Conmissio baronum.||
Sigismundus, Dei gratia Romanorum imperator semper augustus ac Hungarie, Bohemie, Dalmatie, Croatie etc. rex, fidelibus nostris comiti vel vicecomiti et iudicibus nobilium comitatus Vesprimiensis salutem et gratiam. Dicitur nobis in persona religiosi viri domini fratris Michaelis, abbatis monasterii Sancti Mauricii de Beel et conventus loci eiusdem, quod Stephanus Sclavus, Petrus similiter Sclavus, Symon et Anthonius familiares et iobagiones nobilis domine relicte ac magistri Thome, canonici ecclesie Vesprimiensis, necnon Base et Ladislai, filiorum condam Benedicti de Debrencze (!) in eodem commorantes ex conmissione et mandato ipsorum domine relicte ac magistri Thome, Base et Ladislai, domine videlicet et dominorum suorum, feria quinta proxima ante festum Ad Vincula Beati Petri apostoli proxime preteritum [1434. júl. 29.] manibus armatis et potentiariis ad possessionem ipsorum domini abbatis et conventus Ganna appellatam irruendo quendam iobagionem eorum abbatis et conventus, nomine Paulum dictum Bencze, in eadem possessione Ganna conmorantem et dominam consortem eiusdem Pauli verbis illicitis et vituperiosis dehonestando diris verberum et vulnerum plagis affecissent; eo non contentus prefatus Base personaliter una cum Georgio de Usal, altero Georgio de Coltha, Stephano de Zerchek, Leonardo de Kisfalud, Bartholomeo castellanis de Zolnok, Nicolao de Koltha, Dominico Thanko, Georgio de Swmpath, Nicolao de Hollos familiaribus, item Petro Sclavo, Symone, Anthonio, Gregorio sartore, Stephano Sclavo, Blasio, Benedicto Suba, Petro, filio Thome, Anthonio, filio Mathie, Nicolao, Iohanne Fekethw, Laurentio, Stephano, filiis eiusdem, in Debrenthe predicta, item Dominico carpentario et Colomano in Iako possessionibus conmorantibus, iobagionibus scilicet suis et dictorum domine nobilis et fratrum suorum, similiter ex consensu, voluntate et instigatione ipsorum, feria sexta proxima ante predictum festum Ad Vincula Beati Petri apostoli [1434. júl. 30.] malitia preconcepta similiter manibus armatis et potentiariis ad predictam possessionem Ganna vocatam tempore nocturnali fractis hostiis domorum iobagionum in eadem residentium, universosque viros, mulieres et puellas de domibus et lectis ipsorum nudos extrahendo et verbis illicitis et vituperiosis dehonestando dire et acriter verberassent, quosdam denarios quatuor possesionum, Nustup videlicet, Polyan, Bursud et eiusdem Ganna, in domo et in scrinio Mathei villici depositos, quos idem dominus abbas de Beel exactoribus quinquagesime et sex denariorum de mandato nostro dare et amministrare debuisset, similiter fracto ipso scrinio ipsius Mathei villici excepissent, ipsumque Matheum villicum ac Paulum, Marcum, Andream, alterum Matheum, Thomam Sclavum et Demetrium, filium Stephani, in eadem Ganna conmorantes, captivassent, captivandoque et ligatis eorum manibus, universisque rebus et bonis in domibus ipsorum repertis, necnon equis, aratris, vaccis ac aliis animalibus omni eorum sine culpa ablatis et ad castrum ipsorum Debrenthe asportatis et abductis, ipsos iobagionis in ipsorum vinculis conservassent, conservarentque de presenti, easdemque res et bona eorumdem iobagionum ipsorum domini abbatis et conventus, quo ipsorum placuisset voluntati, fecissent potentia ipsorum mediante in preiudicium ipsorum domini abbatis et conventus valde magnum. Super quo suplicatum extitit, ipsis abbati et conventui per nos condignum remedium adhiberi et quia nos talismodi actus potentiarios simpliciter pertransire pati nolumus, igitur fidelitati vestre, firmiter precipiendo mandamus, quatenus receptis presentibus et rescita et comperta coram testimonio conventus ecclesie Sancti Martini Sacri Montis Panonie, quod per eundem conventum ad id presentium tenore destinare iubemus, ab omnibus vicinis et conmetaneis predictarum possessionum annotatorum abbatis et conventus nobilibusque conprovincialibus dicti comitatus, a quibus decet et licet, ad fidem eorum Deo debitam, fidelitatemque nobis et sacro nostro regio diademati conservandam de premissis mera certitudine veritatis, prefatos iobagiones predictorum abbatis et conventus per annotatum Base detentos, apud ipsumque et fratres suos predictos nunc in vinculis, ut dicitur, existentes de ipsa captivitate per eosdem Base et fratres suos libere emitti, resque et bona eorum ablatas et recepta reddi et indempniter restitui facientes ex parte eorumdem Base et fratrum suorum, nobilisque domine matris eorum super huiusmodi actibus potentiariis memorati abbatis et conventui merum iudicium et condignam iustitiam, debiteque satisfactionis complementum iuris ordine mediante impendere et exhibere debeatis auctoritate nostra harum serie vobis attributa et iustitia mediante. Secus non facientes in premissis; seriem namque premissorum, prout expediens fuerit, per vos et prefatum conventum ecclesie Sancti Martini nostre fideliter rescribi volumus maiestati. Presentes etiam perlectas reddi edicimus presentanti, quas sigillis nostris absentibus sigillo fidelis nostri reverendissimi in Christo patris domini Georgii, archiepiscopi Strigoniensis, vicarii nostre maiestatis, fecimus consignari. Datum Bude in vigilia festi Assumptionis Virginis gloriose, anno Domini millesimo quadringentesimo XXXIIIIo regnorum nostrorum anno Hungarie etc. quadragesimo octavo, Romanorum vigesimo quinto, Bohemie quintodecimo imperii vero secundo. [1433. aug. 14.]