Wladislaus, Dei gracia rex Hungarie et Bohemie etc. fideli nostro spectabili et magnifico Emerico de Peren, perpetuo comiti Abawywariensi ac regni huius nostri Hungarie palatino et iudici Comanorum nostrorum necnon regnorum nostrorum Dalmacie, Croacie et Sclavonie bano salutem et graciam. Mandavimus fideli nostro venerabili et religioso fratri Matheo abbati ecclesie Sancti Martini Sacri Montis Pannonie, ut cum fidelibus nostris egregiis Nicolao Zekel et Georgio Ztrezemlyey racione percepcionis fructuum et utilitatum abbacie de Bela, quam nos eisdem, ut scitis, pro expleccione solucionis sallariorum suorum infra tempus certum dederamus, nostra in persona racionem poneret, qui ut recciorem et utiliorem racionem ponere possit, decrevimus duos ex familiaribus vestris istic penes ipsum per vos transmittendos. Propterea hortamur fidelitatem vestram et eidem committimus, quatenus acceptis presentibus ad predictum Matheum abbatem duos ex familiaribus vestris ad id idoneos mittere ipsisque committere debeatis, ut huiusmodi calculacioni interesse et comparere atque huic rei secundum equitatem providere debeant, ut si aliquid ipsis banis restare videbitur solvendum, id restancie a prefato Matheo abbate rehabeant et abbaciam ex nunc resignent; si vero summa sallarii expleta est de proventibus eiusdem abbacie, sine ulteriori solucione statim de eadem manus suas excipiant et ordini restituant. Secus nom facturi; presentibus perlectis exhibenti restitutis. Datum Bude feria sexta proxima post festum Beate Appollonie virginis et martyris, anno Domini millesimo quingentesimo tredecimo. [1513. febr. 11.]||
Relacio Petri Korlazky Franciscus prepositus. Relacio Petri Korlaczky cubicularii regie maiestatis.