ln nomine Domini Amen. Anno nativitatis eiusdem millesimo quingentesimo septimo, indiccione decima, die vero vigesima septima mensis Februarii, [1507. febr. 27.] hora matutina vel quasi, pontificatus autem sanctissimi in Christo patris domini domini Iulii, divina providencia pape secundi, anno quarto in domo habitacionis venerabilis in Christo patris Caspari de Nagoch, canonici et vicarii substituti ecclesie Wesprimiensis, in mei, notarii, et testium infrascriptorum presencia venerabilis in Chrisio frater Blasius de Koppanmonosthora et similiter Blasius de Beel, abbates ordinis Sancti Benedicti, pro reverendo domino Matheo, abbate Sancti Martini Sacri Montis Pannonie, cum procuratoriis litteris conventus eiusdem ab una, et nobilis Anthonius litteratus de Fizegtu, castellanus Thyconiensis, pro reverendo domino Thoma, episcopo et conmendatario abbacie eiusdem, cum procuratoriis litteris capituli Budensis ex altera partibus personaliter constituti in nostri presencia confessi sunt, quod ipse dominus Thomas episcopus et Thyconiensis abbas, sopitis et condescensis ac per omnia cassatis omnibus controversiis, causis, iniuriis, nocumentis damnisque et expensis exinde secutis et hactenus quomodolibet inter eos subortis et suscitatis, concordasset ita et taliter, ut de cetero favore et amicicia ac charitate alterutrim gaudere possint, et ipse dominus Matheus nedum ipsi domino episcopo sub aliquo quesito colore in persona vel in rebus directe vel indirecte intentare non studebit, sed eciam ab aliis eundem iniuriantibus pro sua facultate protegere et defendere curabit, ac ipse dominus episcopus libere eciam in castro et monasterio Sancti Martini et alias ubilibet absque aliquo metu ipsius domini Mathei procedere et conversari poterit et quod ipse dominus episcopus nec in vita neque in morte monasterium ordinis Sancti Benedicti Thyconiense, cui ipse nunc titulo conmendatario preest, inmutare quomodolibet attentabit; sed in vita dumtaxat monasterii redditus pro suo honore et dignitate episcopali vertere valeat et in morte ipsi domino Matheo abbati supremo vel alteri eciam successori eiusdem, canonice tamen intranti, relinquet, exacto iuramento a castellanis suis, videlicet Anthonio moderno et Blasio Orban, provisore nunc ipsius monasterii, quod si ipsum volente Deo contingeret decedere, illud monasterium cum castro ad manus ipsius domini Mathei vel successori eiusdem canonice intranti, qui fuerit de ordine Sancti Benedicti, et nemini alteri dare et tradere presummant. Quod si aliqui officiales succedent illis, ab eisdem simile iuramentum debet exigi. Ad que premissa omnia et singula partes prescripte per suos procuratores predictos virtute litterarum procuratoriarum, fide ipsorum mediante, se obligarunt. Super quibus omnibus et singulis premissis iidem procuratores parcium, qui supra, legaliter et solemniter protestando pecierunt me notarium publicum subscriptum, ut ipsis superinde unum vel plura publica et authentica instrumentum aut instrumenta conficere debeam, quod et feci officio mei tabellionatus mediante.||
Acta sunt hec facta anno, indiccione, mense, die, hora et loco ac pontificatu, quibus supra, presentibus ibidem venerabili domino Casparo de Nagoch, canonico et vicario predicto, discretis Stephano plebano Sancti Ioannis Baptiste, Demetrio presbytero de Zenth Ersebeth et Simone litterato de Nagoch, testibus fidedignis ad previa universa specialiter vocatis.||
Et ego Nicolaus, clericus de Petherkeresthur, diocesis Wesprimiensis, apostolica et imperiali auctoritate notarius publicus, quia premissis ordinacioni, composicioni, promissioni aliisque omnibus et singulis, dum, sicut premittitur, fierent et agerentur, unacum prenominatis testibus presens interfui eaque omnia et singula sic fieri vidi et audivi, ideo hoc presens publicum instrumentum exinde confeci et in hanc publicam formam redegi signoque et nomine meis solitis et consuetis confirmavi in fidem et testimonium omnium et singulorum premissorum per eosdem procuratores rogatus et requisitus.