Relatio Stiborii vayvodi Transilvanensis.||
Sigismundus Dei gratia Romanorum rex semper augustus ac Hungarie etc. rex fidelibus suis iudici et iuratis civibus civitatis Budensis salutem et gratiam. Conqueritur maiestati nostre fidelis noster dominus reverendissimus in Christo pater dominus Andreas, archiepiscopus Spalatensis, gubernator et commendator abbatie de Beel, quomodo nuper mortuo domino Martino, abbate de eadem Beel, Iohannes dictus Engy hospes domus eiusdem abbatie in suburbio Budensi existens et Petrus Choky, nonnullique alii cives et hospites Budenses cum Iohanne, custode de Batha, ad domum abbatie predictam in dicto suburbio situatam fractis cardinibus, hostiis et seris ac muris dicte domus in nocte subintrando litteralia instrumenta, tezaurum et omnia alia bona eiusdem abbatis et abbatum in eadem domo reperta exportassent, diripuissent et pro ipsorum voluntate dissipassent in grande dampnum et derogamen abbatie predicte. Super quo fidelitati vestre firmiter precipiendo mandamus, quatenus receptis presentibus domino archiepiscopi et supradicte abbitie ex parte dictorum Iohannis Engii et Petri Choky, aliorumque omnium civium et hospitum Budensium in premissis culpabilium super omnibus hiis iuxta probationem et legitimas demonstrationes eiusdem domini archiepiscopi omnimode iustitie conplementum impendere et exhibere debeatis iuris ordine observato; secus non facturi. Presentes autem sigillo nostro maiori, quo ut rex Hungarie utimur, fecimus consignari, quas post earum lecturam semper reddi edicimus presentanti. Datum in Vysegrad, feria quinta proxima post festum Sancti Martini confessoris, anno Domini millesimo quadringentesimo undecimo, regnorum autem nostrorum anno Hungarie etc. vigesimo quarto, Romanorum vero secundo. [1411. nov. 12.]