Nos conventus monasterii Sancti Martini Sacri Montis Pannonie memorie commendamus, quod religiosus vir dominus frater Michael, abbas monasterii de Beel Bakoniensi ad nostram personaliter veniendo presenciam per modum protestacionis nobis significare curavit, quomodo Iohannes filius condam Symonis bani de Morochyda racione feudalis seu in arenda conservacionis possessionis ipsius ecclesie de Beel Arpad vocate et molendinorum in fluvio Raba intra metas eiusdem possessionis currencium et aliarum utilitatum eiusdem possessionis quinque florenos puri auri iusti et legalis ponderis seu pecuniam usualem eosdem quinque florenos aureos valentem mediantibus litteris palatinalibus super inde confectis die Medie Quadragesime proxime preterita minime, ut debebat, persolvisset, se in gravaminibus et obligaminibus in eisdem litteris palatinalibus expressatis convinci permisisset, super quibus omnibus premissis predictus dominus Michael abbas presentes litteras nostras patentes petivit donari, quod et fecimus communi iusticia requirente. Datum in festo Beati Ambrosii episcopi et confessoris, anno Domini millesimo quadringentesimo vigesimo quinto.