Venerabilis et religiose vir, domine et amice noster perhonorande. Referentibus nobis iobagionibus ecclesie nostre in possessions Gyarmath residentibus noveritis nos percepisse, quomodo novissime quidam familiares vestri duos equos ipsorum iobagionum nostrorum ratione proventuum seu censuum cuiusdam terre ecclesie vestre Ponyuad appellate in annis tertio, secundo et presenti provenire debentium, ut iidem familiares vestri retulissent, necnon duo falcastra eorumdem iobagionum nostrorum in propria nostra terra afferendo abstulissent et deportassent, cum tamen, prout iidem nostri iobagiones dicunt, in singulis annis preteritis de premissis vestris proventibus satisfactionem omnimodam inpendissent preter annum presentem; si autem prefati iobagiones nostri per vestros officiales ad id requisiti extitissent, etiam de presenti anno satisfactionem debitam exhibere curavissent. De qua quidem vagii receptione repentina vobis multum inproperamus. Quare vestre reverentie intime rogamus amicitiam, quatenus predicta vagia ablata reddi et restui (!) faciendo vestrum certum hominem ad certum terminum per vos assignandum ad pretactam possessionem Gyarmath destinare velitis et ibi nos ex parte predictorum iobagionum nostrorum de omnibus vestris proventibus, quibus vobis tenerentur, omnimodam satisfactionem inpendere faciemus. Ceterum prout pridem vobis, reverende, de feudo dicte terre vestre Ponyuad vobis mentionem feceramus, ut ipsam nobis et iobagionibus nostris pro certa et debita pecunie quantitate in arendam annuatim nobis dare dignaremini, quitquid (!) in eisdem deliberassetis nobis vestris in litteris insinuare velitis. Datum in Chorna, feria tertia proxima ante festum Beati Laurentii martyris anno quadringentesimo vigesimo quarto. [1424. aug. 8.]||
Frater Anthonius, prepositus ecclesie de Chorna, vester amicus.||
[Cím]: Venerabili et religioso, Deoque devoto viro domino fratri Michaeli, abbati de Beel, domino et amico nostro perhonorando.