Nos conventus monasterii Sancti Egidii de Simigio memorie commendamus, quod religioso viro frater Petro, monacho monasterii Sancti Martini de Sacro Monte Pannonie pro venerabili in Christo patre, domino Iohanne, episcopo Wladizlawiensi, duce Opulie et gubernatore abbacie predicti monasterii Sancti Martini Sacri Montis Pannonie ac conventus loci eiusdem cum procuratoris literis eorundem ab una, parte vero ab alia Dominico, filio Iacobi de Kuthus, pro se personaliter ac pro Gregorio, filio Dyonisii de eadem, frater suo patrueli, cum procuratoriis litteris nostris coram nobis constitutis, per eundem fratrem Petrum in personis et nominibus domini gubernatoris et conventus pretactorum confessum extitit instrumento vive vocis et relatum in hunc modum, quod prefati Dominicus et Gregorius de omnibus et singulis solucionibus annuis, in quibus ipsi memoratis domino gubernatori suoque conventui pretextu fewdalis conservacionis possessionarie porcionis monasterio antedicto in prescripta possessione Kuthus existentis et habite, similiter Kuthus alio nomine Apaty nuncupate, debitores fuissent, necnon de cunctis iudiciorum gravaminibus, in quibus contra gubernatorem et conventum supradictos convicti hactenus extitissent, penitus et in toto satisfecissent eisdem. Super quibus idem frater Petrus auctoritate procuratoria prenotata ipsos Dominicum et Gregorium coram nobis reddidit perpetuo expeditos. Insuper quoque eadem procuratoria potestate predictam possessionariam porcionem dicti monasterii prefatis Dominico et Gregorio, ipso Dominico suo et nomine quo supra benevole recipiente et acceptante, coram nobis assignavit et tradidit, coram nobis assignavit, tradidit et commisit ex tunc et deinceps feudaliter cum suis omnibus utilitatibus et pertinenciis possidendam pariter et habendam sub tali condicionis moderamine, quod dicti Dominicus et Gregorius, quamdiu eandem porcionem possessionariam conservarent, singulis annis in festo Beati Egidii abbatis et confessoris ducentos denarios in regno pro tempore currentes vel valorem congruum eorundem in manibus nostris deponere et tradere tenerentur prescriptis domino gubernatori et conventui persolvendos, literas nostras exinde expeditorias recepturi sub pena dupli pretaxate pecunie incurrenda, si quo termino solucionem vel deposicionem eiusdem facere negligerent plenarie vel different, prout idem Dominicus se, ut predicitur, personaliter, annotatum vero Gregorium virtute prescriptarum literarum procuratoriarum ad premissa firmiter obligavit. Datum feria sexta proxima post festum Beatorum Viti et Modesti martyrum, anno Domini MCCCCIX. [1409. jún. 21.]