Urbanus episcopus, servus servorum Dei, venerabili fratri ... episcopo Iauriensi salutem et apostolicam benedictionem. Ad audientiam nostram pervenit, quod tam dilecti filii ... abbas et conventus monasterii de Sacro Monte Pannonie, ad Romanam ecclesiam nullo medio pertinentis, ordinis Sancti Benedicti, Iauriensis diocesis, quam predecessores decimas, terras, domos, possessiones, castra, grangias, prata, piscarias, nemora, molendina, iura, iurisdictiones et quedam alia bona ipsius monasterii datis super hoc litteris, exinde confectis publicis instrumentis, interpositis iuramentis, factis renuntiationibus et penis adiectis in gravem ipsius monasterii lesionem nonnullis clericis et laicis, aliquibus eorum ad vitam, quibusdam vero ad non modicum tempus et aliis perpetuo ad firmam vel sub censu annuo concesserunt, quorum aliqui super hiis confirmationis litteras in forma communi a sede apostolica impetrasse dicuntur. Quia vero nostra interest super hoc de oportuno remedio providere, fraternitati tue per apostolica scripta mandamus, quatinus ea, que de bonis ipsius monasterii per concessiones huiusmodi alienata inveneris illicite vel distracta, non obstantibus litteris, instrumentis, iuramentis, penis, renuntiationibus et confirmationibus supradictis, ad ius et proprietatem eiusdem monasterii legitime revocare procures, contradictores per censuram ecclesiasticam appellatione postposita compescendo; testes autem, qui fuerint nominati, si se gratia, odio vel timore subtraxerint, censura simili appellatione cessante compelles veritati testimonium perhibere. Datum Perusii, VI. Kal. Marcii, pontificatus nostri anno decimo. [1388. febr. 14.]