Serenissimo principi domino Sigismundo, Dei gracia Romanorum regi semper augusto ac Hungarie, Bohemie, Dalmacie, Croacie etc. regi, domino ipsorum gracioso conventus monasterii Sancti Martini Sacri Montis Panonie oraciones in Domino debitas ac devotas cum perpetua fidelitate. Litteris vestris annualibus ad inquisiciones, evocaciones, prohibiciones, metarum erecciones et renovaciones ac ad omnia alia, que talibus in processibus iuxta regni vestri consuetudinem de iure fieri consueverunt facienda pro religiosis viris, domino fratre Michaele, abbate de Beel et conventu loci eiusdem emanatis ac eisdem per vestram serenitatem graciose datis et concessis, nobis preceptorie directis ac per nos suprema cum obediencia receptis et iuxta earundem continenciam una cum Michaele de Gych, homine vestro in dictis litteris vestris annualibus inter alios homines vestros conscriptos nominaliter inserto nostrum hominem, videlicet fratrem Iohannem, unum ex nobis ad infrascriptam inquisicionem faciendam nostro pro testimonio transmisissemus fidedignum, qui tandem exinde ad nos reversi nobis uniformiter retulerunt, quod cum ipsi feria quinta proxima post festum Beate Marie Magdalene de novo elapsum in comitatu Wesprimiensi procedendo ab omnibus, quibus decens et opportunum fuisset, nobilibus videlicet et ignobilibus ac alterius status et condicionis dicti comitatus hominibus palam et oculte diligenter inquirendo de infrascriptis talem scivisset veritatem, quod Paulus filius Sebastiani, Dominicus et Iohannes filii Blasii, Petrus filius Anthonii, Paulus et Blasius filii Iohannis, Stephanus filius Georgii, Blasius filius Clementis, Paulus et Stephanus filii eiusdem, Andreas et Lampertus filii Petri, Anthonius filius Iohannis, Franciscus frater eiusdem, Iohannes filius Iohannis, alter Iohannes filius Pauli, Andreas filius Nicolai, Georgius dictus Thewely et Paulus dictus Gerseny, Sebastianus filius Benedicti, Georgius filius Petri, Albertus filius eiusdem et Nicolaus de Genchy nobiles de Thakachy ex induccione et voluntate nobilium dominarum consortum ipsorum una cum familiaribus et iobagionibus ipsorum de eadem Thakachy, feria secunda proxima ante festum Translacionis Beati Benedicti abbatis proxime preteritum manibus armatis et potenciariis ad faciem possessionis seu terre ecclesie ipsorum Ponvad vocate transivissent et de facie ipsius terre quamplures capecias seu decimas frugum ipsis de iure provenire debentes super currus ipsorum deportassent et, quo ipsorum placuisset voluntati fecissent potencia ipsorum mediante, lite tamen inter ipsos pendente in preiudicium ipsorum domini abbatis et conventus valde magnum. Datum septimo die inquisicionis antedicte, anno Domini millesimo quadringentesimo tricesimo primo.