Serenissimo principi domino Sigismundo, Dei gratia Romanorum regi semper augusto ac Hungarie, Bohemie, Dalmatie, Croatie regi, domino eorum metuendo capitulum ecclesie Iauriensis orationes in Domino debitas et devotas. Vestra noverit serenitas nos litteras vestras sumpma cum obedientia recepisse in hec verba:||
Sigismundus ... etc. fidelibus suis capitulo ecclesie Iauriensis salutem et gratiam. Dicitur nobis in personis religiosi viri domini fratris Michaelis, abbatis monasterii Beatorum Mauritii et sociorum eius de Beet et conventus loci eiusdem, quomodo Paulus de Zemere ex voluntate et permissione Iohannis, filii Symonis bani de Morochida secundo die festi Assumptionis Virgino gloriose proxime preteriti, anno in presenti [1425. aug. 16.] una cum Iohanne Terebes, Luca, Clemente, Michaele, Mathia, familiaribus suis, item Fabiano, Luca, Clemente, Mathia, Paulo, iobagionibus eiusdem Iohannis domini sui in possessione Gewmerw vocata, officiolatu videlicet suo conmorantibus, de eadem Gewmerw progredientes quoddam pratum seu fenile inter metas possessionis Peech vocate habitum, quod Vallentinus familiaris Blasi et Stephanus dictus Barath de Zoar discreto viro domino Sebastiano, capellano et plebano de Kayar dictorum domini abbatis et conventus, ad falcandum ex certis rationibus anno in presenti donassent et dum idem Sebastianus plebanus ipsum pratum per iobagiones antedictorum abbatis et conventus, videlicet Dyonisium, Tobos, Damianum, Gregorium et Laurentium de Kayar falcari procurasset, tunc idem Paulus de Zemere cum predictis familiaribus et iobagionibus ipsum dominum Sebastianum reperiendo omni sua sine culpa interficere voluissent, nisi fuge presidio evadere potuisset. Nichilominus tamen equum ipsius et vestes, aliaque bona et res tunc ibidem reperta abstulissent et quo eorum placuisset voluntati abduxissent, dictos vero fatcatores iobagiones, videlicet dictorum domini abbatis et conventus ictibus sagitarum ac verberibus, vulnerum plagis multipharie afflixissent eosdem semivivos ibidem relinquendo, eorumdem res et bona erga ipsos tunc ibidem reperiendo more predonico ab eisdem auferendo potentia ipsorum mediante in preiudicium et dampnum dictorum domini abbati et sui conventus ac aliorumque (!) predictorum multum grande. Super quo fidelitati vestre precipiendo mandamus, quatenus vestrum mittatis hominem pro testimonio fide dignum, quo presente Franciscus sive Dominicus neve Michael sive Georgius de Gych vel Nicolaus de Iutas aut Iohannes sive Petrus sive Mauritius, filius eiusdem, de eadem, aliis absentibus homo noster ab omnibus, quibus incumbit, meram de premissis experiat veritatem, quam tandem nobis fideliter rescribatis. Datum Bude, secundo die festi Exaltationis Sancte Crucis, anno Domini millesimo quadringentesimo vigesimo quinto. [1425. szept. 14.]||
Unde nos mandatis vestre serenitatis in omnibus obedire cupientes, ut tenemur, una cum prefato Mychaele de Gych, homine vestro, nostrum hominem, videlicet magistrum Iohannem, chori ecclesie nostre succentorem, ad premissa peragenda pro testimonio transmisissemus fide dignum, qui tandem exinde ad nos reversi nobis uniformiter retulerunt quomodo ipsi feria quarta proxima post festum Beati Michaelis archangeli proxime preteritum [1425. okt. 3.] in comitatu Wesprimiensi simul procedendo a nobilibus et ignobilibus ac alterius cuiusvis status et condicionis conprovincialibus dicti comitatus Wesprimiensis hominibus, a quibus decens et oportunum fuisset, palam et oculte, diligenterque inquirendo omnia premissa et quevis premissorum singula sic et eatenus facta esse rescivissent, quemadmodum vestre dictum extitisset serenitati et tenor per omnia continet litterarum vestrarum predictarum. Datum quinto die inquisitionis antedicte, anno Domini supradicto. [1425. okt. 7.]