Mathias, Dei gratia rex Hungarie, Bohemie etc., fidelibus suis conventui ecclesie Cruciferorum de Alba salutem et gratiam. Dicitur nobis in persona venerabilis et religiosi fratris Ladislai abbatis de Beel, quomodo predium Ponywad ac possessio Arpad in comitatu Wesprimiensi existentes, ipsum Ladislaum abbatem et dictam ecclesiam eiusdem pleno iure perhennali concernentes, legittima reambulatione plurimum indigerent. Super quo fidelitati vestre firmiter precipiendo mandamus, quatenus vestrum mittatis hominem pro testimonio fide dignum, quo presente Symon aut Stephanus Theremes de Peecz vel Ladislaus sin Mathius seu Michael sive Iohannes neve Lucas de Kaldhaza, aliis absentibus homo noster ad facies dictarum predii Ponywad et possessionis Arpad vicinis et commetaneis earumdem universis inibi legitime convocatis et partibus accedendo reambulet easdem per suas veras metas et antiquas, novas iuxta veteres in locis necessariis erigendo, reambulatasque et ab aliorum iuribus possessionariis separatas et distinctas, simul cum cunctis ipsarum utilitatibus et pertinentiis quibuslibet eisdem Ladislao abbati et ecclesie eiusdem iure perpetuo ipsis incumbenti relinquat possidendas, si non fuerit contradictum; contradictores vero, si qui fuerint, evocet eosdem contra memoratum Ladislaum abbatem nostram personalem in presentiam ad terminum competentem rationem contradictionis eorum reddituros. Et post hec huiusmodi possessionarie reambulationis et metarum erectionis seriem cum cursibus metarum inibi erigendarum, contradictorumque et evocatorum, si qui fuerint, vicinorumque et conmetaneorum, qui premisse metarum reambulationi intererint, nominibus, terminoque assignato eidem nostre personali presentie fideliter rescribatis. Datum Bude, feria quarta proxima post festum Beati Marci evangeliste, anno Domini millesimo quadringentesimo septuagesimo nono. [1479. ápr. 28.]