Nos frater Iacobus abbas et conventus monasterii Sancti Mauritii de Beel, memorie commendamus tenore presentium significantes, quibus expedit, universis, quod nos consideratis et animo revolutis multimodis favoribus, complacentiis et gratuitis servitiis venerabilis magistri Antonii de Kayar, canonici et notarii ecclesie Iauriensis, quibus idem magister Anthonius in cunctis rebus et negotiis nostris et dicti monasterii nostri, item monasterii Sancti Martini ex Sacro Monte Pannonie, sed et totius ordinis nostri pro locorum et temporum varietate indefesse semper affuit, prout etiam in futurum adesse speramus; ob hoc tantorum beneficiorum suorum acceptorum et accipiendorum, eo quo possumus, remunerationis dono vicem rependere volentes, viros etiam a nobis et monasterio nostro bene meritos gratiarum et beneficiorum donis et muneribus decorare semper duximus esse dignum: providis et circumspectis Sebastiano, Ambrosio et Blasio, fratribus germanis eiusdem uterinis et consanguineis, nepotibus videlicet circumspecti quondam Benedicti Romany de eadem Kayar, talem nostram gratiam, benevolentiamque dedimus et contulimus, prout damus et conferimus per presentes, ut ipsi et eorum heredes ac posteritates utriusque sexus universe ratione domus seu fundi eorum ipsorum a prefato quondam Benedicto Romany, avo materno ipsorum, ad eos devolute in predicta possessione nostra Kayar, in comitatu Iauriensi adiacens, aquilonarum (!) eiusdem ville habite ac a superiori parte Antonii Henek, ab inferiori vero Matthei Veres, iobagionum nostrorum, domos (!) seu fundi vicinarum, in qua videlicet etiam ad presens unanimiter resident aut personarum, rerumque suarum nihil plus quam annuatim de vineis ipsorum nunc habitis et etiam in posterum ubicunque et quodcunque (!) intra terminos seu metas predicte possessionis nostre Kayar habendis veras et integras decimas ac in signum recognitionis dominii nostri temporalis et successorum nostrorum munus illud, quod etiam ab aliis colonis eiusdem ville nostre quotannis pro festivitate Natalis Domini nostri Iesu Christi exigi consuerit, perpetuis futuris temporibus nobis et successoribus nostris solvere et extradare debeant et teneantur; de frugibus vero ipsorum, modo predictorum aliorum colonorum nostrorum in eadem possessione nostra Kayar commorantium, solvere tenebuntur; de aliis autem omnibus taxis, datis, censibus, tributis, collectis, muneribus et servitiis tam ordinariis, quam extraordinariis, quibuscunque nominibus vocitentur, authoritate nostra a sacra sede apostolica, divisque regibus Hungarie nobis concessa matura deliberatione et diligenti inter nos tractatu prehabitis, ex certa nostra scientia supportandos duximus, liberandos et eximendos, imo supportamus, liberamus et eximimus per presens tali conditione, quam a nobis idem magister Antonius apponens optavit, adiecta, ut, si quis prefatorum fratrum germanorum suorum aut eorum heredum et posteritatum de dicta domo alibi vel in dicta possessione nostra Kayar vel alias ubicunque moraturus exierit, et (!) tunc premissa nostra gratia munifica nequaquam gaudere possit. Quo circa vobis universis et singulis officialibus, ispanis, dicatoribus, collectoribus, iudicibus seu villicis et iuratis nostris in dicta possessione nostra Kayar nunc constitutis et in futurum constituendis harum serie firmiter precipimus, committimus et mandamus, quatenus prefatos Stephanum, Ambrosium et Blasium, eorumque heredes et posteritates utriusque sexus universas, sicut promittitur (!), per nos liberatos, exemptos et supportatos, quantum ad vos pertinet, in predictis libertatibus et exemptionibus per nos eis concessis manutenere, fovere, conservare, protegere et defendere debeatis et teneamini, secus nullo modo facere presumentes. In cuius rei testimonium, firmitatemque perpetuam presentes litteras nostras privilegiales duximus super inde concedendas. Datum in dominica Misericordie, anno Domini 1518. [1518. ápr. 18.]