Serenissimo principi et domino ipsorum domino Sigismundo, Dei gratia Hungarorum regi illustri, capitulum ecclesie Iauriensis orationes in Domino. Sane litteras vestre serenitatis secreto vestro sigillo consignatas debita cum reverentia recepimus in hec verba:||
Sigismundus, Dei gratia rex Hungarie, Dalmatie, Croatie etc., marchioque Brandenburgensis etc., sacri Romani imperii vicarius generalis et regni Bohemie gubernator, fidelibus suis capitulo ecclesie Iauriensis salutem et gratiam. Dicitur nobis in persona religiosi viri domini fratris Dosa, abbatis de Sancto Martino Sacri Montis Panonie, quomodo ipse in dominium cuiusdam possessionis Gyodzentpetur vocate in comitatu Iauriensi habite, ut fertur, destitute, ipsum et ecclesiam suam titulo testamentarie dispositionis concernentis, legittime vellet introire, si contradictio cuiuspiam ei non obviaret in hac parte. Super quo fidelitati vestre firmiter precipiendo mandamus, quatenus vestrum mittatis hominem pro testimonio fide dignum, quo presente Stephanus de Gug vel Demetrius aut Petrus de Verkeen sive Georgius, filius Pauli, de Nema, aliis absentibus homo noster ad faciem predicte possessionis Gyodzentpetur vocate vicinis et conmetaneis eiusdem universis inibi legittime convocatis et presentibus accedendo introducat prefatum dominum abbatem in dominium eiusdem, statuatque eandem eidem et ecclesie sue predicte iure sibi incumbenti perpetuo possidendam, si non fuerit contradictum. Contradictores vero, si qui fuerint, citat ipsos contra memoratum dominum abbatem nostram in presentiam ad terminum conpetentem rationem contradictionis eorum reddituros efficacem. Et post hec seriem ipsius statutionis cum nominibus contradictorum et citatorum, si qui fuerint, terminoque assignato nobis fideliter rescribatis. Datum Posonii, feria quinta proxima post octavum diem festi Resurrectionis Domini, anno eiusdem millesimo quadringentesimo quarto. [1404. ápr. 10.]||
Nos igitur preceptis vestre serenitatis obtemperantes, ut tenemur, cum supradicto Petro de Verkeen, homine vestro regio, nostrum hominem, Stephanum, videlicet artium liberalium bacalaureum, chori ecclesie nostre clericum, ad premissa peragenda direximus pro testimonio fide dignum. Qui tandem ad nos regressi conformiter nobis retulerunt, quod idem homo vester presente ipso nostro testimonio in festo Beati Urbani pape et martiris proxime preterito [1404. máj. 25.] ad faciem supradicte possessionis Gyodizenthpeetur vocate, in comitatu Iauriensi existentis, vicinis et conmetaneis eiusdem universis legitime convocatis et presentibus accedendo, introduxisset eundem dominum abbatem in dominium eiusdem possessionis, statuissetque eandem sibi et dicte ecclesie sue Sancti Martini cum ecclesia lapidea et ceteris utilitatibus et pertinentiis ipsius possessionis eo iure, quo ad eosdem pertinere dinosceretur, perpetuo possidendam, nullo penitus contradictore apparente. Presentes autem pro perpetua rei memoria sub sigillo nostro pendenti vestre celsitudini duximus transmittendas. Datum post quintumdecimum diem diei statutionis prenotate, anno quo supra, die sabbati definita huius emanationis existente. [1404. jún. 8.]