Amicis suis reverendis capitulo ecclesie Wesprimiensis comes Stephanus Kompolth de Nana, iudex curie domini Sigismundi, Dei gratia Romanorum regis semper augusti ac Hungarie, Bohemie, Dalmatie, Croatie etc. regis, amicitiam paratam cum honore. Noveritis, quod cum prefatus dominus noster Sigismundus rex quandam iudiciariam suam sententiam dudum inter religiosum virum dominum fratrem Martinum, abbatem de Beel, actorem ab una et Eliam et Gregorium de Nozlop et fratres eorumdem in causam attractos parte ab altera super facto dicte possessionis Nozlop in presentia magistri Iacobi, diffinitoris causarum in speciali presentia sue maiestatis vertentium, latam et editam cum tota sua serie ac processibus et conclusionibus per virum magnificum comitem Petrum de Peren, pridem similiter iudicem curie sue ac prelatos et barones regni sui, Deum pre oculis habitis, revidere, ruminare et de novo examinare et exinde meri iuris et iustitie conplementum inter ipsas partes exhibere serie litterarum suarum patentium Lugduni in festo Beati Blasii confessoris anno Domini millesimo quadringentesimo sedecimo, [1416. febr. 3.] regnorum suorum anno Hungarie etc. vigesimo nono, Romanorum sexto, secreto suo sigillo conmunitarum demandasset, ipsamque ecclesiam de Beel medio tempore suo legitimo abbate diutius vacante et prescripta causa in ipsius vacationis intervallo in suspenso remanente, denique religioso domino fratre Michaele, moderno abbate dicte ecclesie de Beel in ipsam abbatiam de Beel succedente, discussio et deliberatio premissorum inter prefatum Eliam de Nozlop actorem ab una et annotatum fratrem Michaelem abbatem de Beel in causam attractum parte ab altera serie litterarum dicti comitis Petri de Peren ventilando ultimatim presentes octavas festi Beati Iacobi apostoli [1423. aug. 1.] prorogatorie attigisset; denique ipsis octavis instantibus interim prefato comite Petro viam universe carnis ingresso et dicto honore iudicatus curie regie per regiam clementiam nobis collato Michael litteratus, filius prefati Elie de Nozlop, pro eodem Elia patre suo cum procuratoriis litteris predicti comitis Petri de Peren in nostram veniendo presentiam litteras adiudicatorias prefati domini nostri regis et quasvis alias super prescripta ipsius domini regis iudiciaria et diffinita sua sententia confectas exhiberi postulavit per dominum fratrem Michaelem abbatem de Beel supradictum coram nobis.||
Quo audito idem frater Michael abbas personaliter exurgendo in declarationem premissorum quasdam duas litteras, unam dicti domini Sigismundi regis adiudicatoriam et aliam vestram exinde rescriptionalem nobis presentavit.||
Quarum prima dicti domini regis adiudicatoria littera Bude tricesimo secundo die octavarum festi Beati Iacobi apostoli in anno Domini millesimo quadringentesimo nono [1409. szept. 2.] emanata declarabat: quod, cum ob contradictoriam inhibitionem metarum erectionis et sequestrationis cuiusdam particule terre ad portionem possessionariam ecclesie de Beel in possessione Nozlop vocata habite spectantis religiosus vir, prefatus condam dominus frater Martinus abbas de dicta Beel, prefatos Eliam et Gregorium de predicta Nozlop modum et formam legitime evocationis observando mediantibus regio et vestro hominibus contra se ad certum terminum regiam specialem in presentiam attraxisset in causam, ipsaque causa ab ipso certo termino seriebus litterarum prefati domini nostri regis prorogationalium ad octavas festi Beati Georgii martiris in anno millesimo quadringentesimo octavo preteritas [1408. máj. 1.] prorogative devenisset; tandem ipsis octavis occurrentibus prefatus dominus Martinus abbas presente prefato Gregorio de Nozlop, qui pro se personaliter ac pro predicto Elia de eadem cum procuratoriis litteris vestris in eiusdem domini nostri regis specialem presentiam adhesisset, suam specialem veniendo in presentiam, volens dictam ecclesiam suam de Beel in predicta Nozlup portionem habere debere declarare, quasdam litteras olim excellentissimi principis domini Bele regis anno Christi incarnationis millesimo centesimo tricesimo quinto, indictione tertiadecima, regni autem sui anno quinto [1135.] sub maiori suo sigillo pendenti privilegialiter editas dicti domini nostri regis produxisset in conspectum, in quibus inter cetera hec clausula reperta fuisset:||
Item in Nozlop predio assignavit terram ad quatuor aratra. Aratoruin autem nomina sunt hec, Wulchana, Serak, Regutha, Rawoz, Sare, Swrnoch, Feled, Miassa et habet predium illud arbores fructiferas, silvam, fenum et cetera necessaria ad humanum usum pertinentia satis.||
Quibus exhibitis prefatus dominus Martinus abbas solum in dominio duarum sessionum et alique quantitates terre arabilis, fenetique et silve in predicta Nozlup existentium se existere et de residuitate terrarum ad dicta quatuor aratra sufficientium, necnon feneti et silve exclusum fore referens, rationem predicte contradictorie inhibitionis assignari postulavit per Gregorium et Eliam supradictos coram ipso.||
Quo percepto annotatus Gregorius in sua, ut premittitur, personaliter ac antefati Elie personis in eandem regiam specialem exurgendo presentiam respondisset eo modo, ut ipse ac annotatus Gregorius cum ipsorum fratribus generationalibus in dicta Nozlop veri et sinceri nobiles existerent, nullamque partem dictarum terrarum quatuor aratrorum ac feneti et silve occupassent, nam eedem terre, fenetum et silva in aliqua ipsorum parte aput (!) manus dicti domini abbatis haberentur, in residuis vero earum partibus iobagiones populares castri de Ugodh, necnon conditionales iobagiones dicte ecclesie de Beel existerent et occupative uterentur; et ibidem quasdam duas litteras vestras, unam in quindenis festi Nativitatis Virginis gloriose [1332. szept. 22.] et aliam in vigilia festi Omnium Sanctorum, [1332. okt. 30.] ambas anno Verbi incarnate millesimo trecentesimo tricesimo secundo patenter emanatas iudiciario examini prefati domini nostri regis curasset exhibere, in quarum prima, vestra scilicet littera patenti, in dictis quindenis festi Nativitatis Beate Marie virginis edita adinventum fuisset, quod cum iuxta tenorem litterarum olim domini Karoli regis una cum Nicolao, filio Pauli, de genere Zalowk, homine regio magistrum Mathiam, archidiaconum Albensem, socium et concanonicum vestrum ad reambulandas terras seu portionem condam magistri Chenyk et terram reginalem ac terras monasterii Beati Mauritii de Beel in Nozlop habitas a terra nobilium de eadem Nozlop certis metis distinguendas pro vestro testimonio misissetis; demum idem magister Chenyk Bohemus, miles regius, una cum predictis regio et vestro hominibus ab una, item Rolaldus (!) et Michael, filii Thome, Desew et Nicolaus, filii Detrici, Nicolaus, filius Mathei, Petrus, filius Myseen, Thomas et Matheus, filii eiusdem Mysen (!), Lucasius et Demec, filii Myke, Sebewk, Luca, Myke, filii Andree, Nicolaus, filius Poka, Egidius, filius Poos ac Petrus, filius eiusdem, Paulus et Stephanus, fratres eiusdem Petri, Gregorius, filius Wyda, pro se et pro Bedek fratre suo, nobiles de dicta Nozlop parte ab altera coram vobis constituti, idem magister Chenyk confessus fuisset, quod portionem possessionariam suam, tertiam videlicet partem ipsius terre seu possessionis Nozlop preter terram abbatis et conventus monasterii de Beel ad quatuor et preter terras reginales ad unum aratra sufficientes, quas eidem abbati salvo iure reginali, prout iidem nobiles sub penis quinquaginta marcarum persolvendarum sibi et predicto monasterio ac domine regine certis metis distinctas remisissent cum portione, quam iidem abbas et conventus de Beel, populi reginales et iobagiones magistri Chenyk in ecclesia Beate Margarethe virginis in eadem Nozlop fundata una cum predictis nobilibus, prout quemlibet eorum tangere dignosceretur, salvis aliis duabus partibus in sessionibus, terris arabilibus, silvis, nemoribus et aliis utilitatibus eisdem nobilibus de Nozlop ad conmunem divisionem remanentibus.||
Altera namque earumdem similiter vestra patens littera in predicta vigilia Omnium Sanctorum suborta per vestrum hominem litteris in eisdem expressum inter predictos nobiles de Nozlop in dictis portionibus eorum possessionariis in eadem Nozlop habitis erbali limitatione mediante divisionem factam fuisse declarasset.||
Quarum quidem litterarum exhibitionibus factis, dictisque partibus nulla plura litteralia instrumenta metalia preter preexhibita facto in premisso se habere ad ipsius domini nostri regis iudiciariam requisitionem habere allegantibus, quia prefata ecclesia de Beel tam ex serie litterarum predictarum antelati olim Bele regis, quam etiam vestrarum, modo quo supra, per partes productarum et in superioribus sensualiter insertarum in predicta possessione Nozlop vocata terram ad quatuor aratra ac arbores fructiferas, silvam, fenetum et cetera necessaria ad humanum usum pectantia copiose haberi debere, dictusque dominus Martinus abbas in dominio earundem non plene, sed in parte existere ex partium predictarum allegationis repertum fuisset, ob hocque ad resarciendum et integrandum defectum et vacuitatem dictarum terrarum et silve ac feneti tanquam corporalis possessionis sopita et postergata prescripta limitatione et erectione metarum per modum legitime recaptivationis fiende suus regius et vester homines necessario fuissent transmittendi: pro eo idem dominus noster rex fidelitati vestre firmiter precipiendo mandasset, quatenus vestrum mitteretis hominem pro testimonio fide dignum, quo presente homo regius infradeclarandus in quindenis festi Beati Iacobi apostoli tunc venturis [1408. aug. 8.] et aliis diebus ad id aptis et suffientibus ad faciem prelibate possessionis Noztop vocate et per consequens terrarum, feneti et silve predictarum vicinis et conmetaneis ipsarum universis inibi legitime convocatis et partibus vel earum legitimis procuratoribus presentibus accedendo reambularet easdem iuxta demonstrationem dicti domini fratris Martini abbatis vel legitimi sui procuratoris ab illa parte et in illius gyro ac circuitu, cuius scilicet partis dominio dictus dominus abbas pacifice repertus fieret, reambulatas [vero] et ab aliorum possessionariis iuribus distinctas et separatas, [defec]tum et vacuitatem earumdem undique et circumquaque in giro et circuitu ipsius partis in qua, ut premittitur, ipse dominus abbas existeret, secundum conmemorationem predictam plene et conplete resarciendo et recuperando relinqueret et conmitteret prescripto domino fratri Martino abbati et sue ecclesie antefate iure sibi incumbenti perpetuo possidendas, si per prefatos Gregorium et Eliam vel alios non fieret contradictum; contradictores vero, si qui fierent, exceptis predictis Gregorio et Elia, citaret ipsos contra annotatum dominum abbatem suam specialem in presentiam ad octavas festi Beati Michaelis archangeli tunc venturas [1408. okt. 6.] rationem contradictionis eorum reddituros; si vero dicti Gregorius et Elias in aliquo contradicerent, extunc ipsos citare non incumberet eo, quod iidem in causa extitissent abbate cum eodem, ipsos octavis in eisdem sine aliquali citatione coram sua regia maiestate conparere oporteret similiter rationem contradictionis reddituros; particulam vero vel particulas terrararum per quempiam prohibitam vel prohibitas, visis et circumspectis earum utilitate et qualitate, quantitate et fructuositate, regali mensura mensurando vel, si mensurari nequiret, visu considerando, sine omni falsitate, Deum habendo pre oculis, una cum allis probis et nobilibus viris estimaret lege regni requirente et post hec omnium premissorum seriem, ut fieret expediens, cum nominibus contradictorum et citatorum, si qui exceptis Gregorio et Elia fierent, ad easdem octavas sue speciali presentie fideliter rescriberetis maiestati.||
Denique ipsis octavis Beati Michaelis archangeli instantibus [1408. okt. 6.] prefatus dominus frater Martinus abbas personaliter in eiusdem domini nostri regis specialem veniendo presentiam litteras vestras super premissis rescriptionales sibi presentasset, declarasset (!), quod vos receptis ipsis litteris dicti domini nostri regis adiudicatoriis una cum magistro Georgio de Bokod, curie sue notario, homine suo, vestrum hominem, videlicet magistrum Stephanum Magnum, socium et concanonicum vestrum, ad premissa exequenda vestro pro testimonio fide dignum duxissetis destinandum; demum iidem exinde ad vos reversi vobis uniformiter retulissent, quod ipsi in pretactis quindenis festi Beati Iacobi apostoli [1408. aug. 8.] ad faciem dicte possessionis Nozlop vocata et per consequens terrarum ad quatuor aratra sufficientium ac feneti et silve predictarum vicinis et conmetaneis earumdem universis illuc legitime convocatis, necnon dictis domino Martino abbate actore ac Elia et Gregorio de dicta Nozlop in causam attractis, item Benedicto, filio Iohannis, Blasio et Martino, filiis Blasii, Gregorio, filio Nicolai, Petro, filio Iohannis de dicta Nozlop, Matheo et Gregorio de Bedege, Luca, filio Pauli, Blasio litterato, filio Stephani et Petro Magno de Uthwes nobilibus presentibus accedendo easdem iuxta demonstrationem dicti domini abbatis circumquaque reambulando, quia idem dominus abbas solum in dominio duarum sessionum in dicta Nozlop in linea occidentali ex opposito ecclesie Beate Margarethe virginis in eadem fundate existentium, necnon terrarum sexaginta quinque, fenilium ad triginta ac silve ad decem et octo iugera regalis mensure se extendentium et retro easdem duas sessiones penes portiones possessionarias viri magnifici domini Nicolai de Gara, regni Hungarie palatini, ab aquilone versus occidentem usque terminos et limites metales eiusdem alterius portionis dicte ecclesie de Beel, alias a nobilibus de Merethe, sicuti dictus dominus abbas exhibitionibus quarumdam litterarum causalium formam possessionarie reambulationis et statutionis dicte ecclesie de Beel superinde executarum in se continentium dictos regium et vestrum homines certificasset per formam iuris nomine portionis dicte sue ecclesie de Beel Merethe vocate per priorem abbatem eiusdem ecclesie reoptente et certis metis distincte adiacentium repertus extitisset, prescriptaque portio possessionaria antefati domini palatini in dicta Nozlop ab aquilone sita terram scilicet ad unum aratrum, silvam ad quinquaginta ac fenilia ad octoginta iugera regalis mensure, uti visu consederare potuissent, in se continens, sub certis et apparentibus metis a dicta pacifica portione dicti domini abbatis ab aquilone distincta et noviter terre reginali ac portionarie condam Demetrii Magni, filii Luca, de dicta Nozlop sine heredibus defuncti apud manus dicti domini palatini reperta fuisset et sic abruptis et anullatis dictis metis palatinalibus evidentibus, quas scilicet metas prefati nobiles de Nozlup veras fore et prelibatas portiones antefatorum dominorum palatini et abbatis a se se distinguere retulissent, de ipsa portione palatinali propter ipsius exiguam quantitatem defectum et vacuitatem predictarum terrarum, silve et feneti dicti domini abbatis resarcire, conplere et recuperate nequivissent et ob hoc de portionibus possessionariis antefatorum nobilium, ut puta, terram arabilem unius ac spinosam et dumosam similiter unius et medii ac silvam consimiliter medii aratrorum et fenilia sedecim falcastra regalis mensure in se continentibus, quas scilicet idem dominus abbas per eosdem nobiles a prescriptis terris ac feneto et silva suis occupatas esse astruxisset, secundum demonstrationem eiusdem a metis angularibus prescripte pacifice portionis eiusdem domini abbatis a parte dicte possessionis Merethe adiacentibus undique ab occidentali, meridionali et orientali partibus circumeundo, girando et usque ad metas posteriores prelibati domini palatini currendo defectum et vacuitatem predictarum terrarum ac feneti et silve antelati domini abbatis resarcire, recuperare et complere, eidemque domino abbati et sue ecclesie antefate iure sibi incumbente perpetuo possidendas relinquere et conmittere voluisset, sed huic statutioni memorati Elias et Gregorius ac alter Gregorius, filius Nicolai et Petrus, filius Iohannis, ut premittitur, inibi personaliter adherendo ac aliquas metas apparentes inter portiones per ipsos hactenus possessas et antefati domini abbatis pacificam, quas prelibatus dominus abbas tempore divisionis eorum inter se in suum et ecclesie sue preiudicium tacite et sinistre erectas extitisse asseruisset cumulatas et agregatas fore demonstrando contradictione obviassent; ideo idem homo regius presente dicto vestro testimonio dictam terram litigiosam et prohibitam ad tria aratra ac fenilia ad sedecim falcastra regalis mensure sufficere una cum aliis probis visu considerando ac regali mensura mensurando sine omni falsitate, Deum et eius iustitiam ferendo pre oculis estimasset et in ipsa estimatione partibus contentantibus et sibi invicem non contradicentibus prefatos Gregorium, filium Nicolai et Petrum, filium Iohannis rationem premisse contradictionis eorum reddituros contra annotatum dominum abbatem ad octavas Beati Michaelis archangeli [1408. okt. 6.] regie maiestatis specialem in presentiam citavissent.||
Quibus exhibitis prefatus dominus abbas rationem premisse contradictorie inhibitionis assignari postulasset per utrosque Gregorium ac Eliam et Petrum supradictos. Quo audito Nicolaus de Uthwes pro predictis in causam attractis cum procuratoriis litteris vestris in ipsam regiam specialem exurgendo presentiam respondisset ex adverso, quod ipsi uterque Gregorius ac Elias et Petrus tempore prescripte possessionarie statutionis dicto domino abbati et sue ecclesie fiende pro eo prohibitionem fecissent prenotatam, quia ipsa portio possessionaria, quam dictus dominus abbas sibi et sue ecclesie statui facere voluisset, eisdem vigore instrumentali pertineret, que instrumenta iidem non ad tunc, sed in termino ulteriori per ipsum dominum regem eis dando exhibere prompti essent et parati. Unde ipse dominus noster rex his perceptis iudicans conmisisset eo modo, ut prefati uterque Gregorius ac Elias et Petrus universa litteralia eorum instrumenta, si que in facto dicte portionis possessionarie haberent confecta, in octavis festi Epiphaniarum Domini tunc venturis [1409. jan. 13.] exhibere tenerentur coram ipso, quibus visis iudicium et iustitiam facere valeret in premissis inter partes, prout dictaret ordo iuris.||
A quibus quidem octavis festi Epiphaniarum Domini dum prescripta instrumentalis exhibitio inter ipsas partes legitima evocations, trina forensique proclamatione adversus dictos nobiles de Nozlop executis currendo, ultimatim serie litterarum eiusdem domini nostri regis dilationalium predictas octavas festi Beati Iacobi apostoli [1409. aug. 1.] prerogative attigisset.||
Denique ipsis octavis occurrentibus prefatus dominus Martinus abbas personaliter in eandem specialem dicti domini nostri regis veniendo presentiam prescripta litteralia instrumenta per prefatos in causam attractos exhiberi assumpta per eosdem exhiberi postulasset coram ipso. Quo percepto prefatus Elias de Nozlop pro se personaliter et pro prescriptis utrisque Gregorio et Petro cum procuratoriis litteris vestris in eiusdem domini nostri regis specialem exurgens presentiam pro premissis per ipsos exhibere assumptibus litteralibus instrumentis quasdam duas litteras, unam scilicet olim comitis Pauli, iudicis curie regie, privilegialem et aliam antefati domini nostri regis patentem eiusdem produxisset ad examen.||
In quarum prima, dicti scilicet Pauli iudicis privilegiali littera in Wyssegrad duodecimo die octavarum festi Nativitatis Beati Iohannis Baptiste anno Domini millesimo trecentesimo quatragesimo (!) sexto [1346. júl. 12.] suborta repertum fuisset, quomodo Nicolaus, filius Ioaka, de dicta Nozlop medietatem eiusdem loci sessionalis in eadem possessione Nozlop vocata prope ecclesiam Beate Margarethe virginis ibidem a parte occidentis adiacentem simul cum triginta quinque iugeribus terrarum arabilium ac aliis suis utilitatibus, metis, terminis litteris in eisdem conscriptis a nobili domina relicta Mathei, filii Iohannis filii Cheep, de prelibata Nozlop lite mediante per modum iudicarium reobtinuisset.||
Secunda namque earum prefati domini nostri regis, ut puta, patens littera octavo die congregationis sue generalis per ipsum universitati nobilitatium comitatus Vesprimiensis octavo die festi Beati Georgii martiris tunc proxime preteriti [1409. máj. 1.] confecta expressisset, quod vicecomes, iudices nobilium, iuratique assessores dicte congregationis ad instantiam prefatorum Elie, filii Andree, Gregorii, filii Petri, Luce, filii Pauli, Nicolai, filii Iohannis, Gregorii, filii Nicolai, Iohannis, Georgii, nec non Petri, filii Iohannis de eadem Nozlop per eundem dominum nostrum regem requisiti ad fidem eorum Deo debitam, fidelitatemque sibi et sacro suo regio dyademati conservandam pro dicenda veritate et iustitia observanda sibi prestitam id, ut prescripti nobiles de Nozlop et eorum predecessores semper et ab antiquo in dicta possessione Nozlop veri nobiles extitissent unamini testificatione affirmassent.||
Premissarum itaque litterarum per prefatum Eliam suo et predictorum aliorum in causam attractorum nominibus, modo quo supra, coram dicto domino nostro rege productarum exhibitionibus factis et earum continentiis perlectis et intellectis, partibusque predictis suo modo exhibitis, dictisque partibus nulla plura instrumenta preter preexhibita facto in premisso ad tunc vel in futurum exhibere posse referentibus, pretacto namque Elia in sua, aliorumque predictorum in causam attractorum personis se et dictos alios in causam attractos de prescripta mensuratione et estimatione vacuitatis et defectus ipsius terre litigiose per prefatos regium et vestrum homines, modo quo supra, facta contentari nolle, sed se ac eosdem ad vice iteratam mensurationem et estimationem dicte terre litigiose accedere velle indicante, ipse dominus noster rex easdem partes ad replicatam reambulationem, mensurationem et estimationem sepefate terre litigiose modo subnotato fiendam transmittens, fidelitati vestre firmiter precipiendo mandasset, quatenus vestros mitteretis homines pro utrisque partibus pro testimoniis fide dignos, quibus presentibus homo suus regius de curia sua regia ad id specialiter transmissus in octavis festi Nativitatis Beate Marie Virginis tunc venturis [1409. szept. 15.] et aliis diebus ad id aptis et sufficientibus ad faciem dicte possessionis Nozlop vocate et per consequens dicte terre quatuor aratrorum vicinis et conmetaneis suis universis inibi legitime convocatis et partibus vel earum legitimis procuratoribus presentibus accedendo eandem terram litigiosam videlicet quatuor aratrorum iuxta demonstrationem dicti domini abbatis vel legitimi sui procuratoris a prescriptis prioribus metis angularibus penes predictam terram reginalem apud manus prefati domini palatini habitam a parte predicte possessionis Merethe nuncupate incipiendo undique et circumquoque ab occidentali, meridionali et orientali partibus currendo et versus aquilonem, versus posteriores et finales metas dicti domini palatini currendo eandem terram litigiosam prescripto modo recaptivatam, mensuratam et estimatam prelibata pacifica portione dicti domini abbatis in eadem inclusa de novo et denuo visa ipsius qualitate, quantitate et fructuositate, regali mensura mensurando una cum aliis probis et nobilibus viris, odio, favore, amore partium quibuslibet (!) posttergatis, sine omni falsitate, Deum et eius iustitiam ferendo pre oculis consideraret et mensuraret lege regni requirente; et si dicta terra litigiosa simul cum predicta pacifica portione dicti domini abbatis solum ad dicta quatuor aratra seu minus secundum condignam mensuram reperta et agnita fieret, extunc eandem solam ad dicta quatuor aratra plenam, seu defectum et vacuitatem aliquam patientem a prescripta portione palatinali certis metis distinctam, si vero eadem terra litigiosa in aliqua sui parte et plenitudine residuitatis superflua ultra dicta quatuor aratra regalis mensure se extenderet, extunc ipsa dumtaxat quatuor aratra de ipsa excidendo eidem domino abbati et sue ecclesie antedicte statueret et conmitteret iure sibi incumbenti perpetuo possidenda, residuitate et superfluitate ipsius terre dictis nobilibus de Nozlop in causam attractis quiete et pacifice remanentibus, contradictione dictarum partium sibi invicem et aliorum quorumlibet previa ratione obviare non valente; et post hec premissorum seriem, ut fieret expediens, ad octavas festi Beati Michaelis archangeli tunc venturas [1409. okt. 6.] sue speciali presentie fideliter rescriberetis maiestati.||
Secunda autem ipsarum, vestrarum scilicet rescriptionalis, septimo die octavarum festi Nativitatis Beate Marie Virginis anno Domini millesimo quadringentesimo nono [1409. szept. 22.] preteritarum confecta exprimebat, quod regius et vester homines litteris in eisdem nominati ad dictam iudiciariam conmissionem prefati domini nostri regis transmissi in dictis octavis festi Nativitatis Beate Marie Virginis [1409. szept. 15.] et aliis diebus ad id aptis et sufficientibus ad faciem dicte possessionis Nozlop vocate et per consequens ipsius terre litigiose quatuor aratrorum vicinis et conmetaneis suis universis inibi legitime convocatis et ipsis ac predicto domino fratre Martino abbate presentibus, dictis nobilibus de Nozlop in causam attractis non conparentibus, nec mittentibus, accedendo dictam terram litigiosam quatuor aratrorum secundum demonstrationem predicti domini fratris Martini abbatis a prescriptis metis angularibus penes dictam terram reginalem erga manus domini Nicolai de Gara habitam a parte possessionis Merethe incipiendo undique et circumquaque ab occidentali, meridionali et orientali partibus currendo, versus aquilonem usque posteriores et finales metas dicti domini Nicolai palatini currendo, de novo et ex novo visa ipsius qualitate, quantitate et valore una cum aliis probis viris iuxta premissam primariam mensurationem lege regni exigente estimando, quia predicta terra litigiosa simul cum iam dicta pacifica portione ipsius domini abbatis solum ad dicta quatuor aratra, imo minus secundum condignam mensurationem eiusdem reperta et agnita fuisset, ideo premissam terram quatuor aratrorum in dicta possessione Nozlop excidendo prelibato domino abbati et sue ecclesie statuisset et conmisisset iure eis incumbenti perpetuo possidendam contradictione dictorum nobilium de Nozlop in causam attractorum et aliorum quorumlibet previa ratione non obstante.||
Quarum exhibitionibus factis, prefatoque procuratore Elie eundem Eliam cum omnibus fratribus suis generationalibus tempore prescriptarum mensurationis, estimationis et statutionis possessionarie predictam latam sententiam ipsius domini nostri regis de totali portione ipsorum possessionaria tam in locis sessionalibus et ortis, quam in terris, fenetis et silvis in prelibata possessione Nozlop habitis exclusum fuisse et nunc absque aliquali portione particulari eiectum in eorum nobilitatis diffamiam in laribus alienis residere allegante, eadem partes per nos et prelibatum dominum nostrum regem, suosque prelatos et barones eis in premissis iuris conplementum inplorarunt elargiri.||
Verum licet memoratus condam frater Martinus abbas de dicta Beel vigore prescripte sententie et iudiciarie conmissionis antefati domini nostri regis dictam terram quatuor aratrorum ipsius ecclesie de Beel consueta mensura aratrorum obmissa, disruptis etiam et abolitis prescriptis evidentibus metis portionem ipsius ecclesie sue de Beel a portione dictarum nobilium de Nozlop distingentibus et separantibus cum mensura regali et non usuali mensurari faciendo, totamque portionem possessionariam ipsius Elie de Nozlop et fratrum suorum tam in locis sessionalibus et ortis, quam etiam in terris, fenetis et silvis cum ipsa mensura regali penitus includendo sibi ipsi, dicteque ecclesie de Beel statui facere procuraverit; tamen quia in prescripto anno dominice incarnationis millesimo centesimo tricesimo quinto [1135.] prefatus dominus Bela rex in prescriptio predio Nozlop solum terram ad quatuor aratra cum arboribus fructiferis, silva et feneto humano usui sufficientia pretitulatis octo personis aratorum dedisse et assignasse, in predicto autem anno Verbi incarnate millesimo trecentesimo trecesimo secundo [1332.] pretacti olim nobiles de Nozlop, predecessores scilicet dicti Elie, una cum dicto condam magistro Chenyk Bohemo iuxta continentias litterarum dicti domini Karoli regis presentibus regio et vestro hominibus terram seu portionem ipsorum in dicta Nozlop habitam a portione eiusdem magistri Chenyk ac terra reginali, nec non terra ecclesie de Beel quatuor aratrorum metaliter distinxisse et a tempore huiusmodi metalis distinctionis iidem nobiles, consequenterque antefatus Elias et ceteri ipsorum successores usque prefati condam domini Martini abbatis inhouate (!) litis motionem semper sub vere et sincere nobilitatis titulo in dicta portione ipsorum de Nozlop possessionaria sub premissa metali limitatione inmobiliter prestitisse, temporeque prescripte primarie mensurationis ipsius terre contentiose quatuor aratrorum eedem mete terram dicte ecclesie de Beel a portione eorumdem nobilium de Nozlop distinguentes et separantes adhuc in eorum pristinis locis evidenter et apparenter reperte extitisse ex prescriptis processibus perspicue adinveniebantur et ob hoc predicta iudicaria sententia annotati domini nostri regis, modo quo supra, pro parte prefati domini abbatis prolata conrumpi et anullari, predictaque portio possessionaria antefati Elie, filii Andree et fratrum suorum generationalium in prelibata Nozlop per ipsos et eorum priores tenta et possessa eidem Elie rursum restitui, prescripta vero portio dicte ecclesie de Beel, puta in locis sessionalibus pro dictis octo aratoribus, octo sessiones more aliorum iobagionum inibi et alibi circumquaque sessiones mediocri statu habentium, necnon terram quatuor aratrorum usualium et non regalium ac fenetum, silva ad instar aliorum iobagionum inibi circumiacentibus villis non maius, nec minus, sed usu et mediante mediocritate terras aratris singulis arantium ac fena et silva utentium et possidentium usuali mensura ipsi ecclesie de Beel extradare debere prefato domino nostro regi et nobis, dictisque suis prelatis, baronibus et regni sui proceribus in ipsa sede pro tribunali consedentibus et diu diserentibus manifeste agnosscebantur et pro eo eandem iudiciariam sententiam prefati domini nostri regis primariam corrumpentes et anulantes ad ipsasque restatutionem et extradationem possessionarium modo subnotato fiendam regium et vestros homilies transmittentes, vestram amicitiam presentibus petimus diligenter, quatenus vestras mittatis homines pro utrisque partibus pro testimoniis fide dignos, quibus presentibus magistri Georgius de Bako vel Iohannes de Wasad aut Thomas de Demsed seu alter Thomas de Kyraly sive Stephanus de Gyula neve Iohannes de Mohora aut Paulus de Pernez, curie regie notarii, aliis absentibus homo regius de ipsa curia regia per nos ad id specialiter transmissus vigesimo quarto die festi Beati Michaelis archangeli nunc venturi [1423. okt. 22.] et aliis diebus ad id aptis et sufficientibus ad faciem dicte possessionis Nozlop vocate vicinis et conmetaneis suis universis inibi legitime convocatis et partibus vel earum legitimis procuratoribus presentibus accedendo, primo prelibatam portionem possessionariam annotati Elie, filii Andree et fratrum suorum per premissam iudiciariam et diffinitivam sententiam antefati domini nostri regis ab ipsis alienatam cum omnibus suis utilitatibus et pertinentiis eidem Elie et fratribus suis, quibus congruit, eorumque heredibus restatuat et conmitat (!) iure sub pristino eis incumbenti possidendam et tandem ibidem in portione palatinali ac aliis villis circumiacentibus cunctorum sessiones populates mediocri statu habentium et terram singulis aratris mediocri usu et moderamine arantium ac feneta et silvam ad sessiones sinculas (!) uti et frui solitorum revideat, conspiciat et diligenter examinet. Quibus revisis et examinatis prescriptam portionem dicte ecclesie de Beel in eadem Nozlop, habitam, puta in locis sessionalibus pro dictis octo aratoribus octo sessiones in ea parte, ubi ante inhovationem (!) presentis litis ipsa ecclesia de Beel loca sessionum pacifice possedisse reperitur ad quantitam aliarum sessionum inibi in vicinitate mediocri quantitate adiacentium ac terram quatuor aratrorum usualium adinstar aliorum circumiacentium iobagionum singulis aratris mediocri usu arantium, feneta etiam et silvam ad singulas sessiones prout alii singuli iobagiones viciniores mediocriter feneta et silvam utuntur et fruuntur cum mensura usuali et non regali a prescriptis metis angularibus incipiendo versus occidentem, meridiem et orientem partes mensurando et dictam pristinam pacificam portionem dicte ecclesie de Beel includendo, si eandem cum ipsa pacifica terra seu portione ipsius ecclesie conplere poterit bene quidem; alioquin vacuitatem et defectum earumdem de prescripta portione antefate Elie et fratrum suorum excidendo et more dictorum aliorum iobagionum mediocri usu existentium conplendo eidem domino fratri Michaeli abbati et per consequens dicte ecciesie de Beel relinquat et conmittat perpetuo possidendam, contradictione et non venientia ipsarum partium sibi invicem et aliorum quorumlibet non obstantibus. Et post hec ipsarum possessionarie restatutionis, revisionis et extradationis seriem, ut fierit expediens, ad octavas festi Beati Michaelis archangeli nunc venturas [1423. okt. 6.] domino nostro regi fideliter rescribatis. Datum Bude, sexagesimo septimo die [octavarum festi] Beati Iacobi apostoli antedictarum, anno Domini millesimo quadringentesimo vigesimo tertio. [1423. okt. 6.]