Iulius ... dilecto filio moderno abbati monasterii Sancti Martini ... Sane pro parte tua nobis exhibita peticio continebat, quod de antiqua et approbata hactenusque pacifice observata consuetudine et iuxta constitucionem et ordinacionem felicis recordacionis Honorii pape III., predecessoris nostri in concilio generali editam in regno Hungarie ad instar aliorum regnorum habeas ius convocandi, et congregandi de triennio in triennium, salvo iure diocesanorum pontificum, universos et singulos abbates et priores abbates proprios non habestes monasteriorum prefatorum regni et ordinis ad capitulum generale auctoritate apostolica in dicto monasterio vel alio loco idoneo celebrandum, ad quod universi abbates et priores dictorum ordinis et regni venire de iure tenentur, et in quo de reformacione ordinis ac observancia regulari diligenter tractari ac omnia, que in huiusmodi capitulo statuta et ordinata fuerunt, abbate dicti monasterii Sancti Martini pro tempore existente, qui universorum abbatum et priorum ac monasteriorum et prioratuum in dicto regno existencium ex privilegiis predicti monasterii superior existit, ac deffinitoribus in eodem capitulo electis approbantibus inviolabiliter omni excusacione et contradiccione ac appellacione remotis observari debent, et certos abbates eorundem Ordinis et regni in visitatores, qui singula monasteria tam monachorum, quam monialium predictorum Ordinis et regni secundum formam eis prefixam auctoritate predicta visitare, corrigere et reformare habent, que correccionis et reformacionis officio viderint expedire, eligere, ordinare et deputare ad abbatem predicti monasterii Sancti Martini pro tempore existentem principaliter pertinet et spectat; fuistique tam tu, quam predecessores tui abbates dicti monasterii, qui fuerunt pro tempore, in pacifice possessione vel quasi iuris, celebrandi et congregandi capitulum huiusmodi, prout tu existis, que a nobis apostolico petisti munimine roborari. Nos igitur tuis in hac parte supplicacionibus inclinati premissa sicut in illorum pacifica possessione vel quasi fore dinosceris, tibi auctoritate apostolica confirmamus et presentis scripti patrocinio communimus. Nulli ergo etc. ... Datum Rome apud Sanctum Petrum anno MDVI. Idibus Mai, pontificatus nostri anno tercio.