In nomine Domini amen. Anno ab eiusdem nativitate MCCCCXI, indiccione quarta, pontificatus sanctissimi in Christo patris et domino nostri domini Iohannis divina providencia pape vigesimi tercii anno secundo, me notario et testibus infrascriptis constitutis in presencia reverendissimi in Christo patris et domini domini Brande, Dei et apostolice sedis gracia episcopi Placentini, sanctissimi domini nostri pape predicti referendarii ac pro ipso et sancta Romana ecclesia in regno, Hungarie in nonnullisque aliis regnis et partibus legati nuncii apostolici necnon in eisdem in spiritualibus et temporalibus ecclesiasticis reformatoris generalis etc. reverendus in Christo pater et dominus dominus Iohannes dux Opuliensis, Dei et apostolice sedis gracia episcopus Wladislauiensis ac abbacie Sancti Martini Sacri Montis Pannonie, ordinis Sancti Benedicti Iauriensis diocesis commendatarius auctoritate apostolica deputatus ex una et venerabiles patres domini Lodovicus de Tatta (!) et Andreas de Copanmonostra videlicet diocesis et eiusdem ordinis monasteriorum abbates partibus ex altera, dum in presencia prefati reverendissimi patris domini et legati nuncii apostolici ac reformatoris etc. forent personaliter constituti, predicti venerabiles patres abbates Lodovicus et Andreas volentes finem facere liti et controversie inter predictas partes coram antedicto domino legato nuncio apostolico reformatore etc. aliqualiter ventilatis de et super subieccione, quam predictus reverendus pater episcopus et commendatarius in dictos dominos Lodovicum et Andream abbates et eorundem monasteria predicta, ut sibi racione commende predicte subiectos et subiecta asserebat habuisse et habere pleno iure. Tandem prefati venerabiles patres Lodovicus et Andreas volentes omnino bonam fidem agnoscere ante predictum reverendum patrem dominum Iohannem episcopum commendatarium humiliter genuflexi dixerunt et promiserunt et ad sancta Dei evangelia manibus contacta iuraverunt eidem tanquam eorum vero capiti et domino eiusque successoribus canonice intrantibus velle subesse ac teneri ad fidelitatem, obedienciam et reverenciam sibi domino episcopo commendatario et monasterio predicto Sancti Martini perpetuis temporibus prestandam iuxta Regulam et statuta dicti ordinis; tenerique pariter ire ad vocacionem capituli generalis seque ad dicti capituli et dominorum seu patrum in dicto capitulo presidenciam quoad instruccionem, correccionem et destitucionem, si expediat, penitus submittentes. Insuper ad prefati domini episcopi et commendatarii requisicionem in signum subieccionis vere simili modo predicto iuraverunt bona immobilia et possessiones ac mobilia preciosa ad dicta monasteria seu eorum mensas quomodolibet pertinencia non vendere nec inpignorare neque donare nec aliquam quovismodo alienacionem, obligacionem seu quemvis alium contractum facere de eisdem. Promiserunt eciam sub eiusdem iuramenti prestacione non infeodare (!) de novo, antiquos census non minuere ac cetera omnia et singula, prout in constitucionibus et statutis apostolicis ordini predicto Sancti Benedicti per felices recordacionis dominum Benedictum papam XII. sub publica bulla concessis et ibi tunc presentatis et lectis in capitulo, quod incipit: Preterea ut predictis et aliis damnis etc. sub regestra de forma iuramenti a prelatis prestandi, lacius et plenius continetur. Subsequenter eciam prefatus dominus episcopus et commendatarius ad predictorum dominorum Lodovici et Andree abbatum instanciam promisit eosdem dominos Lodovicum et Andream abbates in quantum ab aliquo in iudicio ecclesiastico occasione premissorum molestarentur, vel vexarentur quovismodo defendere et defenssare (!) et pro ipsis omnimodam defensionem assumere ipsius sumptibus et expensis.||
In quorum omnium et singulorum fidem et testimonium de instancia prefatorum reverendi patris domini episcopi et commendatarii ac dominorum Lodovici et Andree abbatum predictorum ego notarius infrascriptus requisitus presens publicum instrumentum scripsi. Insuper rogatus reverendissimus dominus legatus nuncius apostolicus et reformator antedictus in fidem pleniorem omnium et singulorum predictorum presens publicum instrumentum sui sigilli pendentis iussit munimine roborari. Acta sunt hec Bude Wesprimiensis diocesis in domo et camera solite residencie reverendissimi patris et domini domini B(rande) legati nuncii apostolici et reformatoris sub anno, indiccione et pontificatu predictis, die vero decima nona mensis Iunii, presentibus discretis viris magistro Andrea Mathye de Wermencz publico imperiali auctoritate notario Olomiensis diocesis et Georgio Blasy de Basch clerico Strigoniensis diocesis ac predicti domini legati nuncii apostolici et reformatoris camerario testibus ad premissa vocatis specialiter et rogatis.||
Et ego Ziliotus Aldrouandini de Ariostis, clericus Bononiensis, publicus apostolica auctoritate notarius premissis promissionibus ac iuramentis ac omnibus aliis singulis dum sic, ut premittitur, fierent et agerentur una cum prenotatis testibus presens interfui, fieri vidi et audivi, ideo in ipsorum testimonium presens instrumentum rogatus in publicam formam redegi et manu propria scripsi et signo meo consueto signavi cum appensione sigilli domini legati nuncii apostolici et reformatoris antedicti.