Nos conventus monasterii Sancti Martini Sacri Montis Pannonie memorie commendamus, quod cum nos ad instanciam et legittimam peticionem religiosi viri, domini fratris Michaelis, abbatis de Beel religiosum virum fratrem Gregorium sacerdotem, unum ex nobis ad videndam quandam solucionem nonaginta florenorum novorum et trium tunellarum in aliis nostris litteris expressatam termino et loco in eisdem litteris nostris specificatis ac modo fiendam pro testimonio transmisissemus fidedignum, qui tandem exinde ad nos regressus nobis retulit seriose, quod cum ipse in festo Beati Briccii episcopi et confessoris proxime preterito ad possessionem eiusdem domini abbatis Kayar appellatam accessisset, ubi, uti asserebatur, Briccius filius Marci dicti Teuk de Kyralfelde preallegato domino Michaeli abbati nonaginta florenorum nove monete et tres tunellas bonas persolvere debuisset, tandem tribus diebus continuis ipso festo Beati Briccii confessoris incluso expectando dictus Briccius ad solucionem dictorum nonaginta florenorum novorum et trium tunellarum non venisset neque misisset, se in obligaminibus in aliis litteris nostris superinde confectis convinci permittendo, super quibus dictus dominus Michael abbas presentes litteras nostras sibi postulavit emitti, quod et fecimus communi iusticia regni requirente. Datum quinto die festi Beati Briccii episcopi et confessoris antedicti, anno Domini Mo CCCCo XXo nono.