Venerabilibus ac religiosis nobis in Christo specialiter dilectis, domino Matheo, abbati ac priori et toti conventui monasterii Sancti Martini Sacri Montis Pannonie diocesis Auriensis (!) O. S. B. nos Wolffgangus, divina permissione abbas, Heinricus prior totusque conventus monasterii Sancti Egedii in Nurmberga O. S. B. Bambergensis diocesis, quitquid potuerint honoris ac servicii cum sincera in Domino caritate. Quamquam dilectissimi supernorum carismata donorum, que Christi spiritus diffundit in cordibus fidelium, ad copiose fructificandum sancta mater ecclesia universali quadam participacione traducat in singulos adopcionis filios, nequaquam tamen catholice religionis derogat fastidios ad eos emanacioni largiori per specialem quandam applicacionem profluant; quos singularis prerogativa dileccionis merito reddit acceptos. Dum enim pro condicione et posse bona nostra collata a Deo alterutrum in Christo communicamus, non nostra, que sunt, sed que Jezu Christi agentes in charitatis vinculo mentes nostras adunamus. Volentes igitur in Jezu Christi sanctis sacrificiis, que offerimus, vestri devoti memores esse, sicut decet meminisse fratrum religionis ac honestatis vestre attracti fama laudabili propensius et illecti; devocionem quoque, quam ad vestram religionem geritis specialem solliciti intuentes plene vobis presentibus ac futuris in perpetuum confraternitatis consorcium presencium tenore conferimus, omnium videlicet missarum, omnium ieiuniorum, vigiliarum, elemosinarum, laborum omniumque bonorum, que per nos divina clemencia operari dignabitur participacionem specialem concedentes in vita pariter et post mortem. Ceterum si alicuius vestrum vestre congregacionis prelati vel subditi obitus recens, quem Deus felicem faciat, nobis fuerit intimatus, in capitulis nostris anime eiusdem recommedacio fiet, diligens quoque exhortatio, ut fratrum quilibet congregacionis nostre pro eo specialia suffragia faciat, quantum dator supernorum munerum concesserit. In quorum omnium evidenciam pleniorem conservacionemque perpetuam presentes vobis tradimus literas sigillorum nostrorum prenominatorum abbatis et conventus appensione communitas. Datum Nurmberge, anno Domini míllesimo quingentesimo duodecimo feria secunda post festum Sancti Marci evangeliste. [1512. ápr. 26.]