Reverendo, venerabilibus ac religiosis in Christo patribus et fratribus domino Matheo abbati totique conventui monasterii Sancti Martini Sacri Montis Pannonie Ordinis Sancti Benedicti Iauriensis diocesis, nos fratres Georgius abbas, Iohannes prior totusque conventus monasterii Sancti Petri apostoli in Obernaltach eiusdem Ordinis Ratisbonensis diocesis cum sincere caritatis affectu salutem a Domino perenniter adipisci. Quia mediante caritate, que perfeccionis vinculum ab apostolo predicatur, membra singula in corpore sancte ecclesie sibi invicem coniunguntur et Christo suo capiti ad percipiendum per ipsum et in ipso graciarum spiritualium influenciam uniuntur, idcirco tanto liberius atque libencius sinum caritatis in ampliando fraternitatis consorcium dilatamus, quanto ad participacionem fructus huiusmodi fervencius anhelamus. Unde matura deliberacione prehabita plene confraternitatis bonorum scilicet omnium consorcium et communionem in missis, oracionibus, eleemosinis, vigiliis, abstinenciis et aliis virtutum exerciciis, que divina clemencia per presentes nos et successores nostros in dicto nostro monasterio Obernaltach dignabitur operari, vobis et successoribus vestris tenore presencium libere concedimus. Adicientes nihilominus, quod cum obitus fratris unius vel plurimorum predicti vestri monasterii professi vel professorum nobis intimatus fuerit, vigilias et missam defunctorum iuxta consuetudinem nostri monasterii persolvemus, nomina quoque ipsorum ad nos delatorum mortilogiis nostris annotabuntur, sed et sinauli sacerdotes missas legentes singulas missas, clerici vero missas non legentes officium defunctorum totum, vesperas videlicet et vigilias novem leccionum cum laudibus, conversi quoque quinquaginta Pater noster et totidem Ave Maria in remedium animarum eorundem dicent. In quorum omnium testimonium et robur hanc paginam sigillis nostris munitam vobis et successoribus vestris dare decrevimus. Datum nostro in monasterio Obernalltach (!), octava die mensis Iunii, anno Domini millesimo quingentesimo duodecimo. [1512. jún. 8.]