Nos Matheus, Dei et apostolice sedis gracia Sancti Martini Sacri Montis Pannonie, supremus presidens Ordinis Sancti Benedicti ac Paulus Peech-Waradiensis, Iohannes Saxardiensis, compresidentes, necnon Iacobus de Beel, Iohannes Sancti Benedicti iuxta fluvium Gron et alter Iohannes de Batha, difinitores ceterique domini monasteriorum abbates totam congregacionem universorum dominorum ipsius Ordinis Sancti Benedicti abbatum in hoc regno existencium representantes memorie commendamus tenore presencium significantes, quibus incumbit, universis, quod nobis pro augmento et reformacione statuque felici Ordinis predicti tractaturis in prefato monasterio Sancti Martini, capitulo videlicet generali capitulariter de more congregatis et convenientibus, quia inter cetera Ordinis nostri precipua negocia monasterium Assumpcionis Beate Marie Virginis de Kolos Monosthra dicti Ordinis Sancti Benedicti dyocesis Albensis Transsilvaniensis nunc apud seculares manus habitum de iure vacare legittimoque pastore destitutum fore comperimus, nos volentes dicto monasterio sic, ut premittitur, vacanti succurrere et providere ipsumque pastore idoneo decorare, ne pro defectu pastoris dominicum gregem lupus rapax invadat ipsaque abbacia propter diuturnam vacacionem gravem paciatur in spiritualibus et temporalibus lesionem, vocatis omnibus, qui eleccioni celebrande debuerunt, voluerunt et potuerunt commode interesse, assumptis tribus ex nobis fidedignis videlicet predicto Iohanne Saxardiensi, Georgio de Kaach et Gregorio de Kapornak coabbatibus, qui sigillatim (!) et secrete vota cunctorum diligenter inquirendo et in scriptis diligenter similiter redigendo redactaque mox, in communi uno contextu, nullo actu interim contrario interveniente, publicando, collacione tandem habita superinde diligenti, post diversarum personarum nominaciones discussionesque et inquisiciones nulla fraude interveniente, immo cum consilio certorum virorum religiosorum aliunde ad id convocatorum unanimiter plena concordia in animi tranquillitate nemine inter nos penitus discrepante coram notariis publicis infrascriptis in venerabilem et religiosum patrem Martinum de Thyrnavia, alias de Thatha abbatem, regulam Sanctissimi patris nostri Benedicti monachum expresse professum, virum utique maturum, sufficientem et idoneum ac de matrimonio legittimo susceptum et in sacris ordinibus constitutum consensimus eundemque dominum Martinum tanquam hominem moribus ornatum vita et literarum scientia merito commendandum in temporalibus et spiritualibus circumspectum et iura illius monasterii defensare potentem invocata Spiritus Sancti gracia ad honorem ipsius Beatissime Virginis Marie prefati monasterii patrone in abbatem eiusdem monasterii elegimus et pastorem. Immo iuxta privilegia diversorum divorum regum nobis et Ordini nostro concessa et per certos tandem sanctissimos Romanos et universales ecclesie pontifices confirmata eligimus et nominamus ipsamque eleccionem sic canonice et solempniter, ut prefertur, celebratam omnes unanimiter recipimus et approbamus per presentes, ipso patre Martino, quamvis se multipliciter excusante, eodem tamen postmodum nobis vehementer instantibus iugo divine vocacionis cervicem subiciente, eleccionem ipsam de se canonice factam officiumque et onus sibi impositum, ut prodesse valeat, non tam timide quam devote suscipiente et acceptante.||
Quocirca vobis reverendissimo domino dicte Albensis ecclesie episcopo eius ordinario seu cui de hoc interest, duximus unanimiter supplicantes prefatum dominum Martinum electum vestre reverendissime dominacioni representandum, ut eleccionem supradictam vestra reverendissima dominacio confirmare ipsumque electum in dicta abbacia instituere institutumque defendere et velit et dignetur, quatinus auctore Deo predicto monasterio veluti pastor idoneus in his, que ad ipsum spectant, preesse valeat et prodesse fratresque et alii sibi commissi sub eius regimine et ministerio possint coram Domino salubriter militare. Vestram reverendissimam dominacionem Sancta Trinitas ad solamen sancte sue ecclesie perpetualiter bene valere concedat. In cuius rei memoriam firmitatemque perpetuam presentes literas nostras exinde fieri ac sigillorum nostrorum impressionibus nominumque nostrorum manibus propriis subscripcionibus fecimus et iussimus una cum notariorum publicorum infrascriptorum similiter subscripcionibus communiri. Datum in prefato monasterio Sancti Martini, penultima die mensis Aprilis anno Domini millesimo quingentesimo decimo octavo.||
Ita est Matheus qui supra||
Ita est Paulus abbas Peccz Waradiensis||
Ita est Iohannes abbas Saxardiensis||
Ita est Iohannes abbas de Batha abbates||
Ego quoque Blasius abbas Sancte Trinitatis me subscripsi et ita esse contestor vocatus.