Sigismundus, Dei gratia Romanorum semper augustus ac Hungarie, Dalmatie, Croatie etc. rex, marchioque Brandenburgensis etc. fidelibus suis conventui ecclesie Sancti Martini Sacri Montis Pannonie salutem et gratiam. Noveritis, quod, cum ob contradictoriam inhibitionem reambulationis metarumque erectionis et renovationis cuiusdam portionis possessionarie Kethelaka alio nomine Bernald vocate religiosus vir dominus frater Martinus, abbas ecclesie de Beel, Nicolaum, filium Ladislai, de Deem modum et formam legitime evocationis observando contra se ad certum terminum nostram specialem in presentiam in causam atraxisset, ipsaque causa ab ipso termino serie litterarum nostrarum prorogatoriarum de ipsarum partium voto ad presentes octavas festi Beati Iacobi apostoli [1411. aug. 1.] dilatata extitisset, tandem ipsis octavis instantibus Stephanus, filius Thome, pro prefato domino fratre Martino abbate cum procuratoriis litteris vestris ad nostram specialem veniendo presentiam pro rectificatione metarum dicte possessionis Kethelaka per prefatum dominum abbatem reambulate, quasdam litteras vestras pivilegiales sabbato proxinio post festum Assumptionis Virginis gloriose anno Domini millesimo trecentesimo vigesimo secundo [1322. aug. 21.] emanatas, habentes in se seriem et continentiam quarumdam litterarum privilegialium olim domini Bele regis felicis memorie in Fizeghthu in dominica Iudica anno Domino millesimo ducentesimo septuagesimo [1270. márc. 30.] confectarum, continentium in se quandam clausulam metas dicte possessionis Kethelaka denotantem, per condam magistrum Myke, cantorem Albensis ecclesie, ob mandatum dicti domini Bele regis litteratorium in litteris Sancti Ladislai regis repertam nobis demonstravit. Cuius quidem clausule series est talis:||
Quintum predium, quod Kethelaka dicitur, incipit terminari de vulpinis foveis, que mittunt ad cumulum cespitum, de quo dirigitur ad spineum virgultum, quod dicitur gymelchenbokor. Inde tenditur ad angulum monumenti, a quo parum protelatur per campum et cadit ad angulum atterius monumenti. Inde recipit via publica, que per circuitum gyrando reducit ad priorem locum, sicque terminatur.||
Quibus presentatis prefatus procurator dicti domini abbatis rationem premisse contradictorie inhibitionis assignare postulavit per Nicolaum, filium Ladislai, supradictum coram nobis.||
Quo percepto idem Nicolaus personaliter in nostram specialem exurgendo presentiam respondit ex adverso, quod ipse tempore premisse possessionarie reambulationis pro eo contradictionem fecisset prenotatam, quia prefatus dominus Martinus abbas per prescriptam suam possessionariam reambulationem magnam particulam terre sue de dicta possessione sua Deem ad dictam terram Kethelaka aplicare et anectere voluisset. Et quia idem Nicolaus super prescripta possessione Deem ad nostram iudiciariam requisitiones litteralia instrumenta metalia minime habere referebat, nosque absque reambutatione et revisione metarum dictarum possessionum partium prescriptarum in eisdem iudicium congruens facere non poteramus et ad eam faciendam noster et vestri homines necessario transmitti debere videbantur: pro eo fidelitati vestre firmiter precipiendo mandamus, quatenus vestros mittatis homines pro utrisque partibus pro testimoniis fide dignos, quibus presentibus Sigismundus de Menzent vel Petrus de villa Ech aut Ladislaus de Maglad sive Michael de Tur sive Iohannes de Varya, aliis absentibus homo noster, per nos ad id specialiter transmissus in octavis festi Beati Michaelis archangeli nunc venturis [1411. okt. 6.] et aliis diebus ad id aptis et sufficientibus ad facies prescriptarum possessionum Kethelaka et Deem vocatarum vicinis earumdem universis inibi legitime convocatis et dictis partibus vel earum legitimis procuratoribus presentibus accedendo, primo prescriptam possessionem Kethelaka, secundum demonstrationem dicti domini abbatis vel legitimi sui procuratoris, semper ad illas plagas et loca, ad quas videlicet et que cursus dictarum metarum in prescripta clausula contentarum procedere demonstrat tendendo, undique reambulet et signis metalibus consignet; demum vero pretaxatam possessionem Deem secundum demonstrationem anotati Nicolai filii Ladislai, vel legitimi sui procuratoris similiter undique reambulet et signis metalibus consignet. Et si ipse partes in huiusmodi eorum possessionum reambulationibus concordes fuerint et sibi invicem non contradixerint, extunc prescriptis metis et signis metalibus ibidem apparentibus veteribus abroggatis et annulatis (!), cuilibet parti suum ius possessionarium prescriptis metis a sese separatum et distinctum statuat et committat perpetuo possidendum. Partibus autem discordatitibus et sibi invicem contradicentibus particulam, seu terrarum particulas post ipsarum partium demonstrationes in lite remanentem seu remanentes visa undique qualitate, quantitate, fructuositate et valore eiusdem vel earundem una cum aliis populis et nobilibus viris estimet eandam vel easdem, condigno eiusdem vel earundem pretio et valore lege regni nostri requirente. Ibidem etiam id, que ipsarum partium in dicta sua reambulatione veriores et apparentiores metas ostendent et que ipsarum in dominio dicte terre litiogiose sit et existat, videat, conspiciat et diligenter intueatur. Et post hec ipsarum possessionarie reambulationis, estimationis et revisionis series cum cursibus metarum inibi exigendarum ad anotatum diem dictarum octavarum nostre speciali fideliter rescribatis maiestati. Presens autem propter absentiam venerabilis patris domini Eberhardi, episcopi ecclesie Zagrabiensis, aule nostri cancellarii et sigillorum nostrorum erga ipsum habitorum, sigillo eiusdem fecimus consignari. Datum in Pest, tricesimo sexto die termini prenotati, anno Domini millesimo quadringentesimo undecimo. [1411. szept. 5.]