Serenissimo principi domino Sigismundo, Dei gracia Romanorum regi semper augusto ac Hungarie, Bohemie, Dalmacie, Croacie etc. regi, domino ipsorum gracioso conventus monasterii Sancti Martini Sacri Montis Pannonie oraciones in Domino debitas ac devotas cum perpetua fidelitate. Litteris vestris annualibus ad inquisiciones, evocaciones, prohibiciones, metarum erecciones et renovaciones ac ad omnia alia, que talibus in processibus iuxta regni vestri consuetudinem de iure fieri consueverunt facienda pro religiosis viris domino fratre Michaele abbate de Beel et conventu loci eiusdem emanatis ac eisdem per vestram serenitatem graciose datis et concessis, nobis preceptorie directis ac per nos sumpma cum obediencia receptis et iuxta earundem continenciam una cum Michaele de Gych, homine vestro in dictis litteris vestris annualibus inter alios homines vestros conscriptos nominaliter inserto nostrum hominem, videlicet fratrem Iohannem sacerdotem, unum ex nobis ad infrascriptam inquisicionem faciendam nostro pro testimonio transmisissemus fidedignum, qui tandem exinde ad nos reversi nobis uniformiter retulerunt, quod cum ipsi feria quinta proxima post festum Beate Marie Magdalene de novo elapsum in comitatu Wesprimiensi procedendo ab omnibus, quibus decens et opportunum fuisset, nobilibus videlicet et ignobilibus ac alterius status et condicionis dicti comitatus hominibus palam et oculte diligenter inquirendo de infrascriptis talem scivissent veritatem, quod Gregorius Senthke[...]th dictus de Perew et Valentinus filius Gregorii de Weyen, familiares Stephani castellani de Cheznek circa festum Beati Augustini episcopi et confessoris manibus armatis et potenciariis ad possessionem domini abbatis transivissent Akol vocatam et unum equum Laurencii de ipsa Akol, iobagionis sui omni sine culpa minus iuste et indebite potencialiter deportassent et, quo ipsorum placuisset voluntati, fecissent potencia mediante in preiudicium et dampnum ipsius abbatis valdemagnum. Datum sexto die diei inquisicionis antedicte, anno Domini millesimo quadringentesimo tricesimo primo.