Serenissimo principi domino [Sigismu]ndo, Dei gracia Romanorum regi semper augusto ac Hungarie, Bohemie, Dalmacie, Croacie etc. regi, domino ipsorum metuendo conventus ecclesie Sancti Martini S[acrimon]tis Panonie oraciones in Domino debitas ac devotas. Vestra noverit celsitudo, quod cum nos omni cum reverencia, qua decuit, receptis litteris vestris annualibus mediocre [sigillo vestro] consignatis religioso viro, domino fratre Michaele abbati de Beel et conventui loci eiusdem ad inquisiciones, evocaciones, prohibiciones, necnon ad omnia alia, que [iuxta] regni vestri consuetudinem talibus in processibus fieri consueverunt facienda per anni circulum generaliter datis et graciose concessis nobisque preceptorie transmissis iuxta earundem continenciam una cum Petro filio Nicolai de Iuthas, homine vestro inter alios homines vestros in eisdem litteris vestris annualibus conscriptos nominaliter expresso nostrum hominem, videlicet fratrem Petrum unum ex nobis ad infrascriptam inquisicionem faciendam pro nostro testimonio fidedignum duxissemus destinandum, demum iidem exinde ad nos reversi nobis concorditer retullerunt, ut prelibatus homo vester simulcum eodem nostro testimonio feria tercia proxima ante festum Beatorum Tyburcii et Valeryani martirum proxime preteritum in comitatu Wesprimiensi procedendo ab omnibus, quibus decens et opportunum fuisset, nobilibus videlicet et ignobilibus ac alterius status et condicionis dicti comitatus hominibus palam et occulte diligenter investigando talem scivissent veritatem, quod cum nos alias, videlicet circa dominicam Quasi modo geniti dicti dominus Michael abbas de Beel ac conventus loci eiusdem quosdam familiares et iobagiones ipsorum ad excuciendas et tritulandas nonnullas fruges ipsorum in possessione reverendissimi in Christo patris domini Clementis episcopi Iauriensis Vazar vocata transmisissent, tunc Paulus filius Sebastiani, Dominicus et Iohannes filii Blasii, Petrus filius Anthonii, Paulus et Blasius filii Iohannis, Stephanus filius Georgii, Blasius filius Clementis, Paulus et Stephanus filii eiusdem, Andreas et Lampertus filii Petri, Anthonius filius Iohannis et Franciscus filius eiusdem, Iohannes filius Iohannis, alter Iohannes filius Pauli, Andreas filius Nicolai, Georgius dictus Thevely et Paulus dictus Gerse, Sebastianus filius Benedicti, Georgius filius Petri, Albertus filius eiusdem, Nicolaus Genchy dictus, nobiles de Thakachy una cum familiaribus et iobagionibus ipsorum de eadem Thakachy manibus armatis et potenciariis ad dictam possessionem Vazar veniendo ad excussionem et tritulandum dictarum frugum depellissent potencia mediante, lite tamen inter ipsos pendente, in preiudicium dicti domini abbatis et conventus [valde magnum]. Datum quinto die diei inquisicionis antedicte, anno Domini millesimo quadringentesimo tricesimo primo.