Magnifico viro, domino Nicolao de Gara, regni Ungarie palatino et iudici Comanorum conventus monasterii Sancti Martini Sacri Montis Pannonie amiciciam et honoris continuum incrementum. Vestra noverit magnificencia nos litteras serenissimi principis, domini Sigismundi, Dei gracia Romanorum regis semper augusti ac Ungarie, Bohemie etc. regis, domini nostri graciosi pro religioso viro domino fratre Michaele, abbate de Beel et conventui loci eiusdem loquentes ad inquisiciones, evocaciones, citaciones, prohibiciones aliarumque litterarum exhibiciones et ad alia omnia, que iuxta regni consuetudinem talibus in processibus fieri consueverunt facienda, per anni circulum gracioso datas et concessas recepisse, iuxta quarum continenciam una cum Francisco de Gych homine regio in eisdem litteris annualibus nominatim conscripto nostrum hominem, videlicet fratrem Paulum unum ex nobis fratribus conventualibus ad infrascriptam inquisicionem faciendam nostro pro testimonio transmisimus fidedignum, qui tandem exinde ad nos reversi retulerunt in hunc modum, quomodo ipsi feria tercia proxima post festum Beati Georgii martiris de novo elapsum in comitatu Vesprimiensi procedendo ab omnibus, quibus decens et opportunum fuisset, nobilibus videlicet et ignobilibus ac alterius cuiusvis status et condicionis dicti comitatus hominibus palam et oculte diligenter investigando talem scivissent veritatem, quomodo dominus Iohannes de Elwed cantor et canonicus ecclesie Vesprimiensis ex consensu et induccione succentoris eiusdem ecclesie, una cum Aniano filio Anthonii et Gregorio filio Stephani nobilibus de Vamuss, Anthonio de Kereky et Briccio Sartore officialibus de Berinhida, Bartholomeo filio Dionisi, Luca filio Briccii et Nicolao, Paulo Carpentario de Senthtamasfalwa, Thoma de Kal, Nicolao, Iacobo litteratis famulantibus ceterisque compluribus suis infrascriptis, item Bartholomeo filio Laurencii, Giliano, Gallo villico, Urbano, Benedicto, Simone, Iacobo Sal dicto, Francisco, Fabiano villico, Georgio filio Michaelis, Dominico filio eiusdem, Iacobo et Iohanne filiis Andree, Petro filio Iohannis, Michaele Akol dicti, Francisco, Mauricio, Georgio dicto Segelemir, Stephano, Ladislao Carpentario, Elia, Stephano filio Blasi, et Georgio Ruffo filio Valentini populis de Hadmasker quendam iobagionem predicti domini abbatis et conventus, videlicet Paulum filium Thome de Akol, feria quinta proxima ante festum Beati Regis Stephani de novo elapsum cum curru suo et bobus de Alba in libera via ad domum suam proficiscentem idem dominus Iohannes, una cum prescriptis suis complicibus prope possessionem Ws reperinendo ab eodem Paulo currum cum bobus ceteraque bona erga ipsum reperta more predonico spoliando recepissent et, quo ipsorum placuisset voluntati, fecissent potencia mediante in preiudicium ipsius domini abbatis et conventus valde magnum. Datum quinto die diei inquisicionis antedicte, anno Domini millesimo quadringentesimo vigesimo quarto.