere in facto potentie, ex eoque in sententia capitali et amissione universarum possessionum et portionum possessionariarum, necnon bonorum et rerum suarum quarumlibet ubique inter limites huius regni Hungarie existentium, ipsumque proprie contingentium, in duabus partibus nostris iudiciariis et in tertia parte partis adverse manibus devolvendarum et redundandorem (!) decrevimus et comnittimus convictum extitisse atque agravatum auctoritate nostra iudiciaria mediante. In cuius rei testimonium presentes eidem domino Stephano abbati concessimus litteras nostras privilegiales pendentis sigilli nostri autentici munimine roboratas. Datum in Wyssegrad, tricesimo secundo die dicti octavi diei festi Omnium Sanctorum, anno Domini Mo CCCo LXXXo secundo. [1382. dec. 9.]