Nos, capitulum ecclesie Iauriensis, memorie commendamus, quod, quamvis inter nos ab una, parte vero ex altera reverendum in Christo patrem dominum Iohannem, Dei et apostolice sedis gracia episcopum Wladislaviensem, gubernatorem abbacie Sancti Martini Sacri Montis Pannonie et conventum loci eiusdem hactenus racione diversarum iniuriarum ac nocumentorum et presertim occupacionis possessionis Abda vocate et tributi in ponte in fluvio Rapcha coustructo exigi consueti nostrarum variarum licium inhoaciones in presenciis diversorum iudicum regni vicissim mote et exorte extiterint, et primo idem scilicet dominus Iohannes episcopus seu gubernator in homagio suo proprio, ut puta in centum marcis denariorum ac consequenter prefatus conventus bina vice similiter in homagiis propriis, videlicet in singulis quinquaginta marcis denariorum necnon pluribus aliis iudiciorum oneribus, scilicet centum et octuaginta duabus marcis denariorum tam ad ipsum dominum Iohannem gubernatorem, quam prefatum conventum cedentibus ipsosque pariter respicientibus contra nos, scilicet capitulum Iauriense predictum sentencialiter convicti et innodati fuerint, pretextu quorum nonnulle possessiones, iura possessionaria ipsius monasterii dictorum gubernatoris et conventus manibus iudiciariis et nostris capituli per regium et capituli Posoniensis homines statute et applicata fuerant et habeantur, et quod amplius nonnulli familiares, sequaces et homines ipsorum gubernatoris et conventus forent, contra quos litere affirmatorie certorum iuratorum assessorum emandate fore perhibentur et in proximis octavis Sancti Georgii martiris [1414. máj. 1.] et amplioribus terminis adversum nos succumbi de necessario deberent, nos, predictum capitulum Iauriense, ex ferventi et desiderata solicitaque procuracione et disposicione reverendi in Christo patris et domini domini Iohannis episcopi predicte ecclesie Iauriensis, domini et prelati nostri ac magnifici viri Pauli Bisseni alias regni Sclavonie bani necnon magistri Stephani similiter Bisseni, filii Gregorii de Berench, regie maiestatis dispensatoris, Bartholomei de Nema et Clementis dicti Farkas de Vigman aliorumque certorum virorum nobilium et valencium personarum composicione et ordinacione universas causas seu lites, quas nos adversus prefatos gubernatorem et conventum ac ad ipsos pertinentes moveramus usque modo, demptis et exceptis solum modo causis per antefatum dominum Iohannem episcopum Iauriensem et nos in facto quarundam decimarum et quartarum simul quarundam villarum seu possessionum coram domino archiepiscopo Strigoniensi et suo vicario motis necnon domini Galli prepositi ecclesie nostre contra prefatos gubernatorem et conventum suscitatis, que in suis vigoribus permanebunt, premissa gravamina atque onera homagialia et eciam birsagialia, literas sentenciales, quibus mediantibus in homagiis ipsorum et aliis iudiciis predictis dumtaxat fuerant condempnati, ita tamen, si infrascripta plenarie servabunt, cassando et inanes reddendo ipsis gubernatori et conventui ac ipsorum hominibus relaxavimus, immo ipsos et eorum homines atque sequaces vigore aliarum literarum nostrarum expeditos commisimus atque absolutos. Ideo ipsi scilicet gubernator et conventus in horum reconpensam et satisfaccionem omnimodam, et ut transitus et reditus per nos et ad nos pertinentes ad dictos gubernatorem et conventum et ipsorum monasterium, qui hactenus per ipsos fuerant prohibiti, reseretur, nosque mutuo ex zelo pure devocionis fervencius diligamus, nobisque scilicet capitulo Iauriensi trecentos et quinquaginta florenos per centum denarios nove monete regalis computando, ut omnis rancoris et dissidie materie invidieque tabes de medio nostro vicissim evellatur, dare et solvere tenebuntur et sunt per eorum literas obligati. Pro quibus quidem trecentis et quinquaginta florenis possessionem monasterii ipsorum Chanak appellatam in comitatu Iauriense sitam cum omnibus suis utilitatibus et pertinenciis universis ac proventibus, obvencionibus, collectis, daciis et muneribus ac signanter decimis vinorum et frugum ac iuribus montanis ibidem provenientibus generaliterque quibuscunque emolumentis qualitercunque vocitatis manus ipsorum et ad eos pertinencium ab eadem prorsus removendo tamdiu, quousque eadem possessio per ipsos et eorum successores abbates ac conventum aut gubernatores pro premissa pecunia redimetur. In cuius scilicet possessionis ipsorum Chanak pacifico dominio nos medio tempore ipse conventus propriis suis laboribus et expensis contra quoslibet, signanter dominum Iohannem gubernatorem et suos successores, castellanos et familiares promiserunt conservare, nobis inpignorarunt immo inpignoraverant et nos super causa seu lite novissime per ipsos pretextu, ut dicebant, ablacionis vinorum decimalium in dicta Chanak ipsis preteritis annis provenire debencium suscitata et in presencia domini Iohannis archiepiscopi Strigoniensis et sui vicarii vertente eandem ipsorum literis sopiendo et prorsus condescendi faciendo necnon aliis universis factis potenciariis, damnis, iniuriis et generaliter quibusvis malorum generibus ipsis per nos et ad ipsos pertinentes hactenus illatis expeditos et absolutos per ipsorum literas commiserunt tali moderaminis vinculo interposito, quod si ipsi, gubernator et conventus ac ad ipsos pertinentes infra tempus redempcionis dicte possessionis Chanak nobis et ad nos pertinentes palam vel occulte quidquam mali, nocumenti, iniurie aut incomodi ad eandem possessionem Chanak sub quovis colore ipsi intromittendo inferrent aut irrogarent vel ipse conventus nos in pacifico dominio eiusdem conservare non possent aut non curarent, ex tunc mox et in continenti literis sentencialibus, affirmatoriis, inquisitoriis, iudicialibus ac aliis universis sub quacunque forma verborum emanatis adversus ipsos et ad eos pertinentes exortis in suis vigoribus remanentibus dominium, proprietatem et iurisdiccionem omnium et singulorum possessionum ac iurium possessionariorum nobis sentencialiter, ut premittitur, statutarum nos absque strepitu cuiuslibet iudicii vigore literarum ipsorum et nostrarum sentencionalium reintrandi et easdem occupandi, conservandi et possidendi haberemus potestatem, penas, gravamina, onera et sentencias premissas ac singula superius explicata, si contra iam enodata facerent aut idem dominus Iohannes gubernator vel sui successores abbates aut gubernatores, quorum onera et gravamina in omnibus premissis et singulis premissorum ipse conventus ad se et hona ac iura possessionaria monasterii ipsorum receperunt, facerent evidenter iterato incursuri. Datum feria sexta proxima ante festum Sancte Georgii martiris anno Domini MCCCCXIII. [1414. ápr. 20.]