Nos conventus monasterii Beati Michaelis archangeli de Chorna memorie commendamus, quod religiosus vir, Deoque devotus, frater Martinus, presbyter Ordinis Sancti Benedicti coram nobis personaliter constitutus, nominibus et in persona religiosorum virorum, dominorum, Nicolai, abbatis ac conventus monasterii Sancti Martini Sacri Montis Pannonie per modum protestacionis nobis significare curavit, quod egregius vir, dominus Nicolaus de Gara, Hungarie regni palatini filius, quoddam ipsorum predium Porwa vocatum in Bokonyo existens, una cum capella Beati Emerici in facie eiusdem predii fundata ac arabilibus terris cultis et incultis, silvis, nemoribus, pascuis, aliisque utilitatibus ad ipsum predium Porva pertinentibus pro se occupasset, occupatisque uteretur de presenti in preiudicium et dampnum prefati monasterii valde magnum, nonnulla edificia in facie eiusdem predii faciendo. Factaque huiusmodi protestacione prefatum egregium virum, dominum Nicolaum, filium palatini (et) alios quoslibet ab occupacione predicti predii ac aliis ad ipsum pertinentibus, necnon utensione, utilitatumque perceptione et percipi factione ac in dominium eiusdem predii et suarum pertinenciarum intromissione sibique ipsis apropriacione, statucione, necnon domorum edificacione ac aliorum habitacionum prohibuit contradicendo et contradixit inhibuendo publice et manifeste coram nobis presencium testimonio mediante. Datum in vigilia Beati Mathie apostoli anno Domini MCCCCXXXI. [1431. febr. 23.]