Amicis suis reverendis, capitulo ecclesie Wesprimiensis Nicolaus de Gara, regni Hungarie palatinus et iudex Comanorum amiciciam paratam cum honore. Noveritis, quod dominus frater Petrus prepositus ecclesie Sancti Martini de Sacro Monte Pannonie pro conventu loci eiusdem cum procuratoriis literis eiusdem conventus iuxta continenciam literarum nostrarum priorum in octavis festi Beati Michaelis archangeli [1410. okt. 6.] in figura nostri iudicii comparendo, contra capitulum ecclesie Iauriensis quasdam literas conventus ecclesie de Chorna inquisitorias, nobis ad regium literatorium mandatum rescriptas, tenoremque literarum regalium ipsi conventui directarum verbaliter in se habentes, asserens accionem et propositionem dicti conventus literis contineri in eisdem, nobis presentavit declarantes, quod regius et ipsius conventus homines literis in eisdem nominati ad regiumque literatorium mandatum transmissi in comitatu Iauriensi simul procedendo ab omnibus, quibus decuisset, talem scivissent veritatem, quod lite pendente olim inter abbatem dicte ecclesie Sancti Martini et ipsum capitulum ecclesie Iauriensis super quadam possessione Abda vocata in comitatu Iauriensi ac quadam insula iuxta flumen Rapche sita, medietatem ipsius possessionis seu insule Abda vocatarum, a parte aquillonari existentem, dictum capitulum mediante disposicione iuramentali sibi vindicasset et apropriasset, altera medietate eiusdem possessionis seu insule Abda, existenti a parte meridiei, dictis abbati et conventui remanente. A tempore autem pendencie dicte litis ipsum capitulum non solum prescriptam medietatem ipsi vindicatam, sed eciam annotatam aliam medietatem dictarum possessionis et insule totaliter possedisset, fructus et utilitates eiusdem percipiendo usque modo.||
Dehinc prefatus procurator dicti conventus duas literas vestras domino Nicolao, filio Gelety, olim similiter regni Hungarie palatino relatorie rescriptas, primam earum in festo Beati Benedicti confessoris anno Domini millesimo trecentesimo quinquagesimo secundo [1352. márc. 21.] et alteram in dominica Iudica post festum Ascensionis Domini anno eiusdem millesimo trecentesimo quinquagesimo tercio [1353. márc. 10.] subortas nobis presentavit continentes, quomodo palatinales homines vestraque testimonia literis in eisdem conscripti pro ambabus partibus deputati presentibus procuratoribus ipsarum ad faciam eiusdem insule Abda accessissent ibidemque iuxta tenorem privilegii domini Bele regis Hungarie per magistrum Blasium canonicum et legitimum procuratorem dicti capituli Iauriensis exhibiti eandem pergirantes metali reambulassent termino. Quod incepissent in rippa (!) Danubii, ubi primam metam pro dimitietate eiusdem insule pro parte eiusdem capituli Iauriensis distinguentem idem procurator capituli Iauriensis iuxta eorum privilegii tenorem et ostensionem dixisset, ubi anteriori processu meta fuisset posita pro capitulo Iauriensi prenotato. Abhinc versus partem meridionalem procedendo iuxta declaracionem ostensivam eiusdem privilegii ivissent, ubi unam stirpem arboris piri, que ob temporis longitudinem vetusta corruisset et tunc rami seu virge tenelule de radice eiusdem piri exurgentes fuissent, ubi unica meta in primo processu erecta extitisset et abhinc per eandem plagam ad unam novam metam iuxta veterem positam semper iuxta denotacionem predicti privilegii pervenissent, deinde ad quandam vallem, ubi aliqui meatus aque fuissent cursualis, devenissent, ubi una meta fuisset antiqua apparenter, circa quam similiter una nova meta in primo processu fuisset erecta. Dehinc modicum procedendo versus eandem plagam meridionalem pervenissent ad quendam locum, ubi prius eadem villa Abda situata extitisset, ut dixissent, ubi eciam una arbor piri, que tunc in medio eiusdem ville Abda, dum ipsa villa fuisset ibi firmata, extitisset, devenissent. Deinde quoddam diverticulum faciendo ad partem occidentalem ad rippam Danubii processissent et ibi predicta medietas insule dicti capituli Iauriensis per metarum cursus predictarum distingueretur et segregata ab alia medietate extitisset. Post hec autem domini de eodem capitulo cum coniuratoribus eorum in numero triginta distributi et sine cingulis, ut moris esset iuxta regni consuetudinem iurare super terram, in loco iuramenti scilicet in una ipsarum metarum assistentes super eo, ut ipse mete reambulate et erecte medietatem ipsius insule Abda vocate distinguentes privilegio domini Bele regis contente et per procuratorem ipsius capituli Iauriensis prius ostense et erecte vere mete essem et ipsam medietatem insule pro dicto capitulo Iauriensi distinguentes existerent, prestitissent sacramentum.||
Adhuc idem procurator ipsius conventus literas capituli Albensis octavo die festi Pasche Domini, anno eiusdem MCCCXCVI. [1396. ápr. 9.] patenter confectas nobis presentavit continentes, quod religiosus vir frater Petrus celerarius dicte ecclesie Sancti Martini suo et tocius conventus eiusdem monasterii nominibus ad ipsius capituli accedens presenciam, dictum capitulum Iauriense a potenciaria et illegitima occupacione et detencione porcionis possessionarie dicti conventus in possessione Abda vocata habite facta vel facienda prohibuisset.||
Quibus quidem literis exhibitis prefatus procurator dicti conventus eidem ex parte memorati capituli Iauriensis super premissis iuris equitatem petivit impertiri.||
Quo audito dominus Ladislaus, archidiaconus Iauriensis pro eodem capitulo Iauriensi cum procuratoriis literis eiusdem capituli in nostram exurgendo presenciam respondit tali modo, quod idem capitulum Iauriense prescriptam medietatem ipsius insule Abda et per consequens ville, porcionem videlicet ipsius conventus non occupasset, nec occupatam detineret, sed idem capitulum porcionem eidem pertinentem conservaret.||
Unde quia ex seriebus prescriptarum duarum literarum relatoriarum medietas dicte insule Abda ad prefatum capitulum Iauriense et alia medietas ipsius ad iam tactum conventum Sancti Martini per distinccionem et separacionem prescriptarum metarum et cursus earum in separacionibus seriose insertarum per procuratorem annotati capituli demonstratarum et per prescriptam iuramentalem deposicionem pro distinccione ipsius medietatis ab alia sui parte factam certificatarum pertinuisse et pertinere debere adinveniebatur et ob hoc prescripta medietas insule Abda antedicte per distinccionem metarum earundem dicto conventui restitui debebat, pro eo vestram amicitiam presentibus petimus diligenter, quatenus vestros mittatis homines, pro partibus pro testimonio fide dignos, quibus presentibus magister Bla[sius de Gench] cum vestro homine octavo die diei quindenarum festi Beati Georgii martyris nunc venturi [1411. máj. 15.] et aliis diebus ad id aptis et sufficientibus ad facies dictarum possessionis Abda et insule et per consequens medietatis earundem portionis videlicet dicti conventus vicinis et conmetaneis ipsarum universis inibi legitime convocatis et partibus vel earum legitimis procuratoribus presentibus accedendo eandem insulam iuxta demonstrationem procuratoris dicti conventus per predictas metas et cursus metales in separacionibus seriose conscriptas in prima ipsarum metarum incipiendo atque ad finalem seu ultimam metam variacione sine omni reambulet et his habitis, iam dictam medietatem ipsius insule Abda contradiccione ipsius capituli, si per alios non fuerit contradictum, non obstante, restatuat conventui Sancti Martini antedicto, contradictores vero, si qui ibi apparuerint, evocet eosdem contra ipsum conventum ad octavas Nativitatis Beati Iohannis Baptiste nunc venturas nostram in presenciam racionem contradiccionis eorum reddituros. Et post hec ipsius possessionarie restitucionis seriem cum nominibus contradictorum et evocatorum, si qui apparuerint, ad easdem octavas nobis amicabiliter rescribatis. Datum Bude, tricesimo octavo die octavarum festi Beati Michaelis archangeli predictarum, anno Domini MCCCCX. [1410. nov. 12.]||
Hátirata: Amicis suis reverendis capitulo ecclesie Wesprimiensis pro conventu Sancti Martini Sacri Montis Pannonie contra honorabile capitulum ecclesie Iauriensis super quadam possessionaria restitutione per nostrum et vestrum homines octavo die diei quindenarum festi Beati Georgii martyris modo intrascripto fienda et ad octavas festi Nativitatis Beati Iohannis Baptiste ad iudicem.