Nos Thomas Horvath de Hegredwar ac Anthonius de Huzigh, vicecomites et castellani ac iudices nobilium comitatus Iauriensis, damus pro memoria, quod, cum nos ad instantiam et legittimam petitionem Michaelis de Kappan in persona venerabilis domini Nicolai Wydfi, lectoris de Wacz ac gubernatoris abbatie de Beel, nobis porrectam de sede nostra iudiciaria unum ex nobis, puta nobilem Georgium de Hal, iudicem nobilium, ad infrascriptam inquisitionem faciendam duxissemus destinandum, qui (!) tandem exinde ad nos reversus nobis retulit eo modo, quod ipse in festo Inventionis Sancte Crucis proxime preterito [1475. máj. 3.] in hoc comitatu Iauriensi procedendo ab omnibus, quibus decens et opportunum fuisset, nobilibus videlicet et ignobilibus ac alterius cuiusvis status et conditionis dicti comitatus hominibus palam et oculte diligenter inquirendo talem de infrascriptis scivisset certitudinis veritatem, quomodo circa festum Beatorum Philippi et Iacobi apostolorum proxime preteritum [1475. máj. 1.] familiares et officiales dicti exponentis certos boves, in numero tres, populorum et iobagionum egregii Ladislai Kolos de Nema in possessione Pathona et comitatu Wesprimiensi existente commorantium de territorio prefati exponentis Kayar de Prato et segetibus depulissent et deportassent, et post dicti populi et inhabitatores de Pathona predicta mox armatis manibus usque dictam possessionem Kayar persequendo et tertiam partem gregum eiusdem possessionis Kayar minus iuste et indebite preter omnem viam iuris similiter proprie eorum temeritate depulissent et deportassent, de quibus scilicet gregibus duos ex eisdem interfecissent, alios vero quam plures pecudes et pecora sauciendo potentia mediante in preiudicium et dampnum maximum (!). Ad cuius fassionem prefati Georgii iudicis nobilium, memorato exponenti litteras nostras duximus concedendas. Datum Iawrini, sabbatho proximo ante festum Penthecostes, anno Domini millesimo quadringentesimo septuagesimo quinto. [1475. máj. 13.]