In nomine Domini Amen. Anno nativitatis eiusdem millesimo trecentesimo octogesimo octavo, indictione undecima, pontificatus sanctissimi in Christo patris et domini domini Urbani, divina providentia pape sexti anno decimo, die vero prima, videlicet in Kalendis mensis Ianuarii, [1388. jan. 2.] hora vel quasi vesperorum (!) in porticu ecclesie Beati Mychaelis archangeli kathedralis Wesprimiensis in mei notarii publici et testium subscriptorum presentia personaliter constitutus honorabilis et discretus vir dominus Emericus, plebanus seu rector ecclesie parrochialis de Wasyan, capellanus et procurator quantum ad infrascripta venerabilis et religiosi viri domini fratris Stephani abbatis et conventus monasterii Sancti Martini de Sacro Monte Pannonie, ordinis Sancti Benedicti, Iauriensis dyocesis, viceque et nominibus ac in personis quorum supra publica voce extitit protestatus in hunc modum: quod, cum secundum diffinitionem sanctissime recordationis Innocentii pape tertii prefatus dominus Stephanus abbas, eiusque conventus memoratus singulis annis in Kalendis Ianuarii de bonis pretacti monasterii Pannoniensis decem marcas Wesprimiensi episcopo, nunc vero per consequens domino Ladizlao, preposito prefate ecclesie Wesprimiensis, pro quarta fabrice et procuratoribus solvere debuissent, ipso deniquo termino, quo supra, solutionis instante prenominatus dominus Stephanus abbas et suus conventus die et termino solutionis, quibus supra, prefato domino Ladizlao preposito in prescripta ecclesia Wesprimiensi decem marcas Symigienses, velud (!) etiam alii predecessores preallegati monasterii Pannoniensis abbates hucusque solvissent, per manus eiusdem domini Emerici plebani coram me notario infrascripto persolvisset suo modo, ut debuisset; quas quidem decem marcas Symigienses per manus magistri Iohannis, canonici dicte ecclesie Wesprimiensis et notarii similiter publici per prefatum dominum Ladizlaum prepositum de capitulo eiusdem ecclesie ad hoc specialiter rogati et assignati in quadam vemali domo seu stuba episcopali iuxta prefatam ecclesiam Wesprimiensem habita in die solutionis, quo supra, ego notarius infrascriptus profiteor fide vidisse oculata iuste et legittime numerari dicto domino preposito assignandas; super qua tandem solutione annua, modo et forma quibus supra prehabita, prenotatus dominus Ladizlaus prepositus litteras exinde oportunas, quodam adinvento ficto colore, prefatis domino abbati et conventui eodem domino Emerico plebano et procuratore ad hoc legittimo sepe sepius ac instantissime, vice et nominibus quorum supra postulante, quitatorias dare in eorum preiudicium dissimulasset et omnino recusasset; insuper prefatus procurator memoratorum domini abbatis et conventus ac monasterii protestando retulisset, quod episcopus sepedicte ecclesie Wesprimiensis non solum iustitiam de suis parrochianis requisitus facere minime curasset, verum etiam decimas prememorati monasterii Pannoniensis per suos parrochianos, tam sacerdotes, quam seculares, in Symigiensi comitatu existentes contra plurima aperta mandata adeo invasisset, ut fere a viginti quatuor annis citra singulis annis sexingentorum florenorum dampna ipsi monasterio Pannoniensi intulisset in preiudicium quorum supra et derogamen valde magnum. Super quibus premissis prefatus procurator ipsorum domini abbatis et conventus a me, notario infrascripto predictis, quibus supra, petiit publicum confici instrumentum; quod feci ex officio mei tabellionatus. Acta sunt hec et facta anno, indictione, pontificatu, die, mense, hora et loco quibus supra, presentibus ibidem honorabilibus et discretis viris dominis Andrea, archidiacono Segwsdiensi, canonico et vicario Wesprimiensi, Iohanne preposito de Wrs, aliisque quam pluribus dominis et canonicis eiusdem ecclesie Wesprimiensis tunc in unum capitulariter congregatis et ad premissa tunc specialiter vocatis testibus pariter et rogatis.||
Et ego Iohannes Nicolai de Saagh, clericus Iauriensis dyocesis, publicus imperiali auctoritate notarius, premissis protestationibus ac solutioni decem marcarum Symigiensium ac deinde littere exinde quitationis dandi recusatione (!) ac aliis omnibus ei singulis, dum sic, ut premittitur, per annotatum dominum Emericum plebanum et procuratorem agerentur et fierent, una cum prenotatis testibus presens interfui, eaque sic fieri vidi et audivi, propriaque manu conscribendo in hanc publicam formam redegi, meque hic signo et nomine meis consuetis consignando subscripsi, requisitus et rogatus in testimonium omnium et singulorum premissorum.