Nos Michael Orzagh de Guth, regni Hungarie palatinus et iudex Cumanorum, damus pro memoria, quod Thomas, filius Iohannis Edwy, pro se personaliter et pro Blasio filio Georgii, Demetrio filio Martini, Stephano filio Iacobi, Ladislao filio Anthonii, Emerico filio Iohannis, Urbano filio Iohannis, Andrea filio Clementis, Philippo filio Matthie et Iohanne filio Adriani de Nemesdemelk cum procuratoriis litteris capituli ecclesie Castriferrei iuxta continentiam litterarum eiusdem capituli Castriferrei inquisitoriarum, admonitoriarum et insinuatoriarum in octavis festi Epiphaniarum Domini in figura nostri iudicii comparendo contra religiosum dominum Iohannem abbatem de Eghazasdemelk proposuit eo modo, quomodo circa festum Sancti Michaelis archangeli proxime preteritum [1458. szept. 29.] idem dominus frater Iohannes abbas, assumptis et appreciatis secum nonnullis familiaribus egregii Francisci Ladislai Osth de Azzonfalva, manibus armatis ad predictam possessionein dictorum exponentium, Nemesdemelk appellatam veniens, ubi plurimas nobiles dominas, consortes scilicet eorundem exponentium, verbis illicitis et vituperiosis pertractans, signanter nobilem dominam, consortem Blasii filii Georgii, pectoribus equorum trucidari et acriter verberari ac insuper decimas super fruges et blada in singulis ortis eorundem exponentium, possessione in predicta habitis, dicari fecisset. Cum tamen ipsi a diuturno tempore titulo nobilitatis ad instar aliorum nobilium regni insigniti ac iuxta antiqua ac nova decreta eiusdem regni nullas decimas, sed nec dioecesano episcopo solvissent et nec in presentiarum solvere tenerentur; preterea idem dominus Iohannes abbas in messe proxime preterita gregem porcorum dictorum exponentium ad domum ac curiam ipsius impelli faciendo ac fere decem diebus reclusos conservando plurimos porcos ex eisdem fame et siti interfecisset, reliquos vero iuxta sue voluntatis libitum indebite conservatos et in huiusmodi reclusione destructos emisisset, potentia mediante, in preiudicium et dampnum eorundem exponentium valde magnum. Quo audito prefatus dominus Iohannes abbas respondit ex adverso, quomodo prefati actores semper et ab antiquo nobiles iobagiones conditionarii prefate ecclesie sue abbatialis de predicta Demelk extitissent et certos census et redditus ac servitia ipsi ecclesie dare et exhibere deberent et tenerentur, et preterea etiam dictarum decimarum solutionem sibi de iure obligarentur, et in horum suorum verborum comprobationem quasdam litteras capituli ecclesie Iauriensis privilegiales fassionales in festo Beati Iohannis Baptiste in anno Domini millesimo quadringentesimo nono [1409. jún. 24.] emanatas ac in serico, quo appensum est eiusdem sigillum, laniatas ac laceratas nobis demonstravit earum serie nos eatenus informando, quod religioso viro domino Sebastiano, abbate monasterii Beate Virginis de Demelk, ab una, Andrea filio Demetrio, Urbano et Iacobo filiis suis, Michaele filio Iohannis, Andrea filio Nicolai, sua et Giarmani Clementis et Georgii fratrum suorum in personis, Georgio filio Petri, Iohanne filio Dionisii, Iacobo filio Stephani Stephano filio Iohannis, et Blasio filio Iohannis, iobagionibus dicti monasterii in Demelk minore commorantibus, tam pro se, quam pro aliis sociis ipsorum in eadem Demelk et in villa Koch vocata existentibus, quorum onus et gravamen, [si] infrascripta vellent retractare, super se assumpsissent, personaliter coram prefato capitulo parte ex altera constitutis, propositum extitisset per easdem partes concorditer et confessum, quod dum ipse dominus Sebastianus abbas reverendo in Christo patri, domino Iohanni, episcopo Wratislaviensi, duci Opuliensi et amministratori abbatie monasterii Sancti Martini de Sacro Monte Pannonie, castellanis suis ac magistro Francisco filio bani de Azzonfalva, tanquam defensoribus dicti monasterii de Demelk sepesepius conquestus fuisset, quod dicti iobagiones iura ex parte ipsorum dicto monasterio de Demelk debita, sibi reddere recusassent et se a iudicatu ipsius domini abbatis exemissent; tandem ipse partes, interveniente compositione et ordinatione proborum et nobilium virorum, pacem ipsarum partium zelantium, pariter super premissis in presentia dicti capituli concordassent, ut ipsi iobagiones omnia illa, que ab ipsis dicto monasterio de Demelk provenirent, tunc deinceps sine omni renitentia et contradictione predicto monasterio dare et solvere assumpsissent, scilicet singulis annis in festo Sancti Michaelis archangeli duas marcas denariorum pro tempore currentium, unam videlicet de predicta Demelk minori, aliam vero de Koch memorata; quando autem regalis exercitus generaliter usque metas seu confinia regni moveretur, tunc de qualibet curia dictarum duarum possessionum, idest de Demelk minori et de Koch quinque pense denariorum dictis monasterio et abbati ratione prefati exercitus fuissent persolvendi, demptis curiis seu dempta curia, de quibus seu de qua cum expensis earundem curiarum seu eiusdem curie et non cum alienis facultatibus ad predictum exercitum transiretur. Si cum alienis auxiliis et non cum dictarum curiarum seu dicte curie sumptibus ad ipsum exercitum proficisceretur, tunc nulla curia seu nulle curie premissarum possessionum a solutione dicte collecte exercitualis eximerentur vel eximeretur, revera integraliter prefata collecta exercitualis de ipsis duabus possessionibus memoratis monasterio et abbati fuissent persolvenda; causas ... inter prefatos iobagiones emergendas abbas eiusdem monasterii more solito iudicandi habuisset potestatem; nichilominus ipsi iobagiones litteras privilegiales olim domini Bele regis et ceteras super hereditatibus dicti monasterii de Demelk confectas et erga manus ipsorum habitas prefato domino Sebastiano abbati restituere assumpsissent, porro inquisitionales et causales litteras, per ipsas partes tunc contra se vicaria emulatione emanari procuratas, dicte partes cassas reliquissent et viribus carituras, penam solutionis quinquaginta marcarum contra predictos monasterium et abbatem dicti iobagiones incursuri; si aliqui neglexissent premissorum, idest si in toto vel in parte non perseverassent in forma sponsionis prenotate; preterea dictus dominus Sebastianus abbas assumpsisset eisdem iobagionibus, ut si alique littere apud ipsum possent inveniri, non iura dicti monasterii, sed prescriptorum iobagionum concernentes, illas restituere debuisset iobagionibus prelibatis. Quibus quidem litteris exhibitis, prefatus Thomas filiiis Iohannis Edwy in sua et predictorum aliorum personis subiunxit in hunc modum, quod licet predictus dominus Iohannes abbas premissas litteras in defensionem sui iuris exhibuerit, tamen ipse littere suspecte haberentur, quia sericum eiusdem, in quo sigillum foret appensum, corruptum et laceratum esset, ipsique certas alias litteras et litteralia instrumenta, quorum vigoribus ipsi et eorum predecessores predictam possessionem eorum Demelk semper et ab antiquo sub iusto titulo nobilitatis possedissent possiderentque etiam de presenti, proptereaque veluti alii nobiles regni solutionem decimarum nequaquam tenerentur, quas quidem litteras et litteralia instrumenta non ad presens, sed in termino ulteriori per nos ipsis dando exhibere prompti essent et parati. Unde his perceptis iudicando commisimus eo modo, ut tam annotatus dominus Iohannes abbas, quam etiam predictus Thomas filius Iohannis Edwy de Demelk et alii prescripti nobiles de eadem universas litteras et litteralia eorum instrumenta, si quas et que in premissis haberent confectas et emanata, simul cum dictis litteris privilegialibus in serico corruptis, in specie in octavis festi Beati Georgii martyris nunc venturi, [1459. máj. 1.] contra se se in alterutrum producere et exhibere teneantur, ut his visis iudicium et iustitiam facere valeamus inter partes in premissis, prout dictabit ordo iuris. Datum Bude, feria secunda proxima post dominicam Reminiscere anno Domini millesimo quadringentesimo quinquagesimo nono. [1459. febr. 19.]||
[Egykorú hátirata]: Super exhibendis litteralibus instrumentis. Pro religioso domino fratre Iohanne, abbate de Demelk, contra Thomam filium Iohannis de Kysdemelk et alios intrascriptos ad octavas Beati Georgii martyris.