...||
Sigismundus, Dei gratia rex Hungarie, Dalmatie, Croatie, etc., marchioque Brandenburgensis etc., fideli suo religioso viro domino fratri et abbati monasterii Sancti Martini Sacri Montis Panonie, necnon officialibus eiusdem in villis Zenthlazlou et Kerezthwr vocatis constitutis salutem et gratiam. Conqueruntur nobis iobagiones de prefatis Zenthlazlou et Kerezthwr ac ad easdem spectantes, quod predecessores viri abbates eosdem in eorum libertatibus condam per religiosum virum dominum fratrem Ladislaum abbatem eisdem datis et concessis non conservassent et ipsis multas iniurias et molestiis contulissent ac superfluas collectas, munera et datia ab eisdem exigissent, per quod ipse possessiones non in modico desolate haberentur, supplicantes nostre maiestati, ut nos easdem in pristinis eorum libertatibus conservari facere dignaremur. Et quia nos ipsas possessiones copia populorum decorare facere intendamus (!), ideo vestre fidelitati firmiter precipiendo mandamus, quatenus dictos populos de Zenthlazlo et de Kerezthur ac ad easdem spectantes in pristinis ipsorum libertatibus per dictum condam Ladislaum abbatem eis suis litteris privilegialibus mediantibus datis et concessis sine omni novitate variationis et superflua exactione tenere et conservare debeatis et aliud non facturi nostre gratie sub optentu. Datum Iaurini, feria secunda proxima ante festum Beati Valentini martiris, anno Domini Mo CCCo nonagesimo secundo. [1392. febr. 12.] Et hoc idem iniungimus futuris abbatibus prefate abbatie, eorumque officialibus in prefatis villis per eosdem constitutis firmiter observandum. Datum ut supra.||
...