Reverendo in Christo patri, venerabilibus ac religiosis viris dominis, domino Matheo archiabbati totique conventui insignis monasterii Sancti Martini Sacri Montis Pannonie Ordinis Sancti Benedicti Iauriensis diocesis, nos fratres Kilianus abbas totusque conventus monasterii Sancti Mauricii in Alltach inferiori eiusdem Ordinis Pataviensis diocesis, ducatus Bavarie cum sincere charitatis affectu salutem in Domino perhenniter adipisci. Quoniam primordialis ea mortalium erat condicio, ut homo incommutabili bono adherens a fatali, quam peccato incidit, exemptus esset necessitate deliciosaque paradisi amenitate frueretur, donec ciente creatore ad iocundissimam sui plasmatoris transplantaretur beatificam visionem. Verum divinum calcans decretum superne donacionis sprevit largitatem posthabitoque immortalitatis munere tortuosi serpentis procumbens fallaciis eterne se censure constituit debitorem. A qua cum se proprio merito haud elaqueare posset, celsitonantis gratuita bonitas nolens interire hominem, quem plasmarat, sed super humane condicionis miseria pia gestante viscera filium suum unigenitum misit in mundum, ut homines ad gaudia, que perdiderant, reportaret atque eterne iocunditatis portam, quam homo peccando clauserat, per mortis sue meritum reseraret, quam tunc digne nobis ingredi conceditur, cum in vere charitatis, qua capiti nostro Cristo (!) unimur, concordia opera nostra bona alterutrum communicantes pro invicem preces fundimus creatori.||
Cum bonun, quanto communius, tanto divinius esse dinoscatur, eapropter vestre non illaudabilis conversacionis odore allecti maturo ad hoc accedante consilio plene ac integre confraternitatis bonorum videlicet omnium consorcium et communionem in missis, oracionibus, elemosinis, abstinenciis, vigiliis ac aliis virtutum operibus, que superna benignitas per nos presentes et successores nostros in monasterio nostro prefato dignabitur operari, vobis et successoribus vestris vivis atque defunctis nunc et in futurum tenore presencium libere concedentes, eo addito pacto, quod tum obitus fratris unius vel plurium vestri monasterii professi seu professorum nobis intimatus fuerit, vigilias et missam defunctorum cantatam cereis aecensis ac omnibus pulsatis campanis die convenienti iuxta consuetudinem nostri monasterii persolvemus, nomenque ipsius cuiuslibet defuncti kalendariis mortuorum nostrorum annotabimus; sed et singuli sacerdotes missas legentes singulas missas, clerici vero missas non legentes officium defunctorum totum, vesperas videlicet et vigilias novem leccionem cum laudibus; conversi quoque centum Pater noster, totidem angelicas salutaciones annexo quinquies simbolo apostolico in remedium animarum eorundem persolvent.||
Ad premissa nos posterosque nostros presentibus obligantes vosque ac fratres vestros tam presentes, quam futuros ad eadem facienda reciproce censentes obligatos. In quorum omnium fidem et testimonium vobis ac monasterio vestro presentes literas sigillorum nostrorum appensione munitas decrevimus esse tradendas. Datum in prefato nostro monasterio decima die Aprilis sub anno incarnacionis MDXII. [1512. ápr. 10.]