Nicolaus episcopus, servus servorum Dei, venerabili fratri episcopo Iauriensi et dilectis filiis preposito ac lectore ecclesie Vesprimiensis salutem et apostolicam benedictionem. Conquesti sunt nobis venerabilis frater noster Gregorius, episcopus Milkoviensis, in civitate Strigoniensi residens, qui, ut asserit, monasterium Sancti Mauricii de Beel, ordinis Sancti Benedicti, Vesprimiensis diocesis, in commendam obtinet et conventus eiusdem, quod Thomas de Debrenthe, commendatarius monasterii Sancti Martini de Sancto Martino Sacri Montis Panonie, eiusdem ordinis, Ladislaus de dicta Debrenthe, Gregorius Filemeng de Eymcbeh et quidam alii clerici et laici in Iauriensi et dicta Vesprimiensi diocesi commorantes super quibusdam clenodiis, ornamentis et paramentis ecclesiasticis, bonis et rebus aliis ad dictum monasterium Sancti Mauricii legitime spectantibus iniuriantur eisdem. Ideoque discretioni vestre per apostolica scripta mandamus, quatenus vocatis, qui fuerint evocandi et auditis hinc inde propositis, quod iustum fuerit appellatione remota decernatis, facientes, quod decreveritis, per apostolicam censuram firmiter observari. Testes autem, qui fuerint nominati, si se gratia, odio vel timore subtraxerint, censura simili appellatione cessante compellatis veritati testimonium perhibere. Quod si non omnes hiis exequendis poteritis interesse, duo aut unus vestrum ea nichilominus exequantur. Datam Rome apud Sanctum Petrum, anno incarnationis dominice millesimo quadringentesimo quinquagesimo primo, tertiodecimo Kalendas Iulii, pontificatus nostri anno quinto. [1451. júl. 2.]