Serenissimo principi, domino Sigismundo, Dei gracia Romanorum regi semper augusto ac Hungarie, Bohemie, Dalmacie, Croacie etc. regi, domino metuendo conventus monasterii Sancti Martini Sacri Montis Pannonie oraciones in domino. Vestra noverit serenitas nos litteras vestras sumpma cum obediencia accepisse in hec verba:||
Sigismundus, Dei gracia Romanorum rex semper augustus ac Hungarie, Bohemie, Dalmacie, Croacie etc. rex fidelibus suis, conventui ecclesie Sancti Martini Sacri Montis Pannonie salutem et graciam. Dicitur nobis in personis religiosi viri, domini fratris Michaelis, abbatis monasterii Beatorum Mauricii et sociorum eius martirum de Beel et conventus loci eiusdem, quomodo Paulus de Zemen ex voluntate et permissione Iohannis filii Symonis bani de Morochyda, secundo die festi Assumpcionis Virginis gloriose proxime preteriti, anno in presenti, una cum Iohanne Terebes, Luca, Clemente, Michaele, Mathia familiaribus suis, item Fabiano, Luca, Mathia, Paulo iobagionibus eiusdem Iohannis domini sui in possessione sua Gwmerw vocata, officiolatu videlicet suo commorantibus de eadem Gwmerw progredientes quoddam pratum seu fenilem intra metas possessionis Peech vocate habitum, quod Valentinus familiaris Blasii et Stephani dictis Barath de Iaar discreto viro domino Sebastiano capellano et plebano dictorum domini abbatis et conventus de Kayar ad falcandum ex certis racionibus anno in presenti donasset et dum idem Sebastianus plebanus ipsum pratum per iobagiones antedictorum abbatis et conventus, videlicet Dyonisium, Cobos, Damianum, Gregorium et Laurencium de Kayar falcari procurasset, tunc idem Paulus de Zemen predictis familiaribus et iobagionibus ipsum dominum Sebastianum reperiendo omni sua sine culpa interficere voluissent, nisi fuge presidio evadere potuisset, nichilominus tamen equum ipsius et vestes aliaque bona et res tunc ibidem reperta abstulissent et, quo eorum placuisset voluntati, abduxissent, dictos vero falcatores, iobagiones videlicet dictorum domini abbatis et conventus ictibus sagittarum ac verberum et vulnerum plagis multipharie afflixissent eosdem semivivos ibidem relinquendo, eorundem res et bona erga ipsos tunc ibidem reperiendo more predonico ab eisdem auferendo potencia ipsorum mediante in preiudicium et dampnum dictorum domini abbatis et sui conventus aliorumque predictorum multum grande. Super quo fidelitati vestre firmiter precipiendo mandamus, quatenus vestrum mittatis hominem pro testimonio fidedignum, quo presente Franciscus sive Dominicus neve Michael sin Georgius de Gych vel Nicolaus de Iwtas aut Iohannes sin Petrus sive Mauricius filius eiusdem de eadem aliis absentibus homo noster ab omnibus, quibus incumbit meram de premissis experiatur veritatem, quam tandem nobis fideliter rescribatis. Datum Bude, secundo die festi Exaltacionis Sancte Crucis, anno Domini millesimo CCCCmo vigesimo quarto.||
Unde nos mandatis vestre serenitatis in omnibus obedire cupientes, ut tenemur, una cum predicto Nicolao de Iutas homine vestro nostrum hominem, videlicet religiosum virum, fratrem Petrum sacerdotem, cantorem chori ecclesie nostre, unum ex nobis ad premissa peragenda pro testimonio transmisimus fidedignum, qui tandem exinde ad nos regressi nobis uniformiter retullerunt, quomodo ipsi feria quarta proxima post festum Beati Michaelis archangeli proxime preteritum in comitatu Wesprimiensi simul procedendo a nobilibus et ignobilibus ac alterius cuiusvis status et condicionis comprovincialibus dicti comitatus Wesprimiensis hominibus, a quibus decens et oportunum fuisset palam et oculte diligenterque inquirendo omnia premissa et quevis premissorum singula sic et eatenus facta esse rescivissent, quemadmodum vestre dictum extitisset serenitati et tenor per omnia continet litterarum vestrarum predictarum. Datum quinto die inquisicionis antedicte, anno Domini supradicto.