Thomas de Amelia, utriusque iuris doctor, domini nostri pape capellanus et ipsius sacri palacii apostolici causarum et cause, ac partibus infrascriptis ab eodem domino nostro papa auditor specialiter deputatus, universis et singulis dominis abbatibus, prioribus, prepositis, decanis, archidiaconis, cantoribus, scholasticis, thesaurariis, custodibus, canonicis tam cathedralium, quam collegiatarum, parochialiumque rectoribus ecclesiarum ac loca tenentibus eorundem plebanis, viceplebanis, presbyteris, clericis, notariis et tabellionibus publicis quibuscunque per civitates, dioceses Wladislaviensem, Iauriensem et Strigoniensem ac aliis ubilibet constitutis et vestrum cuilibet in solidum, ad quem, vel ad quos presentes nostre litere pervenerint, salutem in Domino et mandatis nostris huiusmodi premonitoriis apostolicis firmiter obedire. Nuper sanctissimus in Christo pater et dominus noster dominus Iohannes, divina providencia papa vicesimus tercius quandam commissionem, sive supplicacionis scedulam, nobis per certum suum cursorem presentari fecit, quam nos cum ea, qua decuit, reverencia noveritis recepisse huiusmodi sub tenore:||
Dignetur sanctitas vestra causam et causas appellacionis et appellacionum in partibus ad sedem apostolicam pro parte reverendi in Christo patris domini Iohannis episcopi Wladislaviensis et conventus monasterii Sancti Martini Sacri Montis Pannonie Iauriensis diocesis interposite et interpositarum, a nonnullis gravaminibus sibi communiter et divisim per venerabilem virum dominum N. officialem curie Strigoniensis illatis in causa, que coram eo verti pretendebatur inter dictos dominos Iohannem episcopum et administratorem ac conventum ex una et reverendum patrem dominum Iohannem, episcopum Iauriensem ac prelatos et canonicos omnes et singulos atque capitulum ecclesie Iauriensis predicte, de et super nonnullis decimis ex villis Czenack (!), Nyul, Ecz (!), Kysrauast (!), Peterd, Ilbew Iauriensis diocesis provenientibus et rebus aliis in huiusmodi causa deductis et deducendis et earum occasione partibus ex altera et totius negocii principalis, necnon causam et causas, que vertitur, vertuntur, seu verti et esse sperantur inter dictas partes de et super nonnullis possessionibus Abda ac tributo pontis in fluvio Rapcza et aliis suis pertinenciis dicte Iauriensis diocesis et earum occasione committere alicui ex venerabilibus viris, dominis vestri sacri palacii apostolici causarum auditoribus audiendi, decidendi et fine debito terminandi cum omnibus et singulis suis emergendis incidentibus, dependendis et coannexis cum potestate citandi dictos dominos, episcopum, praelatos, canonicos et capitulum Iauriense ac omnes alios et singulos, sua interesse putantes, extra Romanam curiam et ad partes tociens, quociens opus fuerit, non obstante, quod causa seu cause huiusmodi non sint de sui natura ad dictam curiam legitime devolute, neque in ea de iuris necessitate tractande, seu eciam finiende.||
In fine vero dicte commissionis, sive supplicacionis cedule, scripta erant de alterius manu litera, superiori litere ipsius cedule penitus et omnino dissimili et diversa, hec verba videlicet:||
De mandato domini nostri pape audiat magister Thomas, citet, ut petitur et instanciam faciat.||
Post cuius quidem commissionis, sive supplicacionis cedule presentacionem et recepcionem fuimus per providum virum magistrum Gerardum de Werdena in Romana curia, et prefatorum reverendi patris domini Iohannis episcopi Wladislaviensis ac dominorum conventus monasterii Sancti Martini Sacri Montis Pannonie Iaurinensis diocesis principalium in dicta nobis facta commissione principaliter nominatorum procuratorem assertum, coram nobis constitutum debita cum instancia requisiti, quatenus sibi citacionem legitimam extra Romanam curiam et ad partes contra et adversus prefatum reverendum patrem dominum Iohannem episcopum Iaurinensem ac dominos prelatos ac canonicos omnesque et singulos atque capitulum ecclesie Iaurinensis ex adverso principales, eciam in dicta nobis facta commissione ex adverso principaliter descriptos omnesque alios et singulos sua communiter vel divisim interresse putantes iuxta ipsius commissionis vim, formam, et tenorem in forma solita et consueta decernere et concedere dignaremur.||
Nos igitur, Thomas, auditor prefatus, attendentes requisicionem huiusmodi fore iustam et consonam racioni volentesque in causa et causis huiusmodi rite et legitime procedere ac partibus ipsis dante Domino iusticiam ministrare, ut tenemur, idcirco autoritate apostolica nobis in hac parte commissa, vos omnes et singulos supra dictos et vestrum quemlibet in solidum tenore presencium requirimus et monemus primo, secundo, tercio et peremptorie vobisque et vestrum cuilibet in virtute sancte obediencie et sub excommunicacionis pena, quam in vos et vestram quemlibet canonica monicione premissa fecerimus in his scriptis, si ea, que vobis in hac parte committimus, neglexeritis, seu recusaveritis contumaciter adimplere, districte precipiendo mandamus, quatenus infra sex dierum spacium post presentacionem seu notificacionem presencium vobis seu alteri vestrum factam immediate sequencium et postquam pro parte dictorum dominorum Iohannis episcopi Wladislaviensis ac conventus monasterii Sancti Martini Sacri Montis Pannonie Iauriensis dioecesis principalium fueritis requisiti, seu alter vestrum fuerit requisitus, quorum sex dierum duos pro primo, duos pro secundo et reliquos duos dies vobis universis et singulis pro tercio et peremptorio termino ac monicione ... assignamus, ita tamen, quod in his exequendis unus vestrum alium non expectet, nec unus pro alio se excuset, prefatos dominos Iohannem episcopum Iaurinensem, ex adverso principales, omnesque alios et singulos sua interesse putantes, in eorum propriis personis, si ipsorum presencias commode habere poteritis, alioquin in hospiciis habitacionum suarum, capitulum vero dicte ecclesie Iauriensis in loco capitulari, ubi canonici eiusdem ecclesie ad sonum campane vel alias, ut moris est, ad capitulum faciendum soliti sunt congregari, si ad hoc indici volueritis et ad illa, vel ad illud, tutus pateat accessus, et in parochiali, seu parochialibus, sub qua vel quibus degunt et morantur, sin autem in cathedrali Iaurinensi ac parrochiali seu parrochialibus ecclesiis et loco capitulari predictis aliis ecclesiis et locis publicis, dum ibidem populi multitudo ad divina audienda vel alias congregata fuerit, ubi, quando et quociens expediens fuerit, alta et intelligibili voce peremptorie citare curetis ex parte nostra premonicione apostolica, quos et nos tenore presencium sic citamus ita, quod verisimile sit citacionem vestram huiusmodi ad ipsorum noticiam devenire, quatenus sexagesima videlicet die post citacionem huiusmodi per vos vel alterum vestrum eis factam immediate sequenti, si dies ipsa sexagesima iuridica fuerit et nos vel alter loco nostri forsan subrogandus auditor ad iura reddenda pro tribunali sederimus vel sederit, alioquin proxima die iuridica ex tunc immediate sequenti, qua nos vel subrogandum predictum Florencie vel alibi, ubi forsan tunc dominus noster papa cum sua curia residebit in audiencia causarum apostolica, in qua iura reddi solent nobis inibi manentibus hora causarum ad iura reddenda pro tribunali sedere contigerit, compareant in iudicio legitime coram nobis vel subrogando predicto per se vel procuratorem seu procuratores idoneum seu idoneos ad causam seu causas huiusmodi sufficienter instructos, cum omnibus et singulis actis ac citatis literis, scripturis, instrumentis, privilegiis, iuribus et munimentis causam seu causas eiusmodi tangentibus, seu concernentibus prefatis Iohanni episcopo Wladislaviensi ac conventui monasterii Sancti Martini principalibus seu eorum legitimo procuratori de et super omnibus et singulis in dieta nobis facta comissione contentis de iusticia responsuri et in toto negocio ac causa seu causis huiusmodi ad omnes et singulos actus gradatim et successive usque ad definitivam sentenciam inclusive debitis et consuetis terminis et dilacionibus precedentibus, ut est moris, processuri et procedi visuri, aliasque dicturi, facturi, recepturi et allegaturi, quod iustum fuerit et ordo dictaverit racionis; certificando nichilominus eosdem citatos, quod sive in dicto citatorum termino, ut premissum est, coram nobis vel subrogando predicto comparere curaverint, sive non, nos vel subrogandus auditor prefatus ad premissa omnia et singula, prout de iure poterimus, procedemus, seu procedet dictorum citatorum absencia seu contumacia non obstante. Diem vero citacionum vestrarum huiusmodi, atque formam et quidquid in premissis feceritis, nobis per vestras patentes literas aut instrumentum publicum harum seriem, seu disignacionem in se continentes, sive continens remissis presentibus curetis fideliter intimare. Absolucionem vero omnium et singulorum, qui prefatam nostram excommunicacionis sentenciam incurrerint, vel incurrerit quoquo modo, nobis vel superiori nostro tantummodo reservamus. In quorum omnium et singulorum fidem et testimonium premissorum presentes literas sive presens publicum instrumentum huiusmodi nostram citacionem in se continentes sive continens exinde fieri et per Iacobum notarium publicum nostrumque et huiusmodi causae coram nobis scribam infrascriptum subscribi et publicari mandavimus, nostrique sigilli iussimus appensione communiri. Datum et actum Florencie apud ecclesiam Sancti Marci sub anno a Nativitate Domini millesimo quadringentesimo decimo tercio, indiccione sexta, die Veneris, sexta mensis Octobris, [1413. okt. 6.] pontificatus domini nostri domini Iohannis pape XXIII predicti anno quarto, presentibus ibidem discretis viris magistris Iohanne Wallinus et Iohanne Rosenboem, notariis publicis scribisque nostris clericis Monasteriensis et Coloniensis dioecesis, testibus ad premissa vocatis specialiter et rogatis.||
Et ego Iacobus de Nedermolen clericus Laodicensis diocesis publicus apostolica auctoritate notarius ac venerabilis et circumspecti viri domini Thome auditoris prefati et huiusmodi citacionis coram eo scriba, quod dicte citacionis peticioni eiusque decreto ac omnibus aliis et singulis premissis, dum sic fierent et agerentur, una cum prenominatis testibus presens fui, eaque sic fieri vidi et audivi, ideoque hoc presens instrumentum per alium, me aliis occupato negotiis, fideliter scriptum exinde confeci, subscripsi et in hanc formam publicam redegi, signoque et nomine meis solitis et consuetis, una cum prefati domini Thome auditoris sigilli appensione signavi, rogatus et requisitus in fidem et testimonium omnium et singulorum premissorum.