Thomas Amadeus de Ferrara, decretorum doctor, archidiaconus Nitriensis et canonicus in ecclesia Strigoniensi, reverendissimi in Christo patris et domini domini Thome, miseratione divina tituli Sancti Martini in Montibus sancte Romane ecclesie presbiteri cardinalis Strigoniensis, locique eiusdem comitis perpetui, primatis Hungarie et apostolice sedis legati nati etc., vicarius in spiritualibus et causarum auditor generalis, dilectis nobis in Christo honorabilibus et discretis viris dominis universis et singulis ecclesiarum parochialium plebanis in et sub Strigoniensi ac eius iurisdictione spirituali, necnon Wesprimiensi et Iauriensi diocesibus ubilibet constitutis et existentibus, qui presentibus fueritis requisiti, aut alter vestrum fuerit requisitus, salutem in Domino et nostris firmiter obedire mandatis. Gravem querelam pro parte venerabilis fratris Blasii, abbatis de Bakon-Beel, dicte diocesis, nobis porrectam recepimus continentem, quomodo nobiles et providi Georgius Holwpa de Bohonycz de Papa et Paulus similiter Holwpa de Wgod castrorum castellani, Petrus Pokol et Iohannes Hyspan de Papa, prefatarum diocesium, in anno cuius iam tertia citraque vel ultra instat revolutio, [1504.] nescitur quo maligno freti consilio, abbatiam dicti domini exponentis Bakon Beel prefatam et illius pertinentia invasissent, eidemque abbatie seu ecclesie ipsius domini exponentis dampna et iacturas plus quam ad duo milia florenorum auri se extendentes intulissent et irrogassent in dispendium salutis animarum suarum, dictique domini exponentis ac abbatie et ecclesie eiusdem huiusmodi preiudicium et dampnum manifestum. Quare fuimus pro parte eiusdem domini exponentis super hoc debita cum instantia requisiti, ut sibi et ecclesie eiusdem predicte super inde de opportuno iuris remedio providere et citationem legitimam auctoritate apostolice legationis nate, qua fungimur, contra prefatos Georgium et Paulum et alios predictos ad partes decernere, dareque et concedere dignaremur. Nos autem volentes unicuique iustitiam pro viribus aministrare, citationem petitam decrevimus et decernimus per presentes. Vestre igitur et cuiuslibet vestrum devotioni in solido in virtute sancte obedientie et sub excommunicationis pena, quam in vos et alterum vestrum huiusmodi mandatum nostrum exequi recusantem trium dierum canonica monitione premissa a die exhibitionis presentium vobis fiende computando ferimus, in hiis scriptis districte precipiendo committimus et mandamus, quatenus receptis presentibus ac dum et quum cum presentibus fueritis requisiti aut alter vestrum fuerit requisitus ad prenominatos Georgium, Paulum et alios prefatos personaliter accedatis, ipsosque, si eorum presentiam comode habere poteritis, alioquin in domibus habitationum ipsorum, aliasque sic et taliter, quod huiusmodi vestra citatio ad eorum notitiam verissimiliter (!) possit devenire, ad instantiam prefati domini exponentis in nostram peremptorie citetis presentiam, quos et nos tenore presentium sic citamus, ut ipsi vicesima die proxima a die huiusmodi citationis vestre de ipsis fiende computando, si ipsa vicesima dies iuridica fuerit, alioquin prima die iuridica extunc immediate sequenti, qua scilicet nos ad iura reddenda et causas audiendas pro tribunali sedere contigerit, per se personaliter aut per ipsorum procuratorem legittimum ad causam huiusmodi sufficienter instructum Strigonii coram nobis in iudicio conpareant antelato domino exponenti aut suo procuratori legittimo super premissis de iure responsuri, a nobisque debite iustitie complementum recepturi usque ad sententiam diffinitivam inclusive, certificando eosdem sic citatos, quod sive ipsi in dicto citationis termino Strigonii coram nobis in iudicio compareant sive non, ipsis ulterius non ibi in partibus, sed per edictum in foribus huius alme ecclesie Strigoniensis more solito publice citatis ad partis coram nobis comparentis instantiam in causa et in causis huiusmodi, prout iuris fuerit, ad ulteriora procedemus, alterius partis absentia vel contumacia in aliquo non obstante. Et tandem diem et locum huiusmodi citationis vestre cum nominibus et cognominibus citatorum et quitquid in premissis feceritis, nobis suo modo fideliter et conscientiose rescribatis, presentes in specie remittendo. Datum Strigonii, decima quarta die mensis Februarii, anno Domini millesimo quingentesimo sexto. [1506. febr. 14.]||
Benedictus de Also Zegedi notarius.