Spectabili et magnifico domino Emerico de Peren, comiti perpetuo comitatus Abawywariensis, regni Hungarie palatino et iudici Comanorum ac serenissimi principis et domini domini Wladislai, Dei gratia regis Hungarie et Bohemie etc., domini nostri gratiosissimi impresentiarum in absentia sue maiestatis locumtenenti, domino et amico eorum honorando conventus Cruciferorum domus hospitalis ecclesie Beati regis Stephani de Alba amicitiam paratam cum honore. Vestra noverit magnificentia nos litteras eiusdem inquisitorias, evocatorias et insinuatorias nobis amicabiliter transmissas honore, quo decuit, recepisse in hec verba:||
Amicis suis reverendis, conventui ecclesie Cruciferorum de Alba Emericus de Peren, comes perpetuus comitatus Abawywariensis, regni Hungarie palatinus et iudex Comanorum ac serenissimi principis et domini domini Wladislai, Dei gratia regis Hungarie et Bohemie etc., domini nostri gratiosissimi impresentiarum in absentia sue maiestatis locumtenens, amicitiam paratam cum honore. Dicitur nobis in persona venerabilis et religiosi fratris Iohannis (!) abbatis ecclesie de Beel, quod, dum circa festum ad Vincula Beati Petri apostoli proxime preteritum [1509. aug. 1.] quidam Paulus Guvath dictus, iobagio eiusdem exponentis in possessione Also Ewrs vocata, in comitatu Zaladiensi existenti commorans, de claustro Beel vocato, in comitatu Wesprimiensi habito, versus dictam possessionem Also Ewrs, domum videlicet habitationis sue venire seu remeare habuisset et dum ad possessionem Felsewers, in eodem comitatu Zaladiensem existentem, pervenisset ac in libera platea eiusdem possessionis iter suum pacifice continuare habuisset, tunc nobilis Andreas, prepost dictus, de dicta Also Ewrs, nescitur qua temeritate ductus, manibus armatis et potentiariis in ipsum Paulum Gwwath, iobagionem prefati exponentis, hostiliter magna cum impetu irruisset, ibique primitus eundem Paulum Gwwath gravibus verbis illicitis et dehonestatoriis affecisset, tandem, si idem Paulus Gwwath auxilio Dei, fugeque presidio se precavere non potuisset, eundem ibidem nece turpissima interemisset potentia mediante in preiudicium et dampnum prefati exponentis valde magnum. Et quia prefatus dominus noster rex tempore recessus sue maiestatis de hoc regno suo Hungarie versus regnum suum Bohemia antequam iter suum arripere voluisset, de consilio dominorum prelatorum et baronum pro quietiori, comodiorique ac tutiori statu et conservatione huius regni inter cetera statuta decrevit, ut ratione quorumcunque actuum potentiariorum, dampnorum, illationum, ceterorumque quorumvis malorum generum occasionum ab ipso tempore recessus sue maiestatis per quempiam committendorum infra felicem reditum sue maiestatis movendorum ad tricesimum secundum diem iuxta contenta generalis novi decreti super inde editi et stabiliti decerni et dari atque universe cause ratione previa post recessum sue maiestatis, ut dicitur, quarumcunque movendarum absque omni prorogationis confidentia per nos adiudicari et sententionaliter, finaliterque terminari possint et deberent, super pro vestram amicitiam presentibus petimus diligenter, quatinus vestrum mittatis hominem quo testimonio fide dignum, quo presente Petrus aut Franciscus vel Georgius sive Gasparus de Ayka aut Nicolaus Farkas de Also Ewrs seu Stephanus de Athya, aliis absentibus homo noster habita prius premissorum mera veritate memoratum Andream Preposth de dicta Also Ewrs contra annotatum exponentem iuxta vim et formam premisse ordinationis prefati domini nostri regis, contentaque generalis novi decreti super inde editi et stabiliti ad tricesimum secundum diem diei evocationis huiusmodi ex hinc fiende computando nostram evocet in presentiam rationem de premissis redditurum efficacem, litis pendentia, si qua foret inter ipsos non obstante, insinuando ibidem eidem, ut sive ipse termino in prescripto coram nobis compareat, sive non, nos ad partis comparentis instantiam id faciemus in premissis, quod iuri videbitur expediri; et post hec huiusmodi inquisitionis, evocationis et insinuationis seriem cum evocati et insinuati nomine, ut fuerit expediens, terminum ad prescriptum nobis amicabiliter rescribatis. Datum Bude, feria quarta proximo post dominicam Oculi, anno Domini millesimo quingentesimo decimo. [1510. márc. 6.]||
Et iuxta earundem continentiam nos amicabilibus petitionibus eiusdem vestre magnificentie in omnibus occurere volentes, ut tenemur, una cum prenominato Nicolao Farkas de Also Ewrs, tamquam homine vestro palatinali nostrum hominem, videlicet religiosum fratrem Paulum presbiterum cruciferum, socium nostrum conventualem, ad premissa fideliter peragenda nostro pro testimonio fide dignum duximus destinandum. Qui tandem exinde ad nos reversi nobis concorditer retulerunt, quod ipsi feria sexta proxima ante festum Beatorum Tiburtii et Valentini martirum proxime preteritum [1510. ápr. 12.] in dicto comitatu Zaladiensi simul procedendo ab omnibus nobilibus et ignobilibus boni status et honeste conditionis eiusdem comitatus hominibus, a quibus decens et opportunum fuisset, palam et occulte de prenarratis diligenter inquirendo omnia premissa et quevis premissorum singula sic et suo modo facta fuisse et esse rescivissent, prout eidem vestre magnificentie dictum extitisset et quemadmodum tenor litterarum eiusdem per omnia continet prescriptarum; habita itaque ipsa inquisitione, eodem die prefatus homo vestre magnificentie ipso nostro testimonio presente memoratum Andream Preposth de Also Ewrs de portione sua possessionaria in possessione Arach habita contra annotatum exponentem iuxta vim et formam premisse ordinationis prefati domini nostri regis, contentaque generalis novi decreti super inde editi et stabiliti ad tricesimum secundum diem diei evocationis huiusmodi ex hinc facte computando vestre magnificentie evocasset in presentiam rationem de premissis redditurum efficacem, litis pendentia, si qua foret inter ipsos non obstante, insinuando ibidem eidem, ut sive ipse termino in prescripto coram vestra magnificentia compareat, sive non, eadem ad partis comparentis instantiam id faciet in premissis, quod iuri videbitur expediri. Datum vigesimo sexto die diei inquisitionis, evocationis et insinuationis predictarum, anno Domini supradicto. [1510. máj. 7.]