Ego frater Michael, abbas monasterii Sancti Mauricii de Bakon Beel, per presens cirographum propria manu subscriptum, sigilloque nostro anulari consignatum presentibus religiosis viris fratribus Iacobo priore, Nicolao cellerario, Cristoforo et Martino testibus idoneis ac fide dignis personaliter astantibus ac omnia et singula infrascripta audientibus promitto fide mea Christiana mediante et per hec sancte Dei evangelia manibus propriis corporaliter tacta ad conscientiam meam et ipsam sanctam obedientiam, qua Deo omnipotenti et sacro Ordini Sancti Benedicti ac domino Matheo abbati, tanquam presidenti, obligor et sub perpetua amissione et privatione ipsius abbatie Sancti Mauricii, quod dum et quando per prefatum dominum Matheum abbatem requisitus fuero aut saltem homines mei in persona mea, si pro tunc absens essem, requisiti fuerint, per se in propria persona sine mora et absque aliqua procrastinatione et renitentia quavis occasione semota, quovis etiam colore excluso coram vobis, domino Matheo abbate et conventu vestro comparebo et ad singula michi obiecta respondebo, meque, si potero, de infamia canonice expurgabo et iudicio sufficienti astabo. Ita me Deus adiuvet, Beata virgo Maria, fides mea Christiana et hoc sancta Dei evangelia.||
Ego frater Michael abbas supradictus omnia et singula premissa fateor me complere per presentes.||
[Hátán:] Presentes litteras fratris Michaelis et omnia intrascripta fassus est ore suo proprio coram dominis diffinitoribus et dominis episcopis (!), Paulo Milkoviensi et Gregorio, Sebastiano et Iohanne ac Demetrio decretorum doctoribus, coram mea notario publico magistro Mathiae de Dombro archidiacono Komaromiensi et canonico ecclesie Iauriensis. -- Magister Mathias de Dombro notarius in premissis.