Nos, Matheus de Vicedominis de Placencia, utriusque iuris doctor, archidiaconus Nitriensis et canonicus in ecclesia Strigoniensi, necnon reverendissimi in Christo patris et domini domini Iohannis, miseracione divina et apostolice sedis gracia archiepiscopi Strigoniensis, locique eiusdem comitis perpetui, primatis et dictae sedis apostolice in Strigoniensi et Colociensi provincia legati nati etc., vicarius in spiritualibus et causarum auditor generalis, notificamus tenore presencium, quibus expedit universis, quod nobis de anno Domini infrascripto, die vigesima sexta mensis Novembris, [1414. nov. 26.] hora quasi vespertina, causarum consueta in sede nostra iudiciaria Strigoniensi, in loco nostro solito una cum venerabilibus viris dominis de capitulo predicte ecclesie Strigoniensis assessoribus nostris pro tribunali sedentibus et causas coram nobis causancium equo iuris tramite discucientibus, circumspectus vir, magister Thomas de Igal, procurator et procuratorio nomine venerabilis viri Petri prepositi canonici et vicarii ecclesie Vesprimiensis, cum sufficienti procuracionis mandato apud acta presentis cause et curie nostre constituto et registrato ad nostram iudiciariam accedens presenciam accionem eiusdem domini Petri prepositi, per modum libelli inscripti redactam contra reverendum in Christo patrem, dominum Iohannem dicta gracia episcopum Wladislaviensem, gubernatorem abbacie monasterii Sancti Martini Sacri Montis Pannonie ac conventum loci eiusdem, pro quibus circumspectus vir magister Thomas, canonicus ecclesie Sancti Georgii martyris de Viridi Campo Strigoniensi, cum sufficienti procuracionis mandato apud acta presentis cause similiter registrato astiterat, exhibuit et produxit, cuius tenor sequitur in hec verba:||
Coram vobis, venerabili et egregio viro, domino Matheo de Vicedominis de Placencia, utriusque iuris doctore, archidiacono Nitriensi et canonico in ecclesia Strigoniensi, necnon reverendissimi in Christo patris et domini domini Iohannis archiepiscopi Strigoniensis et dicte sedis legati nati etc. vicario in spiritualibus et causarum auditore generali, procurator procuratorio nomine honorabilis viri domini Petri, prepositi et canonici ac vicarii ecclesie Vesprimiensis contra et adversum venerabilem in Christo patrem dominum Iohannem, episcopum ecclesie Wladislaviensis ac gubernatorem abbacie Sancti Martini Sacri Montis Pannonie ac conventum loci eiusdem, vel aliam quamcunque personam pro ipsis vel eorum altero vestro in iudicio legitime intervenientem dicit, agit, et proponit querulose, quod licet abbates ipsius monasterii pro tempore constituti ac conventus ipsius loci prepositure predicte ecclesie Vesprimiensis decem marcas argenti puri singulis annis ex certis causis in quodam privilegio condam domine (!), Bele, regis Hungarie felicis recordacionis, lacius expressatis dederunt et teneantur dare et solvere, tamen ipsi dominus gubernator ac conventus, a quibusdam retroactis temporibus incipiendo predictas decem marcas argenti non de iure, sed de facto retinentes, non plus preterquam annis singulis viginti florenos ad racionem presentis nove monete previa racione dederunt et solverunt, necnon dant et solvunt de presenti in preiudicium iuris ipsius domini Petri prepositi et vicarii valde magnum. Quare venerande domine iudex, procurator supradictus vestrum benignum implorat officium, quatenus prefatos dominum gubernatorem et conventum, ad solucionem predictarum decem marcarum argenti in quolibet anno fiendam ac de negglectis (!), quibus ipsi certis literis expeditoriis edocere non possent, ad satisfaciendum sentencialiter dignemini compellere, salvo iure addendi, minuendi et corrigendi iuxta consilium sapiencium, protestor de expensis factis vel fiendis in causa predicta.||
Quo libello oblato decretaque et assignata copia eiusdem, utrique parti causam eandem respondendum super contentis in dicto libello ad nonum diem mensis Februarii [1415. febr. 9.] tunc in proximo advenienti prorogantes, quo die et termino adveniente et nobis in dicta sede nostra iudiciaria una cum dictis dominis de capitulo, nostris assessoribus pro tribunali hora causarum consueta sedentibus et eisdem procuratoribus parcium nominibus procuratoriis, quibus supra, coram nobis in iudicio comparentibus, prefatus magister Thomas, canonicus, procurator eodem procuratorio nomine responsionem suam in scriptis offerebat, cuius tenor talis est:||
Coram vobis, venerabili et egregio viro, domino Matheo, de Vice Dominis de Placencia, utriusque iuris doctore, archidiacono Nitriensi, canonico et vicario in ecclesia Strigoniensi, procurator nomine procuratorio reverendi in Christo patris, domini Iohannis, episcopi ecclesie Wladislaviensis, gubernatoris abbacie monasterii Sancti Martini Sacri Montis Pannonie ac conventus loci eiusdem ad quosdam articulos pro parte honorabilis viri domini Petri prepositi et canonici, necnon vicarii ecclesie Vesprimiensis in spiritualibus porectos (!) coram vobisque productos prout dicit, quod abbas et conventus predicti monasterii sibi racione sue prepositure singulis annis teneantur decem marcas argenti puri, ad hec respondit negative, nam predicti abbas et conventus nullo unquam tempore ad id fuerunt adstricti, nec debent arctari de presenti, preter quod singulis annis decem marcas denariorum usualium comitatus Simigiensis solvere teneantur, que decem marce Simigienses faciunt in toto viginti florenos ad racionem presentis nove monete; et hec est racio, quia decime predictorum dominorum abbatis et conventus, unde huiusmodi solucio debetur, sunt in comitatu Simigiensi predicto, ideo predictas marcas denariorum solverunt et solvunt de presenti ad computum marcarum Simigiensium, super quibus abbas et conventus predicti habent diversas quietancias.||
Unde nos auditis hinc inde ipsarum parcium proposicionibus et responsionibus decernentes commiseramus, quod ipse ambe partes intenciones earum premissas cum fide dignis testibus aut aliis legitimis documentis, quibus clarius potuissent, octavo die festi Sancte Purificacionis Marie Virginis tunc venturi [1415. febr. 9.?] sine crastinacione Strigonii coram nobis legitime comprobare debuissent et tenerentur. Illo autem die et terminio adveniente, comparentibus coram nobis in iudicio prefato magistro Thoma, canonico ecclesie Sancti Georgii dicto procuratorio nomine prefatorum reverendi patris Iohannis, episcopi et gubernatoris ac conventus ab una, ac honorabili viro, domino Petro, canonico Vesprimiensi, procuratore et procuratorio nomine antelati domini Petri, prepositi, ex alia partibus, idem Petrus dicto procuratorio nomine quasdam literas privilegiales et iura ipsam causam tangencia hinc inde produxerat, quorum productorum ad ipsorum procuratorum instantiam, requisicionem, decretis utrisque partibus copiis, quia predictus magister Thomas, procurator dicto procuratorio nomine se plura iura producere velle astrinxerat, tamen ipsum ad ipsa iura producenda ad quintum decimum diem eiusdem termini prorogantes; ipso itaque die et termino instante productisque in eodem termino certis iuribus causam ipsam pro tercia et ultima dilacione ad alium quintum decimum diem ipsius termini ad producenda ac alleganda omnia, que ipse ambe partes hinc inde producere, dicere et allegare voluissent, verbo et in scriptis duxeramus prorogandam. Tali vero instante termino, qui cesserat in diem sabbati, nonum mensis Marcii [1415. márc. 9.] et nobis in dicta sede iudiciaria Strigoniensi hora completorii, vel quasi, ad iura reddenda pro tribunali sedentibus ac predicto magistro Thoma, canonico ecclesie Sancti Georgii, pro parte praefatorum, reverendi patris, domini Iohannis episcopi et gubernatoris ab una et magistro Paulo, literato, scolare Strigoniense, similiter apud acta presentis cause constituto procuratore, coram nobis in iudicio comparentibus, ipsi ambo procuratores parcium omnia et singula, que in dicta causa producere vel alias dicere seu allegare voluerant, verbo vel in scriptis producebant ac ulteriori produccioni et allegacioni renunciantes in causa ipsa concludi postulando. Unde nos in eadem causa in Dei nomine conclusimus et pro concluso habuimus causam ipsam de simili sibi dictorum procuratorum voluntate ad audiendum per nos in eadem definitivam ferri sentenciam ad quintum decimum diem festi Resurreccionis Domini tunc in proximo affuturi, si dies ipsa iuridica foret, alioquin ad primam diem iuridicam immediate sequentem prorogando. Ipso autem die et termino, in diem quintum decimum mensis Aprilis, [1415. ápr. 15.] adveniente et nobis in dicta sede nostra iudiciaria Strigonii, in loco nostro solito, hora vesperarum, vel quasi, una cum dictis dominis de capitulo ecclesie Strigoniensis predicte, assessoribus nostris ad iura reddenda pro tribunali sedentibus et predictis magistris Paulo de Pechy ac Thoma, canonico, procuratoriis nominibus, quibus supra, coram nobis in iudicio comparentibus, dictam nostram sentenciam a nobis prestolantes, unde nos visis et diligenter inspectis libello prefati honorabilis viri, domini Petri, prepositi ecclesie Vesprimiensis ac responsionibus predictorum reverendi patris, domini Iohannis episcopi et gubernatoris ac conventus Sancti Martini Sacri Montis Pannonie et lite inter eos contestata ac iuribus et privilegiis pro utraque parte productis et omnibus aliis, que partes ipse producere, dicere et allegare voluerunt semel et pluries ac visa conclusione habitoque superinde una cum predictis dominis de capitulo ecclesie Strigoniensis ac aliis assessoribus nostris diligenti tractatu et colloquio deliberacioneque matura, Christi et Beate Virginis Marie matris eius et Beati Adalberti martyris nominibus invocatis per hanc nostram absolutoriam et definitivam sentenciam, quam ferimus in his scriptis, dicimus, sentenciamus et declaramus prefatos reverendum patrem, dominum Iohannem episcopum et gubernatorem ac conventum Sancti Martini Sacri Montis Pannonie domino preposito Vesprimiensi non teneri singulis annis decem marcas argenti puri, in hoc eosdem gubernatorem ac conventum ab impeticione prefati domini Petri, prepositi ecclesie Vesprimiensis, quia suam intencionem minime probavit, absolventes, sed solum prout hactenus solverunt, decem marcas Simigiensis computi singulis annis eidem preposito fore debitores et quia dictus vicarius de iure venit condemnandus, eundem dominum Petrum, prepositum in expensis per predictos dominos, Iohannem episcopum et gubernatorem ac eius conventum in hac causa coram nobis legitime factis condemnamus in his scriptis, taxacione earundem nobis in posterum reservata. In quorum fidem et testimonium presentes literas nostras, seu hoc presens publicum instrumentum huiusmodi nostram absolutoriam et definitivam sentenciam in se continentes sive continens fieri et nostri maioris sigilli appensione una cum subscripcione et signi apposicione notarii publici infrascripti fecimus communiri. Datum Strigonii, anno Domini, millesimo quadringentesimo quintodecimo, indiccione octava, mense, loco et hora, quibus supra, [1415. ápr. 15.] presentibus honorabilibus viris dominis, Paulo, preposito ecclesie Sancti Thome martyris de promontorio Strigoniensi et Andrea, archidiacono Komariensi et canonico in dicta ecclesia Strigoniensi, testibus fide dignis ad premissa vocatis specialiter et rogatis in fidem et testimonium omnium et singulorum premissorum.||
Et ego, Conradus Siffridi de Wartburg, clericus Paderbornensis diocesis, publicus sacra apostolica auctoritate notarius, quia predicte sentencie absolutorie et definitive prolacioni, dum sic, ut premittitur ageretur et fieret, una cum prenotatis testibus presens interfui, eaque omnia et singula sic fieri vidi et audivi, ideo presentes literas, seu hoc presens publicum instrumentum huiusmodi iudiciarium processum in se continentes, sive continens de mandato prefati domini Mathei doctoris et vicarii exinde confeci, meque aliis occupato negociis per alium fideliter scribi feci et in hanc publicam formam redegi, signoque et nomine ac subscripcione meis solitis et consuetis una cum appensione sigilli maioris ipsius domini Mathei doctoris vicarii consignavi rogatus et requisitus in fidem et testimonium omnium et singulorum premissorum.