...||
Frater Ladislaus, permissione divina et apostolice sedis gratia abbas monasterii Sancti Martini de Sacro Monte Panonie et conventus loci eiusdem omnibus Christi fidelibus, presentibus pariter et futuris, paginam presentem intuentibus salutem in eo, qui omnium est vera salus. Quoniam ea, que bonorum deliberatione legittima disponuntur perpetuis debent communitatibus communiri, proinde ad cunctorum notitiam serie presentium declaramus, quod nos cupientes possessiones nostras et monasterii nostri antedicti Zenthlazlo et Keresthwr vocatas et alias villas nostras ad easdem pertinentes in comitatu Simidiensi (!) et in districtu de Silizio habitas et existentes populorum sive incolarum copia amplius decorare, ideo nos matura et deliberativa inter nos annuentia prehabita libertates infrascriptas memoratis possessionibus nostris ac hospitibus sive iobagionibus nostris in eisdem commorantibus et etiam causa commorandi ad easdem venientibus, ut ceteri eo confidentius, diligentius et ardentius ad easdem habeant confluentiam: primum, quod quicunque ex ipsis iobagionibus absque heredum gaudio ex hac luce decederet, non plus, quam sexaginta denarios monete pro tempore currentis nobis et nostris successoribus ratione dominii solvere teneatur; item in festo Beati Georgii martiris quatraginta denarios et per consequens in festo Beati Michaelis, archangeli similiter quatraginta denarios singulis annis quelibet sessio pro collecta usuali solvere teneatur; item pro aratura nobis facienda quelibet sessio unum cubulum de avena congruentis mensure similiter aministrare teneatur; item decimatores nostri tempore decimationis eosdem iobagiones nostros tam in vino, quam in frugibus more ab antiquo consueto dicare teneantur; item tempore exercitus unum currum victualibus, precise duas pervas sex pensas valentes et unum pecus saginatum quatuor pensas denariorum se extendens cum aliis minutis quibuslibet absque tamen veridario et animalibus eundem currum trahentibus dare nobis teneantur; item vina initiandi, propinandi sive vendendi cum frugibus ipsorum quibuscunque et cuicunque post exactionem omnem decimarum nostrarum carius et pretiosius liberam habeant vendendi facultatem; item birsagia communia duodecim denarii et quicunque ex ipsis causa commorandi alias se transtulerit pro terragio similiter duodecim denarios deponere teneatur et quocunque voluerit liberam et securam habeat eundi facultatem; item quicunque in iudicio coram officiali nostro per nos ipsis pro iudice constituto per suam linguam excesserit, talis in sexaginta denariis convincatur; factum vero potentiale non magis quam centum denarii, homicidium quinque pense, exceptis tamen furto, latrocinio et incendio (!); item plebanum sive sacerdotem providum et discretum de consensu et beneplacito nostro liberam eligendi habeant facultatem, hoc non pretermisso, quod, si aliquis de nostris iobagionibus sive hic in territorio monasterii nostri existentibus sive intra ipsos in Silizio commorantes et alias ubicunque aliquem hominem casualiter occiderent, pro emenda et satisfactione homicidii hominis interempti mutuo contribuere teneantur; item quandocunque in medium eorundem iobagionum nostrorum de Silizio causa alicuius negotii nostri accederemus, hospitalitatem sive victualia nobis ratione dominii nobis dare teneantur. Quas quidem libertates supradictas eisdem iobagionibus nostris in dictis possessionibus nostris perpetuo et irrevocabiliter duximus concedendas. In cuius rei memoriam, firmitatemque perpetuam presentes litteras privilegiales nostro et conventus nostri sigillis autenticis apensionibus munitas duximus concedendas. Datum sabbato proximo post festum Ascensionis Domini, anno eiusdem millesimo CCCo sexagesimo nono, [1369. máj. 12.] dominis Stephano priore, Iohanne custode, ceterisque dominis et fratribus in eodem monasterio nostro Deo iugiter famulantibus.