...||
Commissio propria domini regis.||
Mathias Dei gracia Hungarie, Dalmacie, Croacie, Rame, Servie, Gallicie, Lodomerie, Comanie Bulgariaque rex omnibus Christi fidelibus presentibus pariter et futuris presencium noticiam habituris salutem in omnium Salvatore. Ad universorum noticiam harum serie volumus pervenire, quod nostre maiestatis veniens in conspectum fidelis noster venerabilis Dominicus prepositus ecclesie Sancti Nicolai confessoris de Alba ac administrator abbacie Sancti Martini Sacri Montis Pannonie exhibuit nobis quasdam literas serenissimi quondam domini Bele regis Hungarie etc. predecessoris nostri in pargameno patenti confectas, dupplici sigillo suo impendenti consignatas, super certis libertatibus et exempcionibus populis in villa sew terra Dyenus vocata ad dictam abbaciam Sancti Martini Sacri Montis Pannonie pertinenti commorantibus modo et ordine inferius in tenore earundem literarum factis emanatas tenoris infrascripti, supplicans maiestati nostre humiliter, ut prefatas literas ratas, gratas et acceptas habentes literisque nostris privilegialibus de verbo ad verbum inserifacientes approbare easque et omnia in eis contenta pro prefatis populis in prefata villa Dyenus pro tempore constitutis innovare, perpetuo valituras confirmare dignaremur, quarum quidem literarum tenor talis est:||
Bela, Dei gratia Hungarie, Dalmatie, Croatie, Rame, Servie, Gallicie, Lodomerie, Cumanieque rex, omnibus, tam presentibus quam futuris presentes litteras inspecturis salutem in omnium salvatore. Ad universorum notitiam harum serie volumus pervenire, quod nos inherentes felicibus sanctissimi regis Stephani, progenitoris nostri, vestigiis et privilegium libertatis seu exemptionis populi monasteri Sancti Martini de Sacro Monte Pannonie ab ipso sancto rege Stephano pie et salubriter ab antiquo concessum ex specialis dilectionis favore, quo predictum monasterium Sancti Martini pre ceteris monasteriis et ecclesiis regni nostri amplexamur, ad quosdam alios eiusdem monasterii popuIos extendentes villam seu terram ipsius monasterii Dyenws nuncupatam, in comitatu Posoniensi in Chyllonkuz existentem adinstar predicti privilegii sancti regis a iurisdictione comitis seu curialis comitis Posoniensis, qui pro tempore fuerint, in omnibus et per omnia perpetuo duximus eximendam ita, quod de cetero populi in eadem villa seu terre Dyenws existentes nec ratione furti, nec ratione decimarum, nec ratione monete aut aliquo alio modo iudicio predicti comitis vel curialis comitis Posoniensis astare teneantur vel compelli possint aut debeant ullo modo, sed nostro tantum iudicio debeant subiacere. In cuius rei memoriam, firmitatemque perpetuam presentes dedimus litteras dupplicis sigilli nostri munimine roboratas. Datum per manus magistri Demetrii, Albensis ecclesie prepositi, aule nostre vicecancellarii, dilecti et fidelis nostri, anno dominice incarnationis millesimo ducentesimo septuagesimo, quintodecimo Kalendas Aprilis, regni autem nostri anno tricesimo quarto. [1270. márc. 18.]||
Nos igitur humilimis supplicationibus annotati Dominici prepositi per eum nostre modo quo supra porrectis maiestati regia benignitate exauditis et clementer admissis prescriptas literas non abrasas, non cancellatas, nec in aliqua sui parte suspectas presentibus literis nostris privilegialibus de verbo ad verbum sine diminutione et augmento aliquali insertas quo ad omnes earum continentias clausulas et articulos acceptamus approbamus et ratificamus easque nihilominus et omnia in eis contenta pro prefatis populis in prefata villa Dyenus pro tempore constitutis innoventes perpetuo valituras confirmamus presentis scripti nostri patrocinio mediante. In cuius rei memoriam firmitatemque perpetuam presentes concedimus literas nostras privilegiales pendentis et authentici sigilli nostri dupplicis munimine roboratas. Datum per manus reverendissimi in Christo patris domini Stephani cardinalis ac ecclesiarum Colocensis et Bachiensis archiepiscopi locique eiusdem Colocensis comitis perpetui, aule nostre summi cancellarii dilecti et fidelis nostri, anno domini millesimo quadringentesimo sexagesimo octavo tercio nonas Octobris, [1468. okt. 5.] regni nostri autem anno undecimo, coronationis vero quinto, venerabilibus in Christo patribus dominis eodem Stephano cardinali Colocensi, Iohanne Strigoniensi apostolice sedis legato nato archiepiscopis, altero Iohanne Waradiensi et postulato Agriensi, Nicolao Transilvaniensi, Osvaldo Zagrabiensi, Iohanne Quinqueecclesiensi, Alberto Wesprimiensi, Demetrio Iauriensi, Vincencio Vaciensi, Iohanne Chanadiensi, Thome Nitriensi, Benedicto electo et confirmato Bosniensi, Nicolao electo Sirmiensi, altero Nicolao Tininiensi, Segniensi sede vacante et Nicolao Modrusiensi ecclesiarum episcopis, ecclesias Dei feliciter gubernantibus; item magnificis Michaele Orszagh de Gwth, regni nostri Hungarie predicti palatino, Iohanne Pangracz de Dengeleg et Nicolao Chwpor de Monosto, voivodis Transilvanis, comite Ladislao de Palocz, iudice curie nostre, Nicolao de Wylak Machoviensi et Iohanne Tuz de Lak Sclavonie banis, honore banatus Dalmacie et Croacie regnorum ac Zewreniensis vacantibus, Iohanne de Rozgony, thavernicorum, Friderico Lamberger et prefato Iohanne Tuz, ianitorum, Bartholomeo, filio Drag de Belthek, pincernarum, Nicolao de Hederwara, dapiferorum, Mathyws de Maroth et Stephano de Peren, agazonum nostrorum regalium magistris et Nicolao, filio Bani de Alsolyndwa, comite Posoniensi aliisque compluribus regni nostri comitatus tenentibus et honores.