Iulius episcopus, servus servorum Dei. Dilectis filiis preposito et cantori ecclesie Collocensis et vicario venerabilis fratris nostri archiepiscopi Collocensis in spiritualibus generali salutem et apostolicam benedictionem. Conquesti sunt nobis abbas monastarii Sancti Martini Sacri Montis Pannonie Ordinis Sancti Benedicti Iauriensis diocesis, in regno Hungarie generalis presidens et visitatores monasteriorum eiusdem Ordinis in dicto regno, quod prior et fratres domus Sancti Pauli ordinis Sasncti Pauli primi heremite Varadiensis (!) diocesis monasterium Beate Virginis Marie in possessione Zenthiob predicti ordinis Sancti Benedicti dicte diocesis de facto occuparunt et occupatum detinent et abbatem presidentem ac visitatores predictos, quominus dictum monasterium visitare et in illo monachos predicti ordinis Sancti Benedicti deputare ac ponere et divina officia iuxta morem dicti Ordinis Sancti Benedicti celebrari facere possint et valeant, prout ad eorum officium spectat, contra iusticiam impedire et alias graves molestias iacturas, iniurias, impedimenta et damna eis et dicto Ordini Sancti Benedicti super hoc inferre contra iusticiam presumpserunt, hactenus et presumunt. Ideoque discrecioni vestre per apostolica scripta mandamus, quatenus vocatis qui fuerint evocandi et auditis hincinde propositis, quod iustum fuerint appellacione remota decernatis facientes, quod decreveritis per censuram ecclesiasticam firmiter observari. Testes autem, qui fuerint nominati, si se gracia, odio vel timore subtraxerunt, censura simili appellacione cessante compellatis veritati testimonium perhibere. Non obstante, si eisdem priori et fratribus ac ordini Beati Pauli primi heremite a sede apostolica indultum existat, quod ipsi et dicti ordinis Beati Pauli primi heremite persone ad iudicium trahi aut suspendi vel excommunicari seu ipsi et dicti ordinis Beati Pauli loca interdici non possint per literas apostolicas non facientes plenam et expressam ac de verbo ad verbum de indulto huiusmodi mencionem et qualibet alia dicte sedis indulgencia generali vel speciali cuiuscunque tenoris existat, per quam presentibus non expressam vel totaliter non insertam nostre iurisdiccionis explicatio valeat in hac parte quomolibet impediri, que quoad hoc ipsis nolumus aliquatinus suffragari. Quod si non omnes his exequendis potueritis interesse, duo aut unus vestrum nihilominus ea exaquatur. Datum Rome apud Sanctum Petrum anno MDX. nono Kal. Iunii, pontificatus nostri anno septimo. [1510. máj. 24.]