Conventus Beati Michaelis archangeli de Chorna omnibus christifidelibus presentibus pariter et futuris presencium noticiam habituris salutem in omnium Salvatore. Ad universorum noticiam tam presencium, quam futurorum harum serie volumus pervenire, quod nos literas serenissimi principis domini Sigismundi, Dei gracia Romanorum regis semper augusti ac Hungarie etc. regis domini nostri graciosissimi nobis directas suprema cum obediencia recepimus in hec verba:||
Sigismundus, Dei gracia Romanorum rex semper augustus ac Hungarie etc. rex, fidelibus suis, conventui de Chorna salutem et graciam. Dicit nobis reverendus in Christo pater dominus Iohannes, episcopus Wladislaviensis, gubernator abbacie monasterii Sancti Martini Sacri Montis Pannonie sua ac conventus loci eiusdem in personis, quod quamvis secundum seriem et continenciam literarum sentencionalium palatinalium magister Blasius de Gench, curie palatinalis notarius, una cum magistro Thoma, Affia dicto, canonico ecclesie Wesprimiensis eiusdem capituli ecclesie Wesprimiensis testimonio ad amicabilem peticionem palatinalem transmisso medietatem quarundam insule et ville Abda vocate in comitatu Iauriensi existencium cum omnibus suis pertinenciis et utilitatibus octavo die quindenarum festi Beati Georgii martyris proxime preteriti [1411. máj. 15.] presentibus vicinis et cometaneis dictarum insule et ville, precipue Stephano dicto Belger de Mendzenth, Barthlomeo de Nema, Thoma, filio Simonis de Alap, Michaele et Iohanne, filiis Iacobi de Nema in Vagkuz, necnon religioso viro domino fratre Symone, abbate de Lyben, Thoma de Vytez ac aliis nobilibus ipsis domino episcopo et conventui legitime statuerit et secundum seriem huiusmodi statucionis coram capitulo ecclesie Vesprimiensis more in talibus observari solito debitam fassionem fecerit et formam ipsius statucionis in scriptis dicto capitulo assignaverit, tamen dictum capitulum ecclesie Vesprimiensis in facto premisso insule et ville statucionis ob favorem capituli ecclesie Iauriensis, a quo sciIicet capitulo secundum seriem literarum sentencionalium, ut puta palatinalium predictarum iuridice obtinuissent dicti episcopus et conventus, ad instanciam dictarum ecclesiarum Iauriensis et Vesprimiensis quorundam canonicorum non secundum dicti magistri Blasii, una cum prefato magistro Thoma Affia dicto socio et concanonico ipsorum fassionem, sed perverso modo et sinistro ordine literas statucionales pro parte dictorum episcopi et conventus confectas assignasset, imo quod deterius est, prepositus et capitulum predictum ecclesie Iauriensis tales literas inquisicionales et evocatorias contra ipsos episcopum et conventum fieri procurassent, ut quasi ipsi premissam medietatem dictarum insule et ville non legitime et iuridice, sed potencialiter et manu violenti occupassent et sibi ipsis appropriassent. Quare fidelitati vestre firmissime precipimus et omnino volentes mandamus, quatenus vestrum mittatis hominem pro testimonio fide dignum, quo presente Georgius, filius Dominici de Nema vel Georgius, filius Pauli de eadem aut Stephanus seu Andreas de Gwgh aliis absentibus homo noster ad prefatos magistrum Blasium de Gench nec non Stephanum Belger, Bartholomeum, Thomam, Michaelem, Iohannem et Symonem abbatem accedendo ab eis in eo, utrum predictum capitulum ecclesie Vesprimiensis secundum premissam fassionem dicti magistri Blasii una cum prefato magistro Thoma in presencia ipsorum factam in facto statucionis medietatem premissarum insule et ville Abda dictis episcopo et conventui literas ipsorum statucionales assignaverint, an ne ? ad fidem coram Deo debitam fidelitatemque nobis et sacro nostro diademati observandam sciat et experiatur omnimodam certitudinis veritatem, et si iuxta huiusmodi inquisicionem seu eorundem assercionem literas ipsorum statucionales in facto statucionis premisse non secundum fassionem dicti magistri Blasii coram ipsis factam, sed perverso ordine iidem noster et vester homines ipsis episcopo et conventui assignatam fore agnoverint, ex tunc evocet tres personas de dicto capitulo Vesprimiensi pociores contra dictos episcopum et conventum ad quintum decimum diem a notificacione presencium immediate computando personaliter et non per procuratorem ac sine crastinacione nostram personalem in presenciam, ubi Deo duce in regno nostro erimus personaliter constituti. Et post hec huiusmodi inquisicionis, assercionis et evocacionis seriem nostre maiestatis personali presencie fideliter rescribatis. Presentes autem sigillo nostro maiori, quo ut rex Hungarie utimur, fecimus consignari. Datum in Visegrad, secundo die festi Assumpcionis Virginis gloriose, anno Domini millesimo quadringentesimo undecimo. [1411. aug. 16.]||
Nos igitur mandatis ipsius domini nostri regis in omnibus obedire cupientes, ut tenemur, una cum prescripto Stephano de Gwgh homine regio nostrum hominem, videlicet religiosum virum fratrem Gregorium presbyterum unum ex nobis ad premissa peragenda transmisimus pro testimonio fide dignum, qui tandem ad nos reversi nobis uniformiter retulerunt, quod ipsi secundo die festi Beati Bartolomei apostoli proxime preterito [1411. aug. 25.] annotatos magistrum Blasium de Gench, nec non Stephanum Belger, Bartholomeum, Thomam, Michaelem, Iohannem et Simonem abbatem in unum convocari faciendo ab eisdem ad fidem eorum Deo debitam fidelitatemque vobis et vestre sacre corone observandam talem de premissis scivissent veritatem, quomodo ipse scilicet magister Blasius de Gench cum prescripto magistro Thoma dicto Affia testimonio et concanonico ipsius capituli Vesprimiensis presentibus ipsis videlicet Stephano Belger de Mendzenth, Bartholomeo de Nema, Thoma, filio Simonis de Alap, Michaele et Iohanne, filiis Iacobi de Nema in Vagkuz ac Simone abbate de Lyben aliisque vicinis et commetaneis dictarum possessionis Abda et insule illuc legitime convocatis medietates dictarum possessionis Abda et insule similiter Abda appellate ergaque manus prefati capituli Iauriensi habitarum et inventarum cum omnibus ipsarum utilitatibus et pertinenciis iuxta continenciam literarum palatinalium adiudicatoriarum contradiccione prefati capituli Iauriensis non obstante iam dicto conventui Sancti Martini statuissent, temporeque statucionis medietatum dictarum possessionis et insule in faciebus earundem in personis domini Iohannis episcopi et Galli prepositi cathedralis dicte ecclesie Iauriensis contradiccio facta extitisset, qui quidem dominus episcopus et prepositus contra ipsum conventum ad certum terminum evocari extitissent ipsumque capitulum Vesprimiense, prout ipsi percepissent, non iuxta ipsorum magistri Blasii et Thome dicti Affia fassionem in facto statucionis medietatum dictarum possessionis et insule Abda ipsi conventui Sancti Martini literas eorum emanari fecissent. Quapropter ipsi premissam evocacionem iuxta regium maiestatis mandatum pro eo facere omisissent, quia ipse conventus iam dictum capitulum Vesprimiense serie aliarum literarum regalium facto in eodem contra se ad certum terminum evocari procurassent. In cuius rei memoriam firmitatemque perpetuum presentes literas nostras privilegiales pendentis et authentici sigilli nostri munimine roboratas eidem duximus concedendas. Datum tercio die diei inquisicionis et assercionis prenotatorum. Anno domini supra dicto. [1411. aug. 27.]