Sigismundus, Dei gratia rex Hungarie, Dalmatie, Croatie, marchioque Brandenburgensis etc., sacri Romani imperii vicarius generalis et regni Bohemie gubernator, fideli suo Georgio, castellano, de Chesnek, salutem et gratiam. Noveritis, quod religiosus vir dominus frater Martinus, abbas de Beel, gravi cum querela exposuit maiestati, quomodo hiis diebus proxime preteritis missis hominibus et familiaribus vestris ad possessionem ipsius abbatis Kayar vocatam decem et septem boves iobagionum suorum in eadem residentium auferri et depelli fecissetis et tamdiu conservassetis, donec ab eisdem iobagionibus suis novem marcas denariorum nove monete pactando extorxissetis (!), imo adhuc de presenti duos boves ex predictis bobus erga vestras manus haberetis et conservaretis et insuper Dei timore penitus postposito per homines ad vos pertinentes et singulariter custodes silve Bakon appellate plerumque in possessionibus dicti domini abbatis et dicte sue ecclesie tributa, victualia et inconsueta extorqueri et alia quam plurima dampna et nocumenta perpetrari faceretis et ultra hoc prefatum dominum abbatem atque populos dicte sue ecclesie contra antiquas libertates et prerogativas iam dicti monasterii sui vestro astare iudicio et iudicatui conpelleretis et niteremini temeritate vestra et vi mediante. Et quia ipse dominus Martinus abbas una cum dicto suo monasterio sub nostra perhibetur tutela speciali fore constitutus, ipsumque ob hec suis et dicte sue ecclesie antiquis libertatibus, prerogativis illibate potiri volumus, nequaquam huiusmodi actus nefarios et potentiarios ipsi domino abbati, dictisque suis populis ecclesie sue per vos aut per quempiam inferri et derogari facere velimus. Fidelitati igitur vestre firmissimo damus regio sub edicto, quatenus mox habitis presentibus rebus sic se habentibus prefato domino abbati premissa bona per vos, ut prefertur, modo prehabito ablate indempniter et efficaciter reddi et restui (!) faciatis et alia per vos conmissa facta illicita et indebita restaurare et meliorare debeatis conmuni iustitia regni nostri requirente. Nichilominus volumus, ut de ulteriori illegitima molestia et perturbatione violenta ipsi domini abbato, suisque populis inferenda vos et ad vos pertinentes admittere non debeatis, ne idem dominus abbas de cetero nostri superinde cogatur querulari maiestati. Que si feceritis bene quidem; alioquin, si secus feceritis in premissis, quod non credimus. Presentes reddi iubemus presentanti; aliud igitur pro nostra gratia non ausuri in premissis. Datum Bude die dominica proxima post festum Beati Barnabe apostoli, anno Domini millesimo quadringentesimo decimo. [1410. jún. 15.]