Nos conventus Sancti Benedicti de Iuxtagron memorie conmendamus, quod religiosus vir frater Stephanus, legitimus procurator religiosi domini fratris Michaelis, abbatis monasterii Beati Mauritii de Beel ac conventus loci eiusdem eorumdem in personis ad nostram veniens presentiam per modum protestationis et prohibitionis nobis significare curavit, quomodo magnificus vir dominus Petrus de Lewa, pridem agazonum regalium magister, quedam tributa prescriptorum domini abbatis et conventus seu fratrum de dicto monasterio Beel vocato in oppido Baath seu Forum Regine vocato exigi consuetum, necnon in aliis duobus locis, videlicet villis Solmus et Almas vocatis similiter exigi consuetum, ad ipsum tributum capitale in Baath habita (!) pertinentibus occupative conservasset et tandem prescriptum tributum capitale in dicta Baath exigi consuetum solummodo annotatis abbati et conventui seu fratribus de dicto monasterio Beel vocato reliquisset et reassignasset possidendum; alia vero tributa in pretactis duobus locis exigi consueta ad predictum tributum capitale in Baath pertinentibus pro se occupando conservaret de presenti potentia sua mediante in preiudicium et dampnum ac (!) iuris prescripti monasterii de Beel et per consequens abbatis et fratrum loci eiusdem. Unde facto huiusmodi protestationis memoratum magnificum virum dominum Petrum Chech de Lewa et alios quoslibet ab occupatione, detentione dictorum tributorum in pretactis duobus locis exigi consuetorum ad ipsum tributum in Baath pertinentibus, fructuum et utilitatum eorumdem perceptione et percipifactione, seque in easdem intromissione quovis colore et ingenio quesito factis vel fiendis prohibuit contradicendo et contradixit inhibendo nominibus et in personis ut supra publice et manifeste harum litterarum nostrarum testimonio mediante. Datum in festo Sanctorum Cozme et Damiani martirum, anno Domini millesimo quadringentesimo vigesimo quarto. [1424. szept. 24.]