Nos capitulum ecclesie Iauriensis memorie commendamus per presentes, quod honorabilis et religiosus frater Benedictus de Papa, professus monachus monasterii Sancti Martini Sacri Montis Pannonie Ordinis Sancti Benedicti, nostram veniendo in presenciam per modum protestacionis et inhibicionis nobis significare curavit in hunc modum, quod quamvis reverendus in Christo pater dominus Matheus abbas et conventus predicti monasterii Sancti Martini ex canonica prescriptique Ordinis ipsorum constitucione, visis habilitate, sciencia, probitate morumque et vite honestate et regulari observancia sua, uno voto et eorum certa deliberacione abbaciam monasterii Sancti Georgii martyris de Iasth diocesis Wesprimiensis sibi contulerint ipseque per certa tempora possederit fructusque eiusdem de iure perceperit, et dum his solummodo novissimis diebus preteritis certis negociis exigentibus dicti monasterii Sancti Martini per dictos abbatem et conventum fuisset revocatus, licet suo loco religiosum fratrem Blasium de Koppan pro habendo et percipiendo fructus et obvenciones eiusdem sue abbacie illic locaverit, nunc tamen, ut ipse protestans revera didicisset, venerabilis magister Michael de Doboz, lector et canonicus ecclesie Albensis, nescitur, quorum consilio ductus non formidando censuras ipsas ecclesiasticas memorati Ordinis, nec veritus, cum in decreto quoque generali regni Hungarie caute sit ordinatum, ut ne quis in habitu seculari abbacias vel preposituras regulares tenere possit, ipsam abbaciam de Iasth utcumque pro se impetrasset, impetratam occupare et usurpare ac fructus et utilitates eiusdem percipere vellet, vel iam de facto occupasset fructusque aliquos eiusdem percepisset in grande preiudicium, derogamen iuris ipsius protestantis manifestum. Facta igitur ipsa protestacione annotatus frater Benedictus memoratum dominum magistrum Michaelem lectorem aliosque quoslibet cuiuscunque condicionis et dignitatis homines ab impetracione, occupacione, usurpacione et sibi ipsis quovis quesito sub colore apropriacione ipsius abbacie de Iasth, usuum fructuumque et quarumlibet utilitatum eiusdem precepcione seu percipifaccione, regiam vero maiestatem, dominum nostrum graciosissimum et alios quoscunque, quorum interest vel interesse poterit a donacione et collacione consensumque ipsorum superinde prebicione et literarum ipsorum sub quibuscunque formis verborum extradacione et emanarifaccione quomodolibet iam factis vel fiendis prohibuit contradicendo et contradixit inhibendo publice et manifeste coram nobis harum nostrarum vigore et testimonio literarum mediantibus. Datum . . .