Sigismundus, Dei gratia rex Hungarie, Dalmatie, Croatie etc., marchioque Brandenburgensis etc. sacri Romani imperii vicarius generalis et regni Bohemie gubernator, fideli suo Ladizlao dicto de Erdel, castellano castri de Ugod, salutem et gratiam. Gravis querela religiosi viri domini fratris Martini, abbatis monasterii de Beel, nostre detexit maiestati, quomodo vos noviter hiis diebus preteritis octo boves iobagionum suorum in possessione Koppan conmorantium nullis eorum demeritis ad simplicem querimoniam seu favorem Petri de Repas, Mauritii et Georgii de eadem auferri et abigi fecissetis; preterea missis tandem Iohanne vicecastellano ac populis et iobagionibus in possessione Thezer appellata residentibus ad aliam possessionem prefati domini abbatis Kayar nominatam, quendam iobagionem eiusdem domini abbatis, videlicet Iohannem filium Dominici, ex parte cuius pro tunc dicto Petro de Repas iustitiam, vobis scilicet presente, iuxta consuetudinem et libertatem dicte possessionis Kayar facere et exhibere habuisset, non habita licentia, nec iusto terragio deposito et aliis eius debitis persolutis contra consuetudinem regni nostri approbatam ad eandem possessionem Thezer deduci fecissetis; imo, quod maius foret, annotatum dominum Martinum abbatem, suosque populos et iobagiones contra antiquam libertatem et prerogativam ipsius ecclesie sue vestro astare iudicio et iudicatui conpelleretis et nitemini, aliaque dampna et nocumenta sibi et dictis suis populis, plerumque inferri facere consuevissetis propria vestra temeritate vi mediante. Et quia ipse dominus Martinus abbas una cum dicto suo monasterio sub nostra perhibetur tutela speciali fore constitutus, ipsumque ob hoc in suis et dicte sue ecclesie antiquis libertatibus, prerogativis illibate potiri [veli]mus, nequaquam huiusmodi actus nepharios et potentiarios ipsi domino abbati, dictisque populis ecclesie sue per vos aut per quempiam inferri et inrogari facere velimus, fidelitati igitur vestre firmissimo damus regio sub edicto, quatenus mox habitis presentibus, rebusque sic se habentibus prenotatum Iohannem iobagionem iam dicti domini abbatis una cum suis rebus et bonis ipsi domino abbati seu ad dictam suam possessionem remittere, restaurare, relaxare [et] alia per vos conmissa facta illicita reformare debeatis contuetudine regni nostri, communique iustitia requirente. Volumus enim nichilominus, ut de ulteriori illegitima molestia et pertractione violenta ipsi domino abbati suisque populis inferenda vos et ad vos pertinentes minime admittatis, ne idem dominus abbas de cetero nostre super inde cogatur querulari maiestati. Que si feceritis, bene quidem; alioquin, si secus feceritis in premissis, quod non credimus. Presentes reddi iubemur presentanti. Alias tandem conmisimus et presentium serie conmittimus fideli nostro comiti Vesprimiensi aut suis vicecomitibus, ut ipsi auctoritate regia presentibus ipsis in hac parte attributa mediante vos ad premissa facienda acrius conpellant et astringent iustitia mediante. Aliud igitur pro nostra gratia secus facere non ausuri in premissis; presentes semper post lecturam reddi iubemus presentanti. Datum Bude, die dominico proximo post festum Beati Barnabe apostoli, anno Domini millesimo quadringentesimo decimo. [1410. jún. 15.]